Enyelo 3 - La Bible en Otetela (Bible K'Ekila) 1991

Le Ekelizia ka la Saradi

¹ Ufundeli ondjelo wʼekelizia ka la Saradi wati: One leli la nyuma esambeli ya Unyashungu ndu la toto esambeli kata aui ane: Dimi mbeyaka etsha aye. We eko la lukumbu uku untu lasena, keli we ambuvokaka.

² Ewoki, ushikike akambu wutshikadi wuyangi mvo, ne dia dimi kuntana etsha aye wuluwanyimi lu ashu a Unyashungu ami.

³ Uho okone akayetawo, ndu akayuki. Ukitanyiaki akambu aso; ukadimuli utema. Naka we hewo, dimi layuya uku uvi; we heya etena kayumuya.

⁴ Keli we eko la kumbu yʼantu amotshi la Saradi, wahatalanya ahondo awo. Vo wayengola la mi wolotshi ahondo a wema, ne dia vo mbukuki ololo.

⁵ Okone one laleka akambu wa kolo wulu, ayolotshama ahondo a wema. Dimi haludimula lukumbu landi uma lu mukanda a lumu, keli layushula lukumbu landi lu ashu wa Papa, ndu wa andjelo andi.

⁶ One leli la tui, uki okone atela Nyuma ekelizia.

Le Ekelizia ka la Filadelefiya

⁷ Ufundeli ondjelo wʼekelizia ka la Filadelefiya wati: One leli ekila, leli mete, leli la sapi ka Davidi, latudihulaka, ku nduku untu ladiha; latudihaka, ku nduku untu latudihulaka, kata aui ane.

⁸ Dimi mbeyaka etsha aye. Ulungi, dimi lambuketela lukuki hwe, nduku untu leya ludiha. We la yema ya wulu, akakitanyiaka diui diami, kumanguna lukumbu lami.

⁹ Enda, dimi lambukusha wa lʼetemwelo ka Satana, wane watutaka vati: Asi Juda mbesu, keli vo kema asi Juda, kashi katawo. Ulungi, dimi layuwaela dia vo ntemola lʼekulu aye, la dia vo mbeya vati: Dimi lambukulanga.

¹⁰ Ne dia we akakitanyia diui diʼetetemalu kami, dimi layukulama uma lu unya uku wʼehimba, wayuyala le wa la kete tshe, ne dia mpimba wane wudjashi la kete.

¹¹ Dimi layuya esadi. Ukimeli keli la ye wulu, untu takokosolaki dembo diaye dia kusu.

¹² One laleka akambu wa kolo wulu, dimi layuwete uku ekoho ka lu etemwelo ka Unyashungu ami; ndi hatumbi uma loko pundju. Ku dimi layufunda lukumbu la Unyashungu ami lu dimba diandi, ndu lukumbu la usumba wa Unyashungu ami, Jerusalema yʼuyuyu, yayuya uma lʼulungu uma le Unyashungu ami, ndu lukumbu lami lʼuyuyu

¹³ One leli la tui, uki okone atela Nyuma ekelizia.

Le Ekelizia ka la Laodikiya

¹⁴ Ufundeli ondjelo wʼekelizia ka la Laodikiya wati: Ayali osoku! Omenyi wa kolamelu la mete, etatelu kʼetungelu ka Unyashungu, kata aui ane.

¹⁵ Dimi mbeyaka etsha aye nti: We kema tshitshi, kema dja. Utumulanga ku we ndjala tshitshi kuyanga dja.

¹⁶ Okone ne dia we eko djungudungu, aha dja, aha tshitshi, dimi layukohongola uma lʼunyo ami.

¹⁷ Ne dia we kata wati: Kanga ongonyi kemi, lambukundja ukundji, hahumbi nduku engo. We heyi wati: Kanga lunyangu keye, ndu okei ndu wula, ndu tshungu, ndu utakataka.

¹⁸ Okone dimi lambukutela nti: Usumbi paunyi le mi yakawalongosola la dja, dia we ndjala kanga ongonyi; ndu ahondo wa wema, wa ndota, sonyi ka utakataka aye katukenama; ndu iso ka mbidja lu ashu, dia we nsena.

¹⁹ Dimi latulakaka, latusuyaka wane wukami ngandji. Okone ukalangani, ukadimuli utema.

²⁰ Enda, dimi lambemala la suku, lambokokola. Lamʼayuka untu diui diami, lamʼayundudihula lukuki, dimi layoto le ndi, layole la ndi, ndu ndi ayole la mi.

²¹ One laleka akambu wa kolo wulu, dimi layuwusha wulu wa ndi mbidjase la mi lu kiti ka diulelu, uku akamaleki akambu wa kolo wulu, akamadjase la Papa lu kiti kandi ka diulelu.

²² One leli la tui, uki okone atela Nyuma ekelizia.