Enyelo 20 - La Bible en Otetela (Bible K'Ekila) 1991

Wambukeleka Satana

¹ Dimi lakenyi ondjelo ayahulo uma lʼulungu aki la sapi ka lukuki la difuku diaha la ekumelu, la molola a wuki lu lunya landi.

² Ndi akandi ului a wuki wʼedjedja, eli Uhimbanyi, Satana ndame, akukeleka deku kinunu;

³ akawudji lu difuku diaha la ekumelu, akadihi lukuki, akakitsha djimbitelu loko, dia ndi takesaki wedja ntu, edja ndu lamʼayushila deku kinunu diako. Lʼokongo wa deku so, dieli la ndi dia ntshungwama yema.

Diulelu Dia Kristu la Ekilami Andi

⁴ Dimi lakenyi kiti ka diulelu, vo wakadjase loko, wakawasha wulu wa numbuya antu. Dimi lakenyi nyuma ya wane wakahimbwama ete ne dia diui dia Jesu ndu dia diui dia Unyashungu, wane waki kontemola nyama kako, kuyanga efanelu kato, waki kombosa djimbitelu yato lu fumu yawo ndu lʼanya awo. Vo wakayala la lumu, ndu vo wakulela kame la Kristu deku kinunu.

⁵ Akina wakavu kundjala la lumu, edja ndu lamʼakashili deku kinunu diako. Oso eli eulwelu ka ntundu kʼuma lu nyoi.

⁶ Wane wakulo uma lu nyoi lu eulwelu ka ntundu, weko la otshoko ndu ekila! Nyoi ka hendi huyala wulu le wo, keli vo wayuyala elombedi wa Unyashungu la wa Kristu; vo wayulela kame la ndi deku kinunu.

Wambukimo Satana

⁷ Lamʼayushila deku kinunu diako, vo wayukimo Satana uma lu lukanu lene akindi.

⁸ Ndi ayutumba dia ndjukesa wedja wa lʼatshuku anei wa kete, ayeta Ngongo la Mangongo dia mbasanganya, dia ndo ta. Vo tshe weko efula uku lokongo la lʼumamu wʼashi a wuki.

⁹ Ku vo wakambela lʼutundu a kete, wakadingi pangu kʼekilami, ndu usumba wakalangema. Dja yakahulo uma lʼulungu, yakatshumbi.

¹⁰ Ku uhimbanyi lakakesaka, akadjama lʼeduwa ka dja, ndu mboko ya dja, lene aki nyama kako la umvutshi ako a kashi. Vo wayusuyama ndu yanyi ndu utshu pundju pundju.

Elumbwelu kʼEkumelu

¹¹ Dimi lakenyi kiti ka wuki ka wema ka diulelu, ndu one lakadjashi loko; ulungu la kete wakamo uma lu ashu andi. Dihuli diawo kuntanema ntu.

¹² Ku dimi lakenyi antu wakavu, wa waki ndu wa tshitshe, wemadi la ntundu ka kiti ka diulelu; wakafula abuku. Ku wakafula buku dikina, diaki buku dia lumu. Wakalumbuya antu wakavu uma lʼakambu wakafundama lu abuku, uku waki etsha awo.

¹³ Ashi a waki wakatundja edu waki loko; ndu Nyoi la Udimu a Pengandu wakatundja edu waki loko. Wakalumbuya untu lʼuntu uku aki etsha andi.

¹⁴ Wakakadja Nyoi la Udimu a Pengandu lu eduwa ka dja. Nyoi ka hendi kako keli eduwa ka dja!

¹⁵ Naka komena lukumbu lʼuntu lufundami lu buku dia lumu, keti wakawukadja lʼeduwa ka dja.