Esambu 10 - La Bible en Otetela (Bible K'Ekila) 1991

Dombelo Dia Nanya Antu wa Kolo

¹ Latuyalaka li, ukundi emalave tshalula? Ukundi atuyushamaka lu nshi yʼasui?

² Uma lʼutaku a kanga kolo mbatundutshanyaka usi wula. Antu wa kolo watali vame lu tulunga takawambi.

³ Keli untu a kolo atuyasemaka lu dikambu dialanga utema andi. Kanga okomiya atotengaka ndu atonyolaka Latuyalaka.

⁴ Untu a kolo atutaka lʼutaku andi ati: Unyashungu hasomboya. Tukanyi tandi nshi tshe ati: Nduku Unyashungu weko.

⁵ Mbuka yandi yatuluwanaka tena tshe; Dumbwelu diaye diambumo etali uma lu ashu andi. Ndi atuhinwelaka atunyi andi tshe elomo.

⁶ Ndi atutaka lʼutema andi ati: Nduku lukuki minyami. Dimi hampumoki lukulu lʼengeno pundju!

⁷ Unyo andi ambulula too la didjelu dia mananu, la dimbiyelu dia lukesu. Usehi la akambu wa kolo weko la tshina dia lulimi landi.

⁸ Ndi atuhulamaka lasuki la ngelu. Atudiakaka untu laha la unungu lu dihuli dia usheshe. Ashu andi watendaka uhumbi dia mbutshela kolo.

⁹ Ndi atuhulamaka lu usheshe uku atuhulamaka tambwe lu difuku diato. Ndi atuhulamaka la ki dia munda uhumbi Atukunguswelaka, atudingitanyaka lʼotei andi.

¹⁰ Ndi atukutamaka, atunyamaka, Ku asi wula watokokaka lu anya andi wa wulu.

¹¹ Ndi atutaka lʼutema andi ati: Unyashungu ambuhela; Ndi mbisheka elundji kandi, hatendaka pundju.

¹² Latuyalaka li, uneli, Unyashungu li, edia lunya laye! Tuhelaki amenyi fono.

¹³ Okoko wana watonyolaka untu a kolo Unyashungu? Ukundi atundutaka lʼutema andi ati: We hosomboya?

¹⁴ We akenyi dikambu ne, ne dia we atenaka toshoko la asui. We ayemba wutshu awo lʼanya aye, Ne dia le ye katekamaka amenyi fono. We katukimanyiyaka etshiki.

¹⁵ Okole lunya lʼuntu a kolo; Usuya untu a kolo ne dia kolo yandi edja ndu yo yambushila.

¹⁶ Latuyalaka eli khumʼekanga pundju, pundju. Wedja wayushila ushiki uma lu kete yandi.

¹⁷ Latuyalaka, we atukaka nangu yʼakanga a djakitshakitsha. We atukikitshaka etema awo, we atuhukeka tui,

¹⁸ Dia nsambwela etshiki la usuyami, Dia untu lakatungama uma lu kete tayalaki la somboki ntu.