Enyelo 19 - La Bible en Otetela (Bible K'Ekila) 1991

Usambu wa Diandu Uma lʼUlungu

¹ Lʼokongo wʼakambu aso, dimi lakuki uku diui dia ului a wuki wʼantu lʼulungu wata vati: Nyanduli Latuyalaka! Panda la lutumbu, ndu wulu weko wa Unyashungu,

² Ne dia dumbwelu diandi dieko usimbwi la mete! Ndi akalumbuya umuntu kanga luseka la mamba, Lakalanya kete kʼutundu la munanyi kandi. Ndi akosomboya dia dikila diʼekambi andi.

³ Vo wakati etena ka hendi vati: Nyanduli Latuyalaka! Dinga diato diambumbela pundju pundju.

⁴ Ku dikumanyi akumi ahendi la nei la nyama nyei wakakhusama, wakatemola Unyashungu ludjashi lu kiti ka diulelu, wata vati: Ayali osoku! Nyanduli Latuyalaka!

⁵ Ku diui diakatumbi uma la tshina dia kiti ka diulelu, diakati ati: Ekambi wa Unyashungu tshe, wane watuwukaka woma, Wa tshitshe ndu wa waki, wanduli Unyashungu!

⁶ Dimi lakuki uku diui dia ului a wuki wʼantu, uku dihelela diʼashi efula, ndu uku akhungula a wulu, diata ati: Nyanduli Latuyalaka! ne dia Khumadiondjo Unyashungu, Kanga-Wulu-Tshe, ndi ambulela.

⁷ Tongenengene, tuyali la ongenongeno utamanya; Ne dia diwala dia Ona-Okoko diambuyala, Wadendi akayalongosodi.

⁸ Wakasha umuntu dia ndi ndota Dihondo dia linene dia ngaingai la pesopeso — Dihondo diako dia linene dieli etsha wʼololo wʼekilami.

⁹ Ndi akamvutela ati: Ufundi wati: Wane waketama lu dambu dia tshuki dia Ona-Okoko, weko la otshoko. Ku ndi akamvutela ati: Aui wa mete wa Unyashungu ane.

¹⁰ Ku dimi lakûkhusamela dia mbotemola. Ku ndi akamvutela ati: Tutshaki wuhu uku. Dimi leko unyaye ukambi ndu onanyo, la wane watukitanyiaka diui dia Jesu. Otemole Unyashungu, ne dia diui dia Jesu dieko nyuma yʼaui wa amvutshi.

Diui Dia Unyashungu Diambene

¹¹ Dimi lakenyi ulungu ambudiho, menyi ku falasa ka wema kene! One lakakiahemi, aketama ati: Kanga Kolamelu la Mete; lu ololo andi mbatundulumbuyaka antu mbatundolokaka la wo ta.

¹² Ashu andi waki uku lumbi la dja; ndi aki la alembo wa kusu efula lʼote andi. Ndi aki la lukumbu lufundami lu dimba, layaeyandi ndame utu.

¹³ Ndi akalote dihondo diakawamonge dikila. Lukumbu landi leli Diui dia Unyashungu.

¹⁴ Elui wʼalimbi tshe wa lʼulungu wakuyeli lʼokongo, wahemi falasa ya wema, wolotshi ahondo wʼamena wa linene wa wema la uluwanyi.

¹⁵ Yombo ya diesa yakatumbi uma lʼunyo andi, dia ndi yikota wedja. Ndi ayuwaulela la ukalimba a luwulu. Ndi ayukamakamela diango dieli lʼetuli ka kele ka wulu ka Unyashungu Kanga-Wulu-Tshe.

¹⁶ Ndi aki la lukumbu lufundami lu dihondo diandi la lu ehelohelo kandi ati: “Khumʼekanga ka Khumi ya Dikanga ndu Khumi ka Wakhumi.”

Wambeta Fudu lu Dambu

¹⁷ Dimi lakenyi ondjelo emadi lu unya. Ndi akahangohango la diui dia wulu le fudu tshe yafumbo lʼulungu ati: Nyuyi, nyusangani lu dambu dia wuki dia Unyashungu;

¹⁸ dia nyu ndjole emunyi wa khumi ya dikanga la wa elombodi wʼalimbi, la wʼakanga a wulu, la wa falasa la wane wuyahemi, ndu wʼantu tshe, wuyadjasedi ndu wa fumbi, ndu wa antu wa tshitshe, ndu wa waki.

¹⁹ Dimi lakenyi nyama kako la khumi ya dikanga ya la kete ndu elui awo wʼalimbi, wakasangana dia ndosha one lakahemi falasa, ndu elui andi wʼalimbi.

²⁰ Wakandi nyama kako, ndu umvutshi ato a kashi watutshaka tulimbitelu lu ashu ato, takandakesaka antu wakose djimbitelu ya nyama kako la wakatemolaka efanelu kato, wakawadji vo ahendi esenyu lʼeduwa ka dja yaheta la mboko ya dja.

²¹ Wane wakatshikala, wakadiakema la yombo ya one lakahemi falasa. Yombo yako yakatumbi uma lʼunyo andi, ku fudu tshe yakaluti emunyi awo.