Esambu 109 - La Bible en Otetela (Bible K'Ekila) 1991

Delu Dia Nsomboya

¹ We Unyashungu, latumutumbulaka, tolembohalaki!

² Antu wa kolo la akanga a kashi watumbaselaka enyo, Watutaka akambu wa kashi dikambu diami.

³ Vo watunyingaka lʼaui wa luhetshu, Watondoshaka oloshalosha.

⁴ Lamʼatumuwaukaka ngandji, ku vo watumpetshaka. Keli dimi latuyakimoka lu dombelo.

⁵ Vo watukaluyaka kolo lʼololo, La lutunu lu ngandji kami.

⁶ Etawo untu a kolo mbulela utunyi ami, Ndu osongwedi memala lu lunya landi la pami!

⁷ Lamʼayuwulumbuya, ndi kayali la unungu; Ndu dombelo diandi kadiuyali kolo ketu!

⁸ Ususi nshi yandi, Ukina akiti ulimu andi!

⁹ Anʼandi wayali ditshiki, Ndu wadendi, wadi aki udu!

¹⁰ Anʼandi wayali tekeko, watalombaka diango, Watayangaka mbu ya nde lu ahuli wa ndjetete.

¹¹ Osondjanyi ahotole kene tshe keli la ndi, Antu kʼantu wamani ekundjelu kʼulimu andi!

¹² Tetawoki untu mbutshela la memakana, Kana mbuka anʼandi wa ditshiki ketshi.

¹³ Anʼandi washili ushiki, Kumbu yawo yashisho pundju.

¹⁴ Ehedia a washi watshikali euhwelu la ntundu ka Latuyalaka, Kolo ka nyangu tashishoki la ntundu kaye.

¹⁵ Yo yatshikalaki la ntundu ka Latuyalaka, Dia ndi minya euhwelu kawo uma lu kete,

¹⁶ Ne dia ndi akuhela ntshela antu la ketshi, Akasuya usi wula la omenyi fono, Edja ndu lamʼakandadiaki kanga utema a mbate!

¹⁷ Ndi katulangaka mbidjanela mananu, mananu kayali le ndi! Ndi lahatulangiyanaka etshoko, etshoko wamo uma le ndi!

¹⁸ Ndi akalote mananu uku dihondo. Yo yadiangani lu dimba diandi tshe uku ashi, Ndu lu weka andi uku iso.

¹⁹ Mananu yako yayali le ndi uku dihondo diatundolotaka, Uku uya watundolotaka nshi tshe.

²⁰ Difutu dia atunyi ami uma le Latuyalaka diayali osoku, Dia waku watoteketaka kolo dikambu diami!

²¹ Keli we Latuyalaka, Khumadiondjo, untsheli ololo ne dia lukumbu laye. Untshunguli, ne dia ngandji kaye ka shikaa keli ololo!

²² Usi wula la omenyi fono mbemi, Lambuhomo puta lʼutema ami.

²³ Dimi lutsha mbeta uku dedi dia dikolo, Lambuhanwima uku dikata.

²⁴ Adui ami waya wodu uma lʼekilelu ka ma, Ndu dimba diami diambonda.

²⁵ Dimi lambuyala omonywami le wo, Lamʼatuwumendaka, watusutshaka ete awo.

²⁶ Latuyalaka, Unyashungu ami li, unkimanyia! Unshimbeli uku eli ngandji kaye ka shikaa le mi,

²⁷ Dia vo mbeya vati: Lunya laye lone, We, Latuyalaka, kambutsha dikambu ne!

²⁸ Wambidji mananu, keli we ontshokole; Lamʼunelawo, vo wutshami sonyi, Keli ukambi aye angenengene.

²⁹ Atunyi ami wavu sonyi, Wayakumbi la sonyi uku dihondo!

³⁰ Layukaka Latuyalaka lusaka la wuki lʼunyo, Ee, dimi layutumbulaka lʼatei ului wʼantu.

³¹ Ndi atemalaka lu lunya la pami lʼusi wula, Dia mbushimbela uma le waku watuwudjaka mananu.