Esambu 104 - La Bible en Otetela (Bible K'Ekila) 1991

Latuyalaka Atulamaka Etungelu Kandi

¹ Utema ami, utumbuli Latuyalaka! We Latuyalaka, Unyashungu ami, we keli wuki utamanya! We kolotshi nemo la lutumbu!

² We katuyakumbaka lʼusasi uku dihondo, Katunanulaka ulungu uku dihondo.

³ We atuhikaka dikoho dia luudu laye lʼashi, Ateteka wangi pusupusu kaye, Atahemaka lu ahafu wa lopepe.

⁴ We ateteka pepe akendji aye, La nyumbi ya dja ekambi aye.

⁵ We akashikike kete lu dikitshelu diayo, Diako mbahayasukasukaki pundju.

⁶ We akayikumbi lʼashi a waki uku dihondo, Ashi wakambela ladiku diʼekungu.

⁷ La luhangu laye mbakawadiangana, Wakahandjo la diui diaye dia dikhungula.

⁸ Ekungu wakambela, ku ekidi wakahulo Lu ahuli wakayatungela.

⁹ We akadjela ashi ulelu wahawatulekanaka, Diaha vo nkumba kete ntu.

¹⁰ We atokediaka ekedi utsha lʼekidi, Watokelaka lʼasa akuna.

¹¹ Vo watonoshaka nyama tshe ya lʼesui, La mangana yatonokaka ashi awo.

¹² Fudu ya lʼulungu yatahemaka lʼemamu awo, Yatimbaka lu etamba.

¹³ Uma lʼedjaselu kaye ka ladiku katuyoloyaka ekungu; Kete yambulula la elua wʼelimu aye.

¹⁴ We katutundjaka adiyu dikambu dia dungalunga, La tumbatumba ne dia ehumba wʼantu, Dia vo ngonya mbu ya nde la kete;

¹⁵ La wanu watongenyangenyaka etema awo, Ndu iso ka ningialingia dundji diawo, La dia nde dia mbisha nyumu yawo wulu.

¹⁶ Etamba wa Latuyalaka watulutaka, Etamba a waki wa la Lebanona wakandune.

¹⁷ Leko katuhikaka fudu kefu yawo; Eki atuhikaka kefu kato lu etamba wʼetali la wa leko

¹⁸ Lu ekungu wʼetali watengolaka peli, Lʼatei ave katushamaka etumba.

¹⁹ Ndi akatungi ngondo dia nkahanya tena; Unya mbeyaka etena katuwudjaka.

²⁰ We atelaka udjima, ku vo watuyalaka utshu: Okone nyama ya lʼukunda yatengolaka;

²¹ Esongo wa tambwe watulelaka lʼokongo wa nyama, Watuyangaka ma diawo le Unyashungu.

²² Unya ambuhuto, ku yo mangana, Dia ntetama lu ahuli ayo watuyushamaka.

²³ Ku untu atutshokaka lʼulimu andi, Atukambaka edja ndu dikolo.

²⁴ Latuyalaka li, ndi elimu aye efula li! La yimba mbakayetungi tshe Kete yambulula too lʼekundji aye.

²⁵ Uhenda ashi a waki: Loko katokendakendaka diango diaheyama mbala, Ndu nyama ya tutshitshe ndu ya waki.

²⁶ Loko katokendakendaka mashua, Ndu shimiamba, lakayatungi dia ndi kenyaka loko.

²⁷ Nyama yako tshe yatulungamelaka le ye, Dia we mbasha ma lu tena diadio.

²⁸ We atuwashaka, ku vo watudiosaka. We atuknukulaka anya, ku vo watulutaka diango diʼololo.

²⁹ Lamʼatuyusheka elundji kaye, vo watukananaka. Lamʼatuyosaka nyumu yawo, vo watuvokaka, Watukadimoka ditshu ntu.

³⁰ We katutumaka lumu laye, mbatuwutungamaka; We katukadimulaka kete uyuyu.

³¹ Lutumbu la Latuyalaka latshikalaki pundju! Latuyalaka angenangenaki dia elimu andi!

³² Ndi atendaka kete, ku yo yatudidimaka. Ndi atunandaka ekungu, ku vo watututoka dinga.

³³ Dimi layimbelaka Latuyalaka esambu nshi tshe ya lumu lami, Layandulaka Unyashungu ami kamʼekimi la lumu.

³⁴ Tukanyi tʼutema ami tayali ololo le ndi! Dimi layongenangenaka le Latuyalaka.

³⁵ Atshi wa kolo washili la kete, Antu wa kolo tawuyalaki ntu! Utema ami, utumbuli Latuyalaka, Ee, nyutumbuli Latuyalaka!