Enyelo 13 - La Bible en Otetela (Bible K'Ekila) 1991

Nyama Kayatumbi Uma lʼAshi

¹ Ndi akemala lu lokongo lʼashi a wuki. Ku dimi lakenyi nyama kayatumbi uma lʼashi a wuki, kaki la seki dikumi la ete esambeli; ndu ladiku dia seki yawo, alembo a kusu dikumi, ndu lʼete awo, kumbu ya lotengo.

² Nyama kakamenyi, kaki uku koi; ekulu ato waki uku wa tnbulu, unyo ato waki uku wa tambwe. Ului ako a wuki akawusha wulu awo, la kiti kawo ka diulelu, la diulelu efula.

³ Ku dimi lakenyi ote awo omotshi, wakakotama puta ka nyoi. Puta keso ka nyoi kakakono. Wa la kete tshe wakambi ne dia nyama kako.

⁴ Antu wakatemola ului, ne dia vo wakasha nyama kako wulu. Ku vo wakatemola nyama, wakati vati: Akona eh uku nyama kene? Eya ndo la to na?

⁵ Wakasha nyama unyo wa to nsema la ntenga Unyashungu, ndu wulu wa to ntshikala ngondo akumi anei la hyendi.

⁶ Ku to kakafula unyo ato atenga Unyashungu, ndu lukumbu landi, ndu edjaselu kandi, ndu wane wudjashi lʼulungu.

⁷ Wakawusha wulu wa ndosha ekilami ta, ndu wa mbâlembia. Wakawusha wulu wa mbulela wauhu tshe ndu antu tshe ndu eteketa tshe ndu wedja tshe.

⁸ Ku wa la kete tshe waha la kumbu yawo yufundami lu buku dia lumu dia Ona-Okoko, lakadiakema lʼetatelu ka kete, wayotemola nyama kako.

⁹ Naka untu eko la tui, ndi uki.

¹⁰ Naka untu eko la dia mundama lu fumbi, Dieli la ndi dia ntsho lu fumbi. Naka untu ambudiaka untu la yombo, Dieli la ndi dia ndjakema la yombo. Dikambu so mbeli leta lʼetetemalu la mbetawo ka ekilami.

Nyama Kayatumbi Uma la Kete

¹¹ Dimi lakenyi nyama kekina kayatumbi uma lu kete. To kaki la seki hyendi uku ona okoko, kakateketa uku ului a wuki.

¹² To kaki la wulu tshe wa nyama ka ntundu lu ashu ato. To kambete kete tshe ndu wane watudjaseka loko, dia vo ntemola nyama kako ka ntundu, kene kaki la puta ka nyoi kakakono.

¹³ To katutshaka tulimbitelu ta mamba efula, ne dia mpuluya dja uma lʼulungu uya la kete lu ashu wʼantu.

¹⁴ To katukesaka wa la kete ne dia tulimbitelu takawawusha dia ntsha lu ashu wa nyama kako, atela wa la kete ati: Nyutshi efanelu ka nyama kako, kaki la puta ka yombo, keli kakatshikala la lumu.

¹⁵ Wakawusha wulu wa mbidja lumu lʼefanelu ka nyama kako, ne dia efanelu ka nyama kako katekete, ndu ne dia ndjakia antu tshe wahatemola efanelu ka nyama kako.

¹⁶ Ndi akadji olembe dia antu tshe, ndu wa tshitshe ndu wa waki, ndu akanga wʼengonyi, ndu akanga a weula, ndu wane wuyadjasedi ndu fumbi dia vo nungula untu lʼuntu djimbitelu lu lunya landi la pami, kana lu fumu kandi;

¹⁷ la dia untu teyaki nsumba kana nsundja, paka one leli la djimbitelu ku ya lukumbu la nyama kako kana numero ka lukumbu lato.

¹⁸ Yimba nye. One leli la yimba, ali numero ka nyama kako, ne dia to keli numero kʼuntu omotshi. Numero kato keko kama shamalu la akumi asamalu la asamalu.