Enyelo 1 - La Bible en Otetela (Bible K'Ekila) 1991

Enyelo ka Jesu Kristu: Enyelo kʼAkambu Waya ka Ndja

¹ Enyelo ka Jesu Kristu, kakawusha Unyashungu dia menya ekambi andi akambu waya ka ndja. Ndi akakitumi le ondjelo andi dia nkienya ukambi andi Joani.

² One lakatelaka antu diui dia Unyashungu, ndu diui dia Jesu Kristu, ndu akambu tshe wakandenyi.

³ Untu tshe ladia, ndu wane wuka akambu wahatayi ane, la wakitanyia akambu wambufundama loko, weli la otshoko, ne dia etena kʼakambu ako kaya suki.

Mikanda le Ekelizia Esambeli

⁴ Joani le ekelizia esambeli wa lu Asiya: Ngandji ka mamba kayali la nyu, ndu ki uma le one leko, ndu lakiko, ndu laya ka ndja, ndu uma le Nyuma esambeli yeli la ntundu ka kiti kandi ka diulelu;

⁵ ndu uma le Jesu Kristu, omenyi a kolamelu, ona enundu lakulwama uma lu nyoi, umbuledi a khumi ya dikanga ya la kete. Le one latutukaka ngandji, ndu lakatutshungula uma lu kolo yasu la dikila diandi;

⁶ lakatete akanga a diulelu, la elombedi a Unyashungu Shi; lutumbu la diulelu wayali le ndi pundju pundju! Ayali osoku!

⁷ Enda, ndi uyayi lu angi. Ashu tshe wayuwena, ndu wane wakawungula dikonga. Ku wedja tshe wa la kete wayulela dia dikambu diandi? Elu. Ayali osoku!

⁸ Khumadiondjo Unyashungu kata ati: Dimi Alafa la Omenga, leko, lakiko, laya ka ndja, Kanga-Wulu-Tshe.

Enelo lu Disenga Dia Patemo

⁹ Dimi Joani unyanyu, ulungudi la nyu wa pa ndu wa diulelu ndu wʼetetemalu le Jesu, laki lu disenga, dietawo vati: Patemo, ne dia diui dia Unyashungu, la diui dia Jesu.

¹⁰ Dimi laki le Nyuma lu lushi la Khumadiondjo. Ku lakuki diui dia wulu lʼokongo ami uku pungi

¹¹ ati: Ufundi akambu wenaye lu buku, uditumi le ekelizia esambeli: lʼEfeso ndu la Smurina, ndu la Perengamo, ndu la Tuyatira, ndu la Saradi, ndu la Filadelefiya, ndu la Laodikiya.

¹² Dimi lakewo dia mena one lakamvutela diui. Ku lamʼakamewo, dimi lakenyi dikitshelu dia paunyi esambeli diʼatala.

¹³ Lʼatei a dikitshelu diako kaki untu omotshi lufanyi la Onʼa untu, olotshi dihondo tshu ndu lʼekulu andi, ndu uya wa paunyi lu tulu,

¹⁴ Ote andi ndu divu diandi waki wema uku diosa dia wema diʼokoko, kana uku pembe. Ashu andi waki uku lumbi la dja.

¹⁵ Ekulu andi waki uku ohotela walongosolawo, uku ohotela watshumbawo lu khuka ka dja. Diui diandi diaki uku dihelela diʼashi efula.

¹⁶ Ndi aki la toto esambeli lu lunya landi la pami. Yombo ya diesa wedi ehendi yakatumbi uma lʼunyo andi. Elundji kandi kakahete uku unya mbayahete wulu.

¹⁷ Lamʼakamawenyi, dimi lakayahumanya lʼekulu andi uku untu lambuvo. Ku ndi akamunanda la lunya landi la pami, ata ati: Tukaki woma. Dimi leli etatelu ndu ekumelu,

¹⁸ ndu one leli lumu. Dimi lakavu, enda, leko la lumu pundju pundju. Dimi leko la sapi ya Nyoi ndu ya Udimu a Pengandu.

¹⁹ Okone ufundi akambu wakayenyi, la akambu weko, ndu akambu wayuyala lʼokongo;

²⁰ akambu wushami wa toto esambeli takayenyi lu lunya lami la pami, ndu wa dikitshelu dia paunyi esambeli diʼatala. Toto esambeli teli andjelo wa ekelizia esambeli. Dikitshelu dia fesa esambeli dieli ekelizia esambeli.