Enyelo 4 - La Bible en Otetela (Bible K'Ekila) 1991

Kiti ka Diulelu ka lʼUlungu

¹ Lamʼaketi akambu aso, dimi lakendi, ku lakenyi lukuki lambudiho lʼulungu. Diui dia ntundu diakamuki diaki uku diui dia pungi, diamvutela ati: Umbeli lindu ndjukenya akambu waya ka ndja.

² Kemʼedja dimi laki lu Nyuma. Dimi lakenyi kiti ka diulelu kukitshami lʼulungu, ndu untu udjashi loko.

³ One lakadjashi loko aki la elundji uku dive dia awadiawadi dia tilili. Ngulu kakatshimbi kiti ka diulelu kakangadimo uku dive diʼeleselese.

⁴ Kiti kina ya diulelu akumi ahendi la nyei yakadingi kiti kako ka diulelu. Dimi lakenyi dikumanyi akumi ahendi la nei wudjashi lu kiti yako, wolotshi ahondo a wema, wulimbe fule ya paunyi.

⁵ Angadimu wa ndjadi ndu aui wʼantu, ndu akhungula wakatumbaka uma lu kiti kako ka diulelu. Atala esambeli wakahetaka dja la ntundu ka kiti ka diulelu, weli nyuma esambeli ya Unyashungu.

⁶ La ntundu ka kiti ka diulelu kaki uku uduwa wa talatala, uku dive dia ngaingai ka mamba lʼatei a kiti ka diulelu. Lu etshimba ato kaki nyama nyei yaki la lumu, yaki la ashu etundu tshe, ndu la ntundu ndu lʼokongo.

⁷ Nyama ka ntundu kaki uku tambwe, ka hendi kaki uku osongo a ngombe, ka satu kaki la elundji uku ka untu, ka nei kaki uku fudu ka pungu katafumbo.

⁸ Nyama sho nyei yaki la ahafu asamalu asamalu. Yo yaki la ashu utundu tshe ndu lʼetei. Yo hayumuya kuyanga la yanyi kuyanga lʼutshu, yatutaka vati: Ekila, ekila, ekila, eli Khumadiondjo Unyashungu, Kanga-Wulu-Tshe, lakiko, leko, laya ka ndja.

⁹ Nyama yako yayutumbula, yayolemia, yayuka one latudjaseka lu kiti ka diulelu lusaka, leli la lumu pundju pundju.

¹⁰ Dikumanyi so akumi ahendi la nei wayukhusamela ako ludjashi lu kiti ka diulelu, wayotemola one leli la lumu pundju pundju. Vo wayukitsha alembo awo wa kusu wa diulelu la ntundu ka kiti ka diulelu, wata vati:

¹¹ Khumesu, la Unyashungu asu, we kukuki Dia nungula lutumbu la kenemo la wulu, Ne dia we kakatungi diango tshe. Dio diakatungama uma lu lulangu laye.