Esambu 119 - La Bible en Otetela (Bible K'Ekila) 1991

Ololo wa Mamba wʼElembe wa Unyashungu

¹ Wane wusimbwi lu mbuka yawo weli la otshoko, Ee, wane watokendakendaka lu elembe wa Latuyalaka.

² Wane watulamaka aui andi weli la otshoko. Waku watuyangaka lʼutema otoi,

³ Wahatutshaka akambu wa kolo, Keli watokendakendaka lu mbuka yandi.

⁴ We akatudjangela adjangu aye, Dia shu mbalama lʼutema otoi.

⁵ Dimi lambukumbula dia nshikike ditshelu diami, Dia dimi namaka elembe aye!

⁶ Ku halutshama sonyi, Lamʼayumulamaka elembe aye tshe.

⁷ Lamʼayumulimbitela elembe aye wʼololo, Dimi layukukaka lusaka lʼutema wʼusimbwi.

⁸ Dimi layulamaka elembe aye, Tutetemalaka nsekami!

⁹ Ukundi ayuluwanya olongo a pami lumu landi? Naka ndi ayululamaka uku diui diaye.

¹⁰ Dimi lakakuyangaka lʼutema ami tshe. Tetawoki dimi mbetola uma lʼelembe aye!

¹¹ Dimi lakumbi diui diaye lʼutema ami, Ne dia dimi latukukutshela kolo.

¹² Latuyalaka li, utumbwami! Umbetshaki elembe aye!

¹³ La elomo ami, mbatumutaka Adjangu tshe watutumbaka uma lʼunyo aye.

¹⁴ Dimi latongenangenaka dia ndjela elembe aye, Uleki ekundji tshe.

¹⁵ Dimi layudjaka yimba lu adjangu aye, Layudjaka ashu lu mbuka yaye.

¹⁶ Dimi layongenangenaka lu elembe aye, Haluhela diui diaye.

¹⁷ Untsheli, dimi ukambi aye, ololo dia dimi numba, Ku layulamaka diui diaye.

¹⁸ Osenya ashu ami, dia dimi mena Akambu wa mamba wʼuma lʼelembe aye.

¹⁹ Ongendangenda mbemi la kete, Tumbisheki elembe aye.

²⁰ Utema ami ambululaka too La saki kʼelembe aye.

²¹ We atuhangwelaka akanga wʼetaku, ambidjami wa mananu ako, Watunganelaka uma lʼelembe aye.

²² Uminyiya ehanguhangu aye, la dionyo diaye, Ne dia dimi latulamaka aui aye.

²³ Ana wa khumi ya dikanga wakambidjasela la lotengo, Keli dimi, ukambi aye, layukana yimba dia elembe aye etu.

²⁴ Aui aye watongenyangenyaka, Weli andaki ami.

²⁵ Lumu lami lambukhundama lu kete, Umbululi uku diui diaye.

²⁶ Lamʼakamasanya akambu ami, we akambukela, Umbetshaki elembe aye.

²⁷ Unimbitshiyaki mbuka ka adiangu aye, Ku layukanaka yimba dia etsha aye wa mamba.

²⁸ Lumu lami lambolelo la lokonyo, Unkikitsha uku diui diaye.

²⁹ Umanganyia mbuka ka kashi, Undakanyaki elembe aye la ngandji ka mamba!

³⁰ Dimi lakasonola mbuka ka mete, Lakakitsha elembe aye la ntundu kami.

³¹ Dimi latukelekamaka lu aui aye, Latuyalaka li, tunsambaki sonyi.

³² Layuyalaka mbuka kʼelembe aye, Lamʼayuyokokola utema ami.

³³ Latuyalaka li, umbetshaki elembe aye, Ku dimi layelamaka edja ndu lʼekumelu.

³⁴ Umbisha yimba, ku layulamaka elembe aye, Layelamaka lʼutema tshe.

³⁵ Onombolaki lu mbuka ka adiangu aye, Ne dia loko katumongenangenaka.

³⁶ Enge utema ami utsha lʼelembe aye etu, Aha utsha lʼokomiya.

³⁷ Unya ashu ami uma lʼakambu wʼanyanya, Untshutshiya lu mbuka kaye.

³⁸ Ushikike daka diaye le ukambi aye; Dio diatuyalaka le waku watukukaka woma.

