Embadi 7 - La Bible en Otetela (Bible K'Ekila) 1991

Alimbi wa Ngidiyona Wakalembia Asi Midiyana

¹ Jerubala, letawo vati: Ngidiyona la wudja tshe waki kame la ndi wakunela kʼolomo la pindju, wakatuhanga lasuki la eteko ka Haroda. Pangu ka Midiyana kaki lʼukidi la tshina dia dikuna dia Mora la ngelʼa kushi ka Ngidiyona.

² Latuyalaka akatela Ngidiyona ati: Antu weli la ye wambuleka efula dia dimi nkimo asi Midiyana lu anya awo, asi Isariyele watukuyasema la ntundu kami vati: Wulu asu mbambutushimbela.

³ Okone uteli antu tshe kakiane wati: Untu tshe luka woma kana ladidima, ahulo uma lʼukungu one wa Ngiliyade. Ku antu nunu akumi ahendi la pendi uma lʼatei awo wakakalula; antu nunu dikumi mbakatshikala.

⁴ Latuyalaka akatela Ngidiyona ati: Ndu kakiane antu wakaleki efula. Uhulo la wo utsha lʼashi, ku dimi layutukedikelawo leko. Okone one layumukutela nti: Atshu la ye, ndi kayutsho la ye. La one layumukutela nti: Tatshokaki la ye, ndi tatshokaki la ye.

⁵ Ku Ngidiyona akahulo la wo utsha lʼashi. Latuyalaka akawutela ati: Wane tshe wayolombola ashi la lulimi uku fo, kawemali leke lomotshi. La wane wayukhuse adui dia no ashi, kawemali leke lukina.

⁶ Efula ka wane wakalombola ashi la lulimi waki antu kama shatu. Keli antu akina tshe wakakhuse adui dia no ashi.

⁷ Ku Latuyalaka akatela Ngidiyona ati: La antu ane kama shatu, wakalombodi ashi la lulimi, mbayumunyushimbela, ndu mbayumukimo asi Midiyana lʼanya anyu. Ku akina tshe wutshikadi, untu lʼuntu akaluli lakandi.

⁸ Ku antu wakakime pamba la amama lu anya awo. Ndi akakaluya asi Isariyele tshe untu lʼuntu utsha la luudu landi la dipema. Ku ndi akatshikala la apami kama shatu tshu. Pangu kʼasi Midiyana kaki lʼukidi la tshina diʼukungu wakadjashi Ngidiyona.

⁹ Lʼutshu ako Latuyalaka akatela Ngidiyona ati: Uneli, uhulo utsha lu pangu kawo, ne dia dimi lambakimo lu anya aye.

¹⁰ Naka we mbukaka woma dia mpulo la ntalosha, utahulwi, we la ukambi aye Pura, utsha lu pangu kawo.

¹¹ Kutuki aui wayuwuta, ku utema aye ayukeketala dia mpulo utsha leko, dia ntalosha. Ku ndi akahulo, ndi la ukambi andi Pura, akatukuma la kuma ka pangu kakadjashi alimbi awo.

¹² Asi Midiyana, asi Amaleka, la antu tshe wʼuma lu leke lʼehutwelu wakadjase lʼukidi. Vo waki efula uku lukengi lʼendjo. Kamelo yawo kumbeyama mbala. Yo yaki efula uku seke ya losenga la lʼumamu wʼashi a wuki.

¹³ Lamʼakasukana Ngidiyona, uke ku pami kemotshi asakwela unyandi do ati: Enda, lakenyi ukama wa ma wako lʼatei a pangu kʼasi Midiyana. Vo wakakomwama lu luudu la dipema, ku luudu lako lakanyukwi, lakakadimwi etshulitshuli, ndu lakayadi mataa lu kete.

¹⁴ Ku unyandi akûkaluya diui ati: Do so paka dikambu dia yombo ya Ngidiyona, onʼa Joasha, usi Isariyele mbedio. Mete, Unyashungu ambukimo wudja a Midiyana la alimbi awo tshe lu anya andi.

¹⁵ Lamʼakuki Ngidiyona esakwelu ka do diako la kitshimudi kadio, ndi akandula Unyashungu. Ndi akakalula la pangu ka Isariyele, akawatela ati: Nyuneli, ne dia Latuyalaka ambukimo alimbi wa Midiyana lu anya anyu.

¹⁶ Ndi akakahanya antu ako kama shatu lu elui esatu. Ndi akawasha vo tshe amama, ndu eteka waki la fuki dia dja lʼetei.

¹⁷ Ku ndi akawatela ati: Kanyumendi; kanyutshi uku ayumutsha. Kamʼayumukuma la kuma ka pangu kawo, kanyutshi uku ayumutsha.

¹⁸ Lamʼayumuda dimama, dimi la wane tshe wayuyala la mi, kanyudi ndu nyu amama lʼutshimba tshe wa pangu, kanyuhangohango nyati: Lu dikambu dia Latuyalaka ndu lu dikambu dia Ngidiyona!

¹⁹ Ngidiyona la apami lukama waki la ndi wakakumi lʼumamu wa pangu lʼekumelu kʼelo ka ntundu. Ku vo wakadi amama, wakuli eteka waki lu anya awo.

²⁰ Elui esatu wʼantu wakadi amama, wakuli eteka, wakakimela fuki dia dja lu lunya la lomoso, la amama lu lunya la pami, wakahangohongo vati: Yombo ya Latuyalaka ndu ya Ngidiyona!

²¹ Vo tshe untu lʼuntu akemala lu dihuli diandi lʼutshimba a pangu, ku ului tshe wʼalimbi waki lu pangu wakakhunguso la mangu, wakadi ekuku, wakalawo.

²² Apami ako kama shatu wakadi amama ntu, ku Latuyalaka akalosha wane tshe waki lu pangu vame, untu la unyandi, untu la unyandi. Wane waki lu pangu wakalawo pulu ndu la Bete-Shita kʼutsha la Zerera, pulu ndu lʼumamu wa Abele-Mehola, lasuki la Tabata.

²³ Asi Isariyele wʼuma la Nafetali, wʼuma la Ashere, ndu wʼuma la Manase tshe wakasangana kame, wakayelana lʼasi Midiyana.

²⁴ Ngidiyona akatumi akendji lu ekungu tshe wʼEfarayima, dia ntutela antu vati: Nyuhulo, nyututenaneli asi Midiyana, nyutemali la tehu diʼashi pulu ndu la Bete-Bara ndu la tehu dia Jorodana. Ku apami tshe wʼasi Efarayima wakasangana, wakahotola atehu wʼashi edja ndu la Bete-Bara ndu la Jorodana.

²⁵ Vo wakandi Oreba la Zebe, ewandji ehendi wʼasi Midiyana. Vo wakadiaki Oreba la dive dia Oreba, ku wakatudiaka Zebe la dihuli dia amwelu kʼashi wʼelua dia Zebe. Vo wakayelana lʼasi Midiyana. Wakatolela Ngidiyona ote wa Oreba la wa Zebe la wedi wa Jorodana.