Esambu 111 - La Bible en Otetela (Bible K'Ekila) 1991

Elamelu ka Latuyalaka le Wudja Andi

¹ Nyandulaki Latuyalaka! Dimi layuwandulaka lʼutema ami tshe, Lu ului wʼantu wʼololo ndu lu lusanganya.

² Elimu wa Latuyalaka weli waki. Waku tshe watongenangenaka, watekaka.

³ Ulimu andi watuyalaka nemo la lutumbu; Sambu kandi kʼololo katutshikalaka pundju.

⁴ Ndi atuhulaka antu dia etsha andi wa mamba. Latuyalaka kuludi too la ngandji ka mamba la ketshi.

⁵ Ndi atushaka wane watuwukaka woma mbu ya nde, Atuhoka daka diandi tena tshe.

⁶ Ndi akenya wudja andi wulu wʼetsha andi, Lamʼakandawasha ukito a wedja.

⁷ Elimu wʼanya andi weli mete la uluwanyi. Adjangu andi tshe weli shikaa.

⁸ Vo wakatshama la mete la sambu kʼololo, Watushikikalaka pundju.

⁹ Ndi akatumela wudja andi etshungwelu, Akashikike daka diandi pundju. Lukumbu landi leko ekila la nemo.

¹⁰ Woma wa Latuyalaka weli etatelu ka yimba. Waku tshe watulamaka dikambu ne, weko la ewu kʼololo. Lutumbu landi latutshikalaka pundju.