Esambu 115 - La Bible en Otetela (Bible K'Ekila) 1991

Unyashungu la Dikishi

¹ Tawututumbulaki shu, we Latuyalaka, tawututumbulaki! Keli lukumbu laye latumbwami, Ne dia ngandji kaye ka shikaa, ndu mete kaye.

² Ukundi atumbulaka wedja vati: Lendʼeli Unyashungu awo?

³ Keli Unyashungu asu eko lʼulungu, Atutshaka kene tshe kalangandi ntsha.

⁴ Dikishi diawo dieli fesa la paunyi, Ulimu wʼanya wʼantu mbedio.

⁵ Dio dieko la enyo, keli hadioteketa; Dio la ashu, keli hadienyi;

⁶ Dio la atui, keli hadiuki; Dio lʼehembe, keli hadiuki sulu;

⁷ Dio lʼanya, keli hadiunanda; Dio lʼekulu, keli hadiokendakenda, Nduku diui diatutumbaka uma lu weudi adio.

⁸ Waku watudiselaka, watufanaka la dio. Osoku mbatuyalaka ndu untu tshe latudiekamaka.

⁹ Isariyele li, ekamaki Latuyalaka! Ndi keli ekimanyelu kawo la engawo kawo.

¹⁰ Khumbu ka Arona li, ekamaki Latuyalaka! Ndi keli ekimanyelu kawo la engawu kawo.

¹¹ Nyu wane watukaka Latuyalaka woma, nyuwekamaki! Ndi keli ekimanyelu kawo la engawu kawo.

¹² Latuyalaka atutukanelaka; ndi ayutotshokola. Ndi ayotshokola khumbu ka Isariyele, Ayotshokola khumbu ka Arona.

¹³ Latuyalaka ayotshokola waku watuwukaka woma, Ndu antu wa tshitshe ndu antu a waki.

¹⁴ Latuyalaka anyenyaki olo, Ndu nyu ndu anʼanyu.

¹⁵ Nyotshokwami le Latuyalaka, Lakatungi ulungu la kete!

¹⁶ Ulungu weli wa Latuyalaka, Keli kete mbakandasha antu.

¹⁷ Wane wakavu, hawutandulaka Latuyalaka, Ee, wane watahulo utsha lʼudimu a pengandu.

¹⁸ Keli shu tayutumbulaka Latuyaiaka, Umaka kakiane ndu pundju. Nyandulaki Latuyalaka.