Esambu 102 - La Bible en Otetela (Bible K'Ekila) 1991

Delu lu Nshi ya Pa

¹ Latuyalaka li, uki dombelo diami, Etawo delu diami nkuma le ye!

² Tumbisheki elundji kaye lu lushi lami la pa! Uhuke tui, unungi, Lamʼaketami, umbetawo esadi.

³ Nshi yami yambeta uku lungi, Weka ami wambulungula uku efuki ka dja,

⁴ Utema ami wambokomwama, wambolengela uku adiyu; Lambuhela ndu nde ma.

⁵ Uma lʼakhumu ami wʼokei, Weka ami wambumamana la emunyi.

⁶ Dimi lambufana uku teki dia lʼusui, Lambuyala uku ekuki ka lʼusui wa shenga.

⁷ Dimi latendaka, lambuyala uku esole, Kuyadjasedi lʼulumbi a luudu.

⁸ Atunyi ami watomonyolaka la lushi la lushi, Wane watumpetshaka watuntshibaka.

⁹ Dimi latolekaka utuku uku ma, Latosohanyaka asoi la dinono diami,

¹⁰ Ne dia ududu aye la kele kaye. We akambedia, ku akambikadja.

¹¹ Nshi yami yatutaloka uku didjidji dia dikolo; Dimi lambolengela uku adiyu.

¹² Keli we Latuyalaka, atulelaka pundju, Euhwelu kaye kayutshikalaka lu nonga tshe.

¹³ We ayunela, ayuka Siona ketshi. Etena ka mbuka Siona ketshi ambukuka, Ee, etena kakayasonola ambukuka,

¹⁴ Ne dia ekambi aye watukaka ave wʼuma leko ngandji, Watulangaka ditshu dia kete diʼuma leko.

¹⁵ Asi wedja wayuka lukumbu la Latuyalaka woma, Ndu khumi ya dikanga tshe ya la kete lutumbu laye.

¹⁶ Latuyalaka ayuhika Siona. Ndi ayene lu lutumbu landi leko.

¹⁷ Ndi atulungaka dombelo dia amenyi fono, Hatutunaka dombelo diawo.

¹⁸ Dikambu so diafundami dia menya nonga yayayi, Ku antu wahatuto, wayandulaka Latuyalaka.

¹⁹ Ndi atendaka uma lʼedjaselu kandi kʼekila; Uma lʼulungu katendaka Latuyalaka kete,

²⁰ Dia mbuka tukuku tʼalelu wʼasi lukanu, Dia ntshungula wane wayanga ndjakema;

²¹ Dia antu nsanya dia lukumbu la Latuyalaka lu Siona, La dia diandu diandi lu Jerusalema,

²² Lamʼayusangana antu kame, Ndu waulelu dia ntemola Latuyalaka.

²³ Ndi akakitshakitsha wulu ami lu mbuka, Akasusi nshi yami.

²⁴ Dimi lakalombe nti: Unyashungu ami li, tombosaki lamʼeki nshi yami efula. We keli la deku diatuyalaka lu nonga tshe!

²⁵ We kakahiki etshina ka kete edjedja, Ndu ulungu eli ulimu wʼanya aye.

²⁶ Vo wayushisho, keli weme kayuyalaka; Vo tshe wayuyala esumbi uku emusu wʼahondo. We ayaengula uku dihondo, ku vo wayengwama.

²⁷ Keli we, we atutshikalaka pupu, Deku diaye kema la ekumelu.

²⁸ Ana wʼekambi aye wayudjaseka lu wudja awo pundju, La tukanula tawo wayushikikalaka la ntundu kaye.