³⁹ Umanganyia dionyo diatumukaka woma, Ne dia dumbwelu diaye dieli ololo.

⁴⁰ Enda, dimi latulangaka ndjela adjangu aye: Unumbia lu sambu kaye kʼololo.

⁴¹ Latuyalaka li, ngandji kaye ka shikaa kayaki le mi, Ee, panda kaye uku diui diaye.

⁴² Ku layeya nkaluya one latontengaka diui, Ne dia dimi latekamaka lu diui diaye.

⁴³ Tunyaki diui dia mete uma lʼunyo ami, Ne dia dimi latulungamelaka dumbwelu diaye.

⁴⁴ Ku layulamaka elembe aye nshi tshe, Kakiane ndu pundju.

⁴⁵ Dimi layuyalaka la ndjadjasela, Ne dia dimi lakayangi adjangu aye.

⁴⁶ Latuyalaka aui aye la ntundu ka khumi ya dikanga, Ku halutshama sonyi.

⁴⁷ Dimi latongenangenaka lu elembe aye, Watumulangaka.

⁴⁸ Dimi layedia anya ami utsha lʼelembe, Watumulangaka. Dimi latukanaka yimba lu elembe aye.

⁴⁹ Uhoki daka diaye le ukambi aye, Ne dia we akambisha elungamelu.

⁵⁰ Dio mbeli esambelu kami lu asui ami, Ne dia daka diaye mbatumbishaka lumu.

⁵¹ Akanga wʼetaku wakamonyola efula, Keli dimi kombetola uma lʼelembe aye.

⁵² Latuyalaka li, dimi latuhoka dumbwelu diaye dia nshi yʼedjedja! Ku latuyasambaka.

⁵³ Kele ka wulu katumundaka, Ne dia antu wa kolo watutunaka elembe aye.

⁵⁴ Elembe aye weli esambu ami Lu luudu ludjashimi, lu lokendo lami.

⁵⁵ Dimi latuhoka lukumbu laye ndu lʼutshu, we Latuyalaka! Ku latulamaka elembe aye.

⁵⁶ Osoku mbatumutshaka, Ne dia dimi latulamaka adjangu aye.

⁵⁷ Latuyalaka keli lami hita, mbatumutaka nti: Umbuki ketshi uku daka diaye.

⁵⁸ Dimi lakakosengasenga lʼutema tshe nti: Umbuki ketshi uku daka diaye.

⁵⁹ Lakakanaka yimba ne dia mbuka yami, Ku lakasikisula ekulu ami utsha lʼadjangu aye.

⁶⁰ Dimi lakasamanya, kuntshimbatshimba, Dia nama elembe aye.

⁶¹ Ekodi wʼantu a kolo wambunyinga, Keli haluhela elembe aye.

⁶² Dimi layunela lʼasa ndeki dia nkuka lusaka, Ne dia dumbwelu diaye diʼololo.

⁶³ Dimi latekesanelaka la wane watukukaka woma, Ee, waku watulamaka adjangu aye.

⁶⁴ Latuyalaka li, kete yambulula too la ngandji kaye ka shikaa, Umbetsha elembe aye.

⁶⁵ Latuyalaka li, we akantshelaka, dimi ukambi aye, ololo, Uku daka diaye.

⁶⁶ Umbetsha sambu kʼololo ndu ewu, Ne dia dimi latetawoka elembe aye.

⁶⁷ Ntundu latasuyama, dimi lakanganela. Keli kakiane lulama aui aye.

⁶⁸ We keli ololo ndu katutshaka ololo; Umbetsha elembe aye.

⁶⁹ Akanga wʼetaku watunkanelaka akambu wa kashi, Keli dimi latulamaka adjangu aye lʼutema tshe.

⁷⁰ Etema awo wambulula la lunyu. Keli dimi latongenangenaka lu elembe aye.

⁷¹ Aki ololo dimi nsuyama, Dia dimi mbeka elembe aye.

⁷² Olembe uma lʼunyo aye ambuleka Tenyi dia paunyi la fesa nunu nunu ololo le mi.

⁷³ Anya aye mbakantungi ndu mbakanshikike; Umbisha yimba ya dimi mbeka elembe aye.

⁷⁴ Wane watukukaka woma, wayomena, ku wayongenangena, Ne dia dimi latulungamelaka alaka aye.

⁷⁵ Latuyalaka li, dimi mbeyaka nti: Dumbwelu diaye dieko ololo; Uma lu kolamelu yaye mbakayansuya.

⁷⁶ Dimi lambukosengasenga nti: Ngandji kaye ka shikaa kayali esambelu le mi, Uku akayandaki, dimi ukambi aye.

⁷⁷ Ketshi kaye ka mamba kayi le mi dia dimi numba, Ne dia elembe aye mbeli ongenongeno ami.

⁷⁸ Akanga wʼetaku, watunsuyaka usuyasuya, wutshami sonyi! Keli dimi latukanaka yimba lu adjangu aye.

⁷⁹ Waku watukukaka woma, wakadimo uya le mi, Ku vo wayulimbitela aui aye!

⁸⁰ Utema ami aluwani lu elembe aye, Dimi ntukutshama sonyi.

⁸¹ Utema ami atokomoka lu nkunga panda kaye. Keli dimi latulungamelaka daka diaye.

⁸² Ashu ami watuhamboka lu mendela daka diaye. Ku latumbulaka nti: Etena kakona kayuyuyunsamba na?

⁸³ Dimi lambukatatala uku tapa diʼekuhu lu lukala, Keli dimi haluhela elembe aye.

⁸⁴ Nshi yʼukambi aye ngana yeyo? Etena kakona kayuyulumbuya wane watunsuyaka?

⁸⁵ Akanga wʼetaku watuntshimelaka afuku, Wahatuyelaka elembe aye.

⁸⁶ Elembe aye tshe weli mete. Vo watunsuyaka usuyasuya: unkimanyia.

⁸⁷ Wakayangi nshishami la kete. Keli dimi konseka adjangu aye.

⁸⁸ Umbululi la ngandji kaye ka shikaa, Dia dimi namaka aui wʼuma lʼunyo aye.

⁸⁹ Latuyalaka li, pundju, pundju, Diui diaye diatushikikalaka lʼulungu,

⁹⁰ Kolamelu yaye yatutshikalaka lu lolonga la lolonga, We kakatungi kete, ku yo yatushikikalaka pundju.

⁹¹ Diango tshe diambushikikala edja ndu elo uma lʼelembe aye, Ne dia dio tshe dieko ekambi aye.

⁹² Utunduyala e embe kundjala engenongeno ami, Tshiki dimi lakavu lʼasui ami.

⁹³ Dimi hambuhelaki adjangu aye pundju, Ne dia uma loko mbakayambulula.

⁹⁴ Laye kemi; unshimbeli, Ne dia dimi latuyelaka adjangu aye.

⁹⁵ Antu wa kolo watunkungelaka dia ndjakami. Keli dimi latukanaka yimba lu alaka aye.

⁹⁶ Dimi menaka diango tshe ndjalaka lʼekumelu. Keli elembe aye kema la ekumelu.

⁹⁷ Ndi ngandji katumukaka elembe aye li! Vo mbatumukanaka yanyi tshe.

⁹⁸ Elembe aye mbatumbishaka yimba yuleki ya atunyi ami, Ne dia elembe ako watuyalaka la mi tena tshe.

⁹⁹ Dimi lambuleka embetsha ami tshe yimba, Ne dia adjangu aye weko yimba yami.

¹⁰⁰ Dimi lambuleka esumbi mana akambu fundu, Ne dia latukitanyiaka adjangu aye.

¹⁰¹ Dimi latushimbaka ekulu ami uma lu mbuka tshe ya kolo, Dia dimi nama aui aye.

¹⁰² Dimi hatetolaka uma lʼelembe aye, Ne dia weme katumbetshaka.

¹⁰³ Ndi mpe keli aui aye lʼunyo ami li! Ndeka usanga a ndjui.

¹⁰⁴ Uma lʼadjangu aye mbatumukundjaka yimba. Diako mbatumuhetshaka mbuka tshe ya kolo.

¹⁰⁵ Diui diaye dieko tala lʼekulu ami, Ndu usasi lu mbuka kami.

¹⁰⁶ Dimi lakatshibi, ndu layushikike etshibelu kami nti: Layulamaka elembe aye wʼololo.

¹⁰⁷ Lambusuyama efula, We Latuyalaka, umbululi uku diui diaye!

¹⁰⁸ We Latuyalaka, lambukosengasenga nti: Etawo elambu wa diandu wʼuma lʼunyo ami, Umbetshaki elembe aye.

¹⁰⁹ Lumu lami ndjalaka kʼanya atu. Keli dimi haluhela elembe aye.

¹¹⁰ Antu wa kolo watumambaka tulunga. Keli dimi hatunganelaka uma lʼadjangu aye.

¹¹¹ Lakose aui aye uku sangu dia pundju, Ne dia vo watuyalaka ongenongeno wʼutema ami.

¹¹² Dimi latekiyaka utema ami dia nkitanyia elembe aye Pundju, edja ndu ekumelu.

¹¹³ Dimi latuhetshaka akanga wa dundji pendi. Keli dimi latulangaka elembe aye.

¹¹⁴ We keli eshamelu kami la engawu kami; Dimi latulungamelaka daka diaye.

¹¹⁵ Nyu, atshi wa kolo, nyumanganeli, Ne dia dimi latukitanyiaka elembe a Unyashungu ami.

¹¹⁶ Unsukeli uku diui diaye, dia dimi numba, Tunsambaki sonyi lʼelungamelu kami.

¹¹⁷ Unsukeli, dia dimi nshimbamela, Ndu nemia elembe aye pundju.

¹¹⁸ We atonyolaka wane watunganelaka uma lʼelembe aye, Ne dia lukesu lawo hakundjiya nduku engo.

¹¹⁹ We atunyaka antu wa kolo tshe wa la kete uku lufulu. Diako mbatumulangaka elembe aye.

¹²⁰ Dimba diami diatudidimaka, ne dia woma aye. Dimi latukaka dumbwelu diaye woma.

¹²¹ Dimi latutshaka akambu wʼololo la wʼuluwanyi Tuntshikaki lʼanya a waku watunsuyaka.

¹²² Undaki, dimi ukambi aye, dia ntshelami ololo. Tetawoki akanga wʼutaku nsuyami.

¹²³ Ashu ami watuyalaka lungi lu mendela panda kaye, Ndu nungamela diui diaye diʼololo.

¹²⁴ Untshelaki, dimi ukambi aye, uku eli ngandji kaye ka shikaa, Umbetshaki elembe aye.

¹²⁵ Ukambi aye mbemi, umbisha yimba, Ya dimi nimbitela elembe aye.

¹²⁶ We Latuyalaka, aya ntsha, etena kambukuka, Ne dia vo watonyolaka elembe aye.

¹²⁷ Diako mbatumulangaka elembe aye, Ndeka paunyi, ee, uleki paunyi ka lutshula.

¹²⁸ Okone mbatumenaka elembe aye tshe nti: Ololo mbewo. Dimi latuhetshaka mbuka tshe ya kashi.

¹²⁹ Aui aye weli mamba. Diako mbatumalamaka lʼutema ami.

¹³⁰ Eotwelo ka aui aye katutungaka usasi. To katushaka dinginya yimba.

¹³¹ Dimi lataseka unyo, latohengaka, Ne dia dimi latukumbulaka elembe aye.

¹³² Usikiso uya le mi, umbuki ketshi, Uku atuyutshelaka waku watukaka lukumbu laye ngandji.

¹³³ Ushikike ekulu ami dia ndjela aui aye, Tetawoki dikambu dia kolo mbahamelami.

¹³⁴ Unshimbeli uma lu shoko yʼantu, Ku layulamaka adjangu aye.

¹³⁵ Ohetshiya ukambi aye elundji, Umbetshaki elembe aye.

¹³⁶ Asoi watokelaka uku akeledu wʼashi uma lʼashu ami, Ne dia antu ako hawukitanyia elembe aye.

¹³⁷ Latuyalaka li, we keli ololo, Ndu dumbwelu diaye dieko esimboki.

¹³⁸ We atushikikeka aui aye la sambu kʼololo, Ndu la kolamelu ya mete.

¹³⁹ Saki ka wuki kukami elembe aye kambundjaka, Ne dia atunyi ami tshe wambuhela aui aye.

¹⁴⁰ Diui diaye dieko uluwanyi. Diako mbatudilangaka ukambi aye.

¹⁴¹ Untu kʼuntu kemi, ndu omonywami, Keli dimi hatuhelaka adjangu aye.

¹⁴² Ololo aye weko ololo wa pundju, Ndu elembe aye weli mete.

¹⁴³ Pa la asui wambumunda. Keli dimi latongenangenaka lʼelembe aye.

¹⁴⁴ Aui aye weli ololo pundju. Umbishaki yimba, dia dimi numba.

¹⁴⁵ Latuyalaka li, lamʼaketami lʼutema tshe, umbukeli; Dimi layulamaka elembe aye.

¹⁴⁶ Dimi latuketaka, unshimbeli, Dia dimi nkitanyiaka aui aye.

¹⁴⁷ Dimi latetoka la kesekese, Latulelaka, latulungamelaka alaka aye.

¹⁴⁸ Dimi latetoka lʼutshu, latosenaka, Dia nkana yimba lu aui aye.

¹⁴⁹ Uki dombelo diami uku eli ngandji kaye ka shikaa; We Latuyalaka, umbululi uku elembe aye.

¹⁵⁰ Waku watutshaka kolo watusukanaka. Vo watanganaka etali uma lʼelembe aye.

¹⁵¹ Latuyalaka li, we eko suki, Ndu elembe aye tshe weko mete.

¹⁵² Uma kʼedjedja mbakameyi aui aye nti: We akashikike pundju.

¹⁵³ Endi asui ami, untshunguli, Ne dia dimi haluhela elembe aye.

¹⁵⁴ Usambuli dikambu diami, unshimbeli; Umbululi uku daka diaye.

¹⁵⁵ Panda keko etali le antu wa kolo, Ne dia vo hawutuyangaka elembe aye.

¹⁵⁶ We Latuyalaka, ndi ketshi kaye wuki li! Umbululi uku eli dumbwelu diaye.

¹⁵⁷ Atunyi ami la waku watunsuyaka weko efula. Keli dimi hatetolaka uma lʼelembe aye.

¹⁵⁸ Dimi latendaka afungi la wononyi, ku latunyangaka Ne dia vo hawutuyelaka diui diaye.

¹⁵⁹ Uhoki wad: Dimi latulangaka adjangu aye. We Latuyalaka, umbululi uku ngandji kaye ka shikaa.

¹⁶⁰ Utundu a diui diaye weko mete, Ndu elembe aye wʼololo tshe watutshikalaka pundju.

¹⁶¹ Ana wa khumi ya dikanga watunsuyaka usuyasuya, Keli utema ami atudidimaka paka lu aui aye.

¹⁶² Dimi latongenangenaka lu diui diaye, Uku untu lambushula ukundji efula.

¹⁶³ Dimi latuhetshaka ndu latutunaka kashi, Keli latulangaka elembe aye.

¹⁶⁴ Dimi latukandulaka tena esambeli lu lushi, Ne dia elembe aye wʼololo.

¹⁶⁵ Ki ka mamba katuyalaka le wane watulangaka e mbe aye. Nduku lukulu lʼengeno latuyalaka le wo.

¹⁶⁶ Latuyalaka li, dimi latulungamelaka panda kaye, Ndu latukitanyiaka elembe aye.

¹⁶⁷ Utemʼami atulamaka aui aye, Dimi latalangaka efula.

¹⁶⁸ Dimi latulamaka adjangu aye ndu aui aye, Ne dia mbuka yami tshe yeko la ntundu kaye.

¹⁶⁹ We Latuyalaka, uki delu diami; Umbisha yimba uku diui diaye.

¹⁷⁰ Etawo osengosengo ami nkuma le ye, Untshunguli uku diui diaye.

¹⁷¹ Elomo ami wakandulaki, Ne dia we katumbetshaka elembe aye.

¹⁷² Lulimi lami limbaki diui diaye, Ne dia elembe aye tshe weko ololo.

¹⁷³ Lunya laye lankimanyia, Ne dia dimi lakasonola adjangu aye.

¹⁷⁴ Latuyalaka li, dimi latukumbulaka panda kaye; Elembe aye mbeli ongenongeno ami.

¹⁷⁵ Utema ami ayalaki la lumu, ku vo wayukandulaka; Dumbwelu diaye diansukelaki.

¹⁷⁶ Dimi lakanganela uku okoko wakashisho, unyangi, dimi ukambi aye, Ne dia dimi haluhela elembe aye.