Embadi 3 - La Bible en Otetela (Bible K'Ekila) 1991

Wedja Wakatshikala dia Mbedika Isariyele

¹ Wedja ene mbakatshiki Latuyalaka dia mbedika asi Isariyele, wane tshe waki kumbeya ata wʼasi Kanana.

² Ndi akalangi paka mbetsha nonga nye yʼasi Isariyele akambu wa a, ne dia vo kumbaenya ntundu.

³ Wedja ako ene: ewandji etanu wʼasi Filistiya, asi Kanana tshe ndu asi Sidona la asi Hiwi wakadjashi lʼukungu wa Lebanona uma lʼUkungu wa Bala-Heremona edja ndu lʼeotwelo ka la Hamata.

⁴ Vo wakayala la ulimu wa mbedika Isariyele, dia mbeya kana vo wayukitanyia elembe wa Latuyalaka wakadjela Mose washewo.

⁵ Asi Isariyele wakadjase lʼatei wʼasi Kanana, asi Hiti, asi Amora, asi Perizi, asi Hiwi, la asi Jebuse.

⁶ Asi Isariyele wakose ana amantu a wedja ene wadi, ndu vo wakatshukamia ana awo wʼamantu le ana wa wedja ako. Vo wakatendelaka ditemolatemola diawo.

Otenyele Ambushimbela Asi Isariyele Uma le Kushana-Rishatayima

⁷ Asi Isariyele wakatshi kolo lu ashu wa Latuyalaka, wakawuhela. Vo wakatendela WaBala ndu Ashetarota.

⁸ Okone kele ka Latuyalaka akