Esambu 103 - La Bible en Otetela (Bible K'Ekila) 1991

Diandu le Latuyalaka ne Dia Etshoko Andi

¹ Utema ami, utumbuli Latuyalaka! Tshe keli lu lumu lami katumbuli lukumbu landi lʼekila!

² Utema ami, utumbuli Latuyalaka, Tuhelaki etsha wʼololo wa Latuyalaka,

³ One latukudimanyiyaka kolo yaye tshe, Ndu latokonoyaka hemo yaye tshe;

⁴ One latushimbelaka lumu laye uma lu Difuku, Latukulembeka dembo dia kusu dia ketshi la ngandji ka shikaa;

⁵ One latukunduyaka lu deku diaye la diango diʼololo, Latukukaluyaka wulu wakiye olongo a pami uku pungu.

⁶ Latuyalaka atutshaka ololo, Atusambwelaka asuyami tshe la elumbwelu kʼusimbwi.

⁷ Ndi akalimbitshiyaka Mose mbuka yandi, Ndu asi Isariyele etsha andi.

⁸ Latuyalaka keli kanga ketshi la ngandji ka mamba. Ndi huki kele esadi, ambulula too la ngandji ka shikaa.

⁹ Ndi hatudjaka lʼuntu tamu pundju, Kuyanga ntshikala la kele pundju.

¹⁰ Ndi hatututshelaka uku kolo yasu, Kuyanga ntufuta uku ehedia asu.

¹¹ Uku wanganyi ulungu la kete etali, Osoku mbeli ngandji kandi ka shikaa wuki le waku watuwukaka woma.

¹² Uku wanganyi ehutwelu la edjelu, Mbatundutanganyiyaka ehedia asu etali.

¹³ Uku atusambaka umbutshi anʼandi, Mbatusambaka Latuyalaka wane watuwukaka woma,

¹⁴ Ne dia ndi mbeyaka uma lu na akatatungama. Ndi atuhoka ati: Ditshu mbesu.

¹⁵ Untu, nshi yandi yeko uku adiyu, Atulaka uku dembo dia lʼusui.

¹⁶ Lamʼatopepaka lopepe ladiku adio, dio diatushishoka. Ku dihuli diakidio hadieyama ntu.

¹⁷ Keli ngandji ka shikaa ka Latuyalaka katutshikalaka pundju, pundju, Le waku watuwukaka woma, Ndu ololo andi pulu ndu le tukanula tawo;

¹⁸ Le waku watulamaka daka diandi, Ndu le waku watuhoka elembe andi dia mbekitanyia.

¹⁹ Latuyalaka akakitsha kiti kandi ka diulelu lʼulungu. Diulelu diandi dieli ladiku dia andja tshe.

²⁰ Nyutumbuli Latuyalaka, nyu andjelo andi! Nyu akanga a khudu utamanya, nyatutshaka aui andi, Nyatukitanyiyaka aui andi!

²¹ Nyutumbuli Latuyalaka, nyu lulimbilimbi landi tshe, Nyu ekambi andi watutshaka lulangu landi!

²² Nyutumbuli Latuyalaka, nyu ditungatunga diandi tshe, Lʼahuli tshe wa diulelu diandi! Utema ami, utumbuli Latuyalaka!