Enyelo 11 - La Bible en Otetela (Bible K'Ekila) 1991

Akambu Wayuyala lʼUsumba la lu Etemwelo; “Emenyi Ehendi”

¹ Vo wakambisha lokombe laki uku danga. Omotshi akamvutela ati: Unela, ediki etemwelo ka Unyashungu, ndu ediakelu; ali wane watemola loko.

² Utshiki seke dieli lʼandja wʼetemwelo, tudiedikaki, ne dia wakadisha wedja. Vo wayukamela usumba wʼekila la tshina diʼekulu ngondo akumi anei la hyendi.

³ Dimi layusha emenyi ami ehendi wulu wa mvuta diui nshi kinunu la kama hyendi la akumi asamalu, wolotshi akuniya.

⁴ Wane weko eweli ehendi, la dikitshelu pendi diʼatala, mbemadi la ntundu ka Khumadiondjo ka kete.

⁵ Naka untu ayulanga mbatshela kolo, dja yayutumba uma lʼenyo awo, yayutshumba atunyi awo. Naka untu ayulanga mbatshela kolo, dieli la ndi dia ndjakema osoku.

⁶ Wane weko la wulu wa ndjiha ulungu, ne dia mvula talokaki lu nshi yatelawo antu diui vo mbeli la wulu wa mpilula ashi dikila ndu wa nanya wa la kete la asui tena efula uku alangawo.

⁷ Lamʼayuwushidiya mvuta diui diawo, nyama katutumbaka uma lu difuku diaha la ekumelu ayuwalosha ta, ayaleka wulu, ayadiaka.

⁸ Edu awo wayukalema lʼosese wʼusumba a wuki, wetawo lʼetema vati: Sodoma la Edjibitu, lene akawadiaki Khumadiondjo lʼutamba a mpeketanya.

⁹ Uma lu weuhu wʼantu ndu wa wauhu, ndu wa eteketa, ndu wa wedja wayendaka edu awo nshi shatu lʼetenyi, hawetawo edu awo nkhundama lu waumbu.

¹⁰ Wa la kete wayongenangena dikambu diawo, wayokenya; wayutumanela eshasha, ne dia amvutshi aku ahendi wakasuyaka wa la kete.

¹¹ Lʼokongo a nshi shatu sho la etenyi, nyuma ka lumu uma le Unyashungu kakoto lʼetema awo, ku vo wakemala lʼekulu awo. Woma wa mambaakandi wane wakawaendaka.

¹² Vo wakuki diui dia wuki uma lʼulungu diawatela ati: Nyumbeli lindu! Ku vo wakambela lʼulungu lu dingi. Atunyi awo wakawaenyi.

¹³ Lʼushidi oso, kete yakadidima wulu, ku etenyi ka dikumi kʼusumba ako akanyuko. Antu nunu esambeli wakavu lamʼakadidima kete. Wane wakatshikala, wakuki woma, wakatumbula Unyashungu a lʼulungu.

¹⁴ Fono ka hendi kakashili. Enda, fono ka satu kayuya esadi.

Ondjelo wʼEsambeli Ambuda Pungi

¹⁵ Ondjelo wʼesambeli akadi; ku aui wa wulu wakukema lʼulungu, wakati vati: Diulelu dia la kete nye diambuyala dia Khumesu, la dia Kristu kandi. Ndi ayulela pundju pundju.

¹⁶ Ku dikumanyi akumi ahendi la nei, watudjaseka la ntundu ka Unyashungu lu kiti yawo ya diulelu, wakakhusama, wakatemola Unyashungu,

¹⁷ wata vati: Shu tambuka lusaka, we Khumadiondjo Unyashungu kanga wulu tshe, leko ndu lakiko; Ne dia we akose wulu aye wa mamba, ku akatatela mbulela.

¹⁸ Wedja ekina wakuki kele, ku kele kaye kakayi, Ndu lushi la numbuya wane wakavu, Ndu lushi la nfuta ekambi aye amvutshi ndu ekilami, Ndu wane watukaka lukumbu laye woma, Wa tshitshe ndu wa waki; Ndu dia nanya wane watulanyaka kete.

¹⁹ Etemwelo ka Unyashungu a lumu lʼulungu kakadihwama, ku oshete a sheki yandi akenama lu etemwelo kandi. Angadimu wa ndjadi, ndu aui wʼantu, ndu akhungula, ndu edidimelu ka kete, ndu mboko efula ya mvula wakâyeli akambu ako.