Enyelo 16 - La Bible en Otetela (Bible K'Ekila) 1991

Etumelu kʼAndjelo

¹ Dimi lakuki diui dia wulu uma lʼetemwelo, diakatela andjelo esambeli ati: Nyutshu, nyututshululi akoho esambeli wa kele ka Unyashungu utsha la kete.

Wambutshulula Kene Kaki lu Dikoho Dia Kele la Kete

² Ondjelo a ntundu akatshu, akatshulula kene kaki lu dikoho diandi utsha la kete. To kakayala puta ya waki ya kolo le antu waki la djimbitelu ya nyama ndu wakatemolaka efanelu kato.

Ndu lu Ashi a Wuki

³ Ondjelo a hendi akatshulula kene kaki lu dikoho diandi lu ashi a wuki. Ashi wakayala uku dikila diʼudu; ku diango tshe dia lumu dia lu ashi diakavu.

Ndu lu Kushi

⁴ Ondjelo a satu akatshula kene kaki lu dikoho diandi lu kushi ndu lu teko diʼashi. Ashi ako wakahilo dikila.

⁵ Ku dimi lakuki ondjelo wʼashi ata ati: We keli ololo, keko, kakiko, we lʼEkila, Ne dia we akalumbula okone!

⁶ Ne dia vo wakatshulula dikila dia Ekilami ndu dia amvutshi, We akawasha dikila dia vo no. Vo mbukuki dino!

⁷ Ku dimi lakuki ediakelu kata ati: Elu, Khumadiondjo, Unyashungu, Kanga-Wulu-Tshe, Dumbwelu diaye dieko mete la ololo!

Ndu lu Unya

⁸ Ondjelo a nei akatshulula kene kaki lu dikoho diandi lu unya, wakawusha wulu wa ntshumba antu dja.

⁹ Antu wakatshumbama lu luhaladi la wulu, wakatenge lukumbu la Unyashungu leli la wulu ladiku dia asui ako. Vo kunkadimula etema dia mbutumbula.

Ndu lu Kiti ka Diulelu ka Nyama

¹⁰ Ondjelo a tanu akatshulula kene kaki lu dikoho diandi lu kiti ka, diulelu ka nyama. Diulelu diato diakayala udjima. Vo wakatome nimi yawo ne dia kandji,

¹¹ wakatenge Unyashungu a lʼulungu, ne dia kandji yawo ndu dia puta yawo. Vo kunkadimula etema dia etsha awo.

Ndu lu Eyufarate

¹² Ondjelo a samalu akatshulula kene kaki lu dikoho diandi lu ndjali ka wuki ka Eyufarate; ashi wa loko wakumi, ne dia nongoswela khumi ya dikanga yatuyakaka uma lʼehutwelu ka unya mbuka.

¹³ Ku dimi lakenyi nyuma shatu yufanyi la dipuli, yatumba uma lʼunyo wʼului a wuki, ndu uma lʼunyo a nyama, ndu uma lʼunyo wʼumvutshi a kashi.

¹⁴ Yo yaki nyuma ya edienge yatutshaka tulimbitelu yatutshokaka le khumi ya dianga ya kete tshe, ne dia mbasanganya dia ndosha lushi la wuki la Unyashungu, Kanga-Wulu-Tshe, ta.

¹⁵ (Nyulungi, dimi layuya uku atuyakaka uvi. Untu lasena, latulamaka ahondo andi, ne dia atukokendakenda utakataka, ne dia watukena sonyi kandi, eko la otshoko!)

¹⁶ Wakasanganya lu dihuli dietawo lʼoteketa wʼasi Heberu vati: Aramangedona.

Ndu lu Loheledi

¹⁷ Ondjelo wʼesambeli akatshulula kene kaki lu dikoho diandi lu loheledi. Ku diui dia wulu diakatumbi uma lʼetemwelo, uma lu kiti ka diulelu diakati ati: Ambutshama!

¹⁸ Angadimu wa ndjadi, ndu aui wʼantu, ndu akhungula wakayala. Kete yakadidima wulu; yo kundjidima efula la wulu osoku lamʼaki antu la kete.

¹⁹ Usumba ako a wuki wakatana beke satu, ku esumba wa wedja ekina wakanyuko. Unyashungu akuho Babilona ka wuki, dia ndi mbonosha dikoho dia wanu la dia wulu la kele kandi.

²⁰ Ndu asenga tshe wakamo, ndu ekungu komenama.

²¹ Ndu mboko ya waki ya mvula, yakakwela antu uma lʼulungu. Wutshu a lowoko otoi laki wutshu uku talata otoi. Antu wakatenge Unyashungu ne dia fono ka mboko ya mvula, ne dia fono kayo kakaleki wulu.