Enyelo 14 - La Bible en Otetela (Bible K'Ekila) 1991

Ona-Okoko lʼUkungu a Siona

¹ Dimi lakendi, menyi ku Ona-Okoko emadi lʼUkungu a Siona, ndu antu nunu lukama la akumi anei la nei waki la lukumbu landi, la lukumbu la Shi lufundami lu fumu yawo.

² Ku dimi lakuki diui uma lʼulungu, uku dihelela diʼashi efula, ndu uku diui dia dikhungula la dia wulu. Diui diakamuki diaki uku diui dia ampumi a sese wahuma sese yawo.

³ Vo wakimbi usambu wʼuyuyu la ntundu ka kiti ka diulelu, ndu ka nyama nyei, ndu ka dikumanyi. Nduku untu lakeyi mimba usambu ako, paka antu nunu lukama la akumi anei la nei, wane wakatshungwama uma la kete.

⁴ Vo kumunana la amantu, ne dia vo weko uku amantu wa dimuma. Vo mbatuyelaka Ona-Okoko lu ahuli tshe watshondi. Vo wakasumbama uma lʼatei wʼantu, ne dia ndjala elua wa ntundu le Unyashungu ndu le Ona-Okoko.

⁵ Vo kuntana kashi lʼenyo awo, ne dia vo kema la kolo.

Aui Uma lʼUlungu

⁶ Dimi lakenyi ondjelo ukina afumbo lʼulungu, aki la lukumu lʼololo la pundju, lakandatelaka wa la kete, ndu wedja tshe ndu wauhu tshe ndu eteketa tshe, ndu antu tshe.

⁷ Ndi akati la diui dia wulu ati: Nyuki Unyashungu woma, nyutumbuli, ne dia unya andi wʼelumbwelu ambukuka. Nyotemole one lakatungi ulungu la kete la ashi a wuki la teko diʼashi.

⁸ Ondjelo ukina a hendi, akuyeli, ata ati: Babilona ka wuki kambunyuko, kambunyuko kene kakanoshaka waulelu tshe wanu wa kele kʼakambu wa munanyi yato!

⁹ Ku ondjelo ukina a satu akâyeli ata la diui dia wulu ati: Naka untu ayotemola nyama kako la efanelu kato, ndu ayulungula djimbitelu lu fumu kana lu lunya landi,

¹⁰ ndi ayono ndu wanu wa kele ka Unyashungu, wakawalongosola lu dikoho dia kele kandi aha la diango dikina. Ndi ayusuyama la dja ya tsho la ntundu ka andjelo wʼekila ndu la ntundu ka Ona-Okoko.

¹¹ Dinga dia fono kawo diatumbelaka pundju pundju. Wane watotemolaka nyama kako ndu efanelu kato, ndu wakose djimbitelu ya lukumbu lato, vo kema la mumuya la yanyi ndu lʼutshu.

¹² Lanʼeli etetemalu kʼekilami, wane watukitanyiaka elembe a Unyashungu la mbetawo ka Jesu.

“Wane Wavo le Khumadiondjo Weko la Otshoko”

¹³ Dimi lakuki diui uma lʼulungu diata ati: Ufundi wati: Wane wavo le Khumadiondjo weko la otshoko kakiane ndu pundju. Nyuma kata ati: Vo wayumuya uma lʼelimu awo, ne dia etsha awo wambayela!

¹⁴ Dimi lakendi, menyi ku dingi dia wema; lakenyi untu lufanyi la onʼa untu udjashi lu dingi diako. Ndi aki la dembo dia kusu lʼote andi, la lukuwa la diesa lu lunya landi.

¹⁵ Ondjelo ukina akatumbi uma lʼetemwelo, ahangohango la diui dia wulu le one lakadjashi lu dingi ati: Utumi lukuwa laye, utuni diango, ne dia Iushi la muna lambukuka! ne dia diango dia dinela dia kete diambela.

¹⁶ Ku one lakadjashi lu dingi akakadja lukuwa landi utsha la kete, ku diango dia la kete diakanama.

Etuli ka Mamula ka Kele ka Unyashungu

¹⁷ Ondjelo ukina akatumbi uma lʼetemwelo ka lʼulungu, ndu ndi kaki la lukuwa la diesa.

¹⁸ Ondjelo ukina akatumbi uma lʼediakelu, ndi kaki umbuledi wa dja. Ndi akahangohango la diui dia wulu le one laki la lukuwa ati: Utumi lukuwa laye la diesa, usanganya sandji diʼelua wʼekodi wa wa la kete, ne dia elua andi wambela tshe.

¹⁹ Ku ondjelo akakadja lukuwa landi la kete, akasanganya elua wa la kete, akawekadja lu etuli ka wuki ka mamula ka kele ka Unyashungu.

²⁰ Wakamula diango lu etuli lʼandja wʼusumba, ku dikila diakatumbi uma loko, diakambela edja ndu lu molola weli lʼete wa falasa, edja ndu kilometere kama shatu la akumi ahendi.