Enyelo 21 - La Bible en Otetela (Bible K'Ekila) 1991

Ulungu wʼUyuyu la Kete yʼUyuyu

¹ Dimi lakenyi ulungu wʼuyuyu la kete yʼuyuyu; ne dia ulungu wa ntundu la kete ya ntundu wakadimana, kundjala ashi a wuki ntu.

² Dimi lakenyi usumba wʼekila, Jerusalema yʼuyuyu, wayahulo uma lʼulungu, uma le Unyashungu, wolongoswami uku utshukami wuyalengi dia ntsho le umendi.

³ Ku lakuki diui dia wulu uma lu kiti ka diulelu diata ati: Enda, edjaselu ka Unyashungu keko lʼatei wʼantu! Ndi ayudjase la wo, ku vo wayuyala antu andi. Unyashungu ndame ayuyala la wo, ndu ayuyala Unyashungu awo.

⁴ Ndi ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji. Akambu wa ntundu wambushila.

“Dimi Lambete Diango Tshe Eyuyu”

⁵ One lakadjashi lu kid ka diulelu akati ad: Ulungi, dimi lambete diango tshe eyuyu. Ndi akati ati: Ufundi, ne dia aui ako weli kolamelu la mete.

⁶ Ku ndi akamvutela ati: Akambu ako wambutshama! Alafa la Omenga mbemi, etatelu la ekumelu. One leli la pusa, dimi layetawo dia ndi no lʼushima wʼashi a lumu onono.

⁷ One layuleka akambu wa kolo wulu, ayusangula diango ne! Dimi layuyala Unyashungu andi, ku ndi ayuyala onʼami.

⁸ Keli akanga a woma, ndu waha la mbetawo, ndu wa kolo, ndu andjakanyi, ndu akanga a munanyi, ndu akanga wʼaloka, ndu atemodi wa dikishi, ndu akanga a kashi tshe, sangu diawo diayuyala lʼeduwa ka dja la mboko ya dja. Nyoi ka hendi keso.

Jerusalema yʼUyuyu

⁹ Ondjelo omotshi wʼesambeli aki la akoho esambeli wʼasui esambeli wa ndjihelu akayi. Ku ndi akamvutela ati: Yaka! dimi layukenya umuntu lutshukami le Ona-Okoko.

¹⁰ Ku ndi akantole lu Nyuma lʼukungu a wuki wʼutali, akamenya usumba wʼekila, Jerusalema, wayahulo uma lʼulungu, uma le Unyashungu,

¹¹ waki la lutumbu la Unyashungu, wakalingalinga uku dive dia awadi awadi, dia wema pesopeso uku talatala.

¹² Vo waki la lukumbu la wuki ndu utali; waki la kuki dikumi la hyendi, la andjelo dikumi la ahendi wemadi lu asuku ako. Kumbu ya wauhu wa Isariyele dikumi la ahendi yakafundami loko.

¹³ Lu leke lʼehutwelu, kuki shatu; la ngelʼa kushi, kuki shatu; la diku dia kushi, kuki shatu; lu leke lʼedjelu, kuki shatu.

¹⁴ Lukumbu lʼusumba laki la atshina dikumi la ahendi, ndu kumbu dikumi la hyendi ya atumami dikumi la ahendi wa Ona-Okoko yufundami loko.

¹⁵ One lakateketa la mi aki la yediko uku lokombe la paunyi dia mbedika usumba, ndu kuki yawo, ndu lukumbu lawo

¹⁶ Beke diʼusumba diaki nei, diedimi: utali awo aki uku wekeki awo. Ndi akedika usumba la lokombe, yediko yawo yaki kilometere nunu pendi la kama nyei. Utali la wekeki, la utali utsha lʼulungu waki pupu.

¹⁷ Ku ndi akedika lukumbu lawo: aboko akumi asatu la asamalu, uku weli yediko yʼutali wʼuntu, ndu wa ondjelo.

¹⁸ Wakahiki peli dia lukumbu la ave wa awadi awadi; wakahiki usumba la paunyi tshu, uku talatala tshu.

¹⁹ Atshina wa peli dia lukumbu lʼusumba wakasangema la wehu tshe wʼave wʼushinga a wulu. Tshina dia ntundu diaki la dive dia awadi awadi; dia hendi diaki udima; dia satu diaki ehemahema; dia nei diaki eleselese;

²⁰ dia tanu diaki ebelabela; dia samalu diaki tilili; diʼesambeli diaki ekesekese; diʼenanei, diaki etukutuku; dia divwa diaki endondo; dia dikumi diaki esukusuku; dia dikumi la otoi diaki edimadima; dia dikumi la ahendi diaki engingi.

²¹ Kuki dikumi la hyendi yaki ya mboko yʼakeso dikumi la hyendi. Lukuki la lukuki laki lowoko la dikeso lutu. Osese wʼusumba aki wa paunyi tshu, yufanyi la talatala keene wedi ukina.

²² Dimi komena etemwelo loko, ne dia Khumadiondjo Unyashungu Kanga-Wulu-Tshe, la Ona-Okoko weko etemwelo kawo.

²³ Usumba kumpumba unya kuyanga ngondo dia mpeta loko, ne dia lutumbu la Unyashungu lakahete loko, Ona-Okoko eko tala diawo.

²⁴ Wedja wayokendakenda lʼusasi andi. Khumi ya dikanga ya la kete wayuya leko la lutumbu lawo.

²⁵ Hawudiha kuki la yanyi — ne dia utshu huyala loko.

²⁶ Wayuya loko la lutumbu la kenemo ka wedja.

²⁷ Engo kʼanyanya, kuyanga utshi wʼakambu wa kolo, kuyanga kanga kashi, hoto loko! Keli paka wane wufundami lu buku dia lumu dia Ona-Okoko!