Embadi 6 - La Bible en Otetela (Bible K'Ekila) 1991

Leta la Ngidiyona

¹ Asi Isariyele wakatshi kolo lu ashu wa Latuyalaka ntu, ku ndi akakimo lu anya wʼasi Midiyana deku esambeli.

² Asi Midiyana wakasuyaka asi Isariyele wulu. Dia asi Isariyele mpanda asui uma le asi Midiyana, mbakawalawoka dia ntushama lu minga ya lu ekungu, lu weuku, ndu lʼatei wʼave.

³ Lamʼakuneka asi Isariyele mbu ya nde, asi Midiyana, asi Amaleka la antu uma lu leke lʼehutwelu, wakayakaka dia ndjolo la wo.

⁴ Vo wakayuhangaka lu welelo awo, wakalanyaka mbu ya nde ya lu kete yawo pulu ndu la Ngaza. Vo kuntshikaka nduku engo ka nde, ekoko, ngombe kuyanga punda lu Isariyele.

⁵ Vo wakayakaka la ngombe yawo la mvudu yawo yʼapema. Vo wakayakaka efula uku lukengi lʼendjo. Vo waki efula kaheyama mbala, vo la tushamo tawo. Wakayakaka dia ndjulanya kete.

⁶ Asi Isariyele wakadienaka le asi Midiyana, ku vo wakaleli le Latuyalaka.

⁷ Lamʼakaleli asi Isariyele le Latuyalaka dikambu dia Midiyana,

⁸ Latuyalaka akatumela umvutshi. Umvutshi ako akawatela ati: Latuyalaka, Unyashungu wa Isariyele, kata ati: Lakanyutundja uma lu Edjibitu, lakanyunya uma lu luudu la lohombo.

⁹ Dimi lakanyutshungula uma lu anya wʼasi Edjibitu, ndu uma lu anya a wane tshe wakanyusuyaka. Lakatawatshanyaka uma la ntundu kanyu, lakanyusha kete yawo.

¹⁰ Dimi lakanyutela nti: Dimi leli Latuyalaka, Unyashungu anyu; tanyukaki ditemolatemola diʼasi Amora, akanga a kete yudjashinyu, woma. Keli nyu kumbuka diui diami.

¹¹ Ondjelo wa Latuyalaka akayi, akayudjase la tshina diʼutamba wʼulungu la Ofara, lu kete ya Joasha, usi Abiezere. Onʼandi Ngidiyona aki lu nsusula epunga lu dihuli diatuwamulaka ashi wʼelua, dia mbishe uma le asi Midiyana.

¹² Ku ondjelo wa Latuyalaka akene le ndi, akawutela ati: We pami ka wulu, Latuyalaka eko la ye!

¹³ Ngidiyona akûkaluya diui ati: Khumemi, naka Latuyalaka eko la su, ukundi ambuyala akambu ane tshe le su? Lendʼeli akambu andi wa mamba wakatusanyiaka washesu vati: Latuyalaka, kunyutundja uma lʼEdjibitu uka? Keli kakiane Latuyalaka ambutukadja, ambutukimo lu anya wʼasi Midiyana.

¹⁴ Latuyalaka akakadimo le ndi, akawutela ati: Tshoka, tutshunguli Isariyele uma lu anya wa Midiyana la wulu aye; aha dimi kakutuma uka?

¹⁵ Ku Ngidiyona akûkaluya diui ati: Ai Khumemi, la na ayumutshungula Isariyele? Enda, khumbu kami kuleki tshitshe lʼatei a wudja a Manase, ndu dimi kuleki tshitshe lu luudu la papa.

¹⁶ Latuyalaka akawutela nti: Mete, dimi layuyala la ye, we ayudiaka asi Midiyana uku ladiku untu otoi.

¹⁷ Ngidiyona akûkaluya diui ati: Naka dimi lambuhumo lukulu Polo lu ashu aye, omenya djimbitelu ya dimi mbeya nti: We kateketa la mi.

¹⁸ Dimi lambokosengasenga nti: Utshikali lane edja ndu lambukalula dia ndjukulambula ulambu ami. Ku ndi akawutela ati: Dimi layutshikala edja ndu we ambukalula.

¹⁹ Ku Ngidiyona akatshu, akatolongosola onʼa mbudi, la ekama wa ma waha la edya la shima ka yediko ya saka too. Ndi akadji unatshi lu saka, ushi lu puki, akotoleladio la tshina diʼutamba wʼulungu, akatukitshiyadio.

²⁰ Ondjelo wa Unyashungu akawutela ati: Ose unatshi la ekama wa ma diaha la edya, ekitsha ladiku dia dive ne, uteli ushi. Ku ndi akatshi osoku.

²¹ Ondjelo wa Latuyalaka akedia ukalimba waki lu lunya, akuhiki lʼunatshi la ekama wa ma diaha la edya. Ku dja yakatumbi uma lu dive, yakatshumbi unatshi ako la ekama wa ma diaha la edya. Ku dikendji dia Latuyalaka akamo uma la ntundu kandi.

²² Lamʼakenyi Ngidiyona ati: Ondjelo wa Latuyalaka mbendi, ndi akati ati: Yee! Khumemi Latuyalaka, lambusumbo! ne dia lambena ondjelo aye, we Latuyalaka, lʼashu.

²³ Latuyalaka akûkaluya diui ati: Ki kayali la ye, tukaki woma, we huvo.

²⁴ Ku Ngidiyona akahikela Latuyalaka ediakelu laawo; akakiole ati: Jehowa-Shaloma (kitshimudi ati: Latuyalaka kanga ki). To keko edja ndu elo la Ofara wʼasi Abiezere.

²⁵ Lʼutshu ako, Latuyalaka akatela Ngidiyona ati: Ose osongo a ngombe wʼumi wa sho, la ngombe ka hendi kaya la deku esambeli. Kuhandjuli ediakelu ka Bala ka sho, katshatsha ekishi ka Ashera keli lasuki la to.

²⁶ Lʼokongo diku kuyuhikeli Latuyalaka, Unyashungu aye, ediakelu ladiku dia dikuna ne, kolonge ave ololo. Kose ngombe ka hendi, kulambuli ulambu wa lutshumba ladiku dia betshi diʼekishi ka Ashera kayuyatshatsha.

²⁷ Ngidiyona aketi apami dikumi uma lʼatei wʼekambi andi, ku ndi akatshi akambu tshe wakawutela Latuyalaka. Keli ndi akatshi lʼutshu, aha la yanyi, ne dia ndi akukaka khumbu ka shi ndu asi usumba woma.

²⁸ Lamʼaketo asi usumba kʼolomo la pindju, wendi ku ediakelu ka Bala kakahandjwi, la ekishi ka Ashera kaki lasuki la to, kakayadi betshi betshi, la ngombe ka hendi kakalambwemi ulambu wa lutshumba ladiku diʼediakelu kakahikama.

²⁹ Vo wakambwana vati: Utshi dikambu ne? Lamʼakawambula antu, vo wakawatela vati: Ngidiyona, ona Joasha, kakatshi dikambu diku.

³⁰ Ku asi ngelu wakatela Joasha vati: Utundja onʼaye, ndi avu! ne dia ndi akahandjudi ediakelu ka Bala, akatshatshisha ekishi ka Ashera, kaki lasuki la to.

³¹ Joasha akambula waku tshe wakukungutanela ati: Undi, nyu nangaka ndwela Bala ta? Nyu nangaka mbushimbela uka? Untu tshe lalanga mbolwela, avu pindju kene! Naka Bala Unyashungu kendi, ayalwele ta, ne dia untu akahandjudi ediakelu kandi.

³² Ku lushi lako vo wakole Ngidiyona vati: Jerubala (kitshimudi ati: Bala kalo la ndi); wakati vati: Bala ndame kukimeli, ne dia ndi akahandjudi ediakelu kandi.

³³ Midiyana tshe, Amaleka, la antu lu leke lʼehutwelu wakamote kame, wakateho Jorodana, wakatuhanga lʼukidi wa Jezerele.

³⁴ Nyuma ka Latuyalaka akahema Ngidiyona; ndi akadi dimama, aketi asi Abiyezere dia mbuyela.

³⁵ Ndi akatumi akendji lu Manase tshe, akawaeti ndu vo dia mbuyela. Ndi akatumi akendji la Ashere, la Zebuluna ndu la Nafetali, ku vo wakatuhumana la wo.

³⁶ Ngidiyona akatela Unyashungu ati: Naka we ayushimbela Isariyele la lunya lami mete, uku akayati,

³⁷ enda, dimi layukitsha ului wa diosa diʼokoko lu dihuli diʼesuswelu. Naka dihohe diayahema lu diosa utu, ku kete tshe ya laawo yayutshikala wumu, ku dimi layeya nti: Mete, we ayushimbela Isariyele la lunya lami, uku akayamvutela.

³⁸ Ku dikambu so diakayala. Lamʼakandeto kʼolomo la wedi a pindju, ndi akamula ului ako a diosa, ku dihohe diakatumbi uma loko diakayala ashi donga too.

³⁹ Ku Ngidiyona akasengasenga Unyashungu ati: Tumbukaki kele, moteketa etena kene ketu. Dimi nangaka muhimba etena otoi ketu la diosa ne okone. Etena kene, diosa kadiutshikali wumu, ku kete tshe ya laawo kayuyali dihohe tu.

⁴⁰ Ku Unyashungu akatshi osoku lʼutshu ako. Diosa diakatshikala wumu, keli kete tshe ya laawo yakayala dihohe tu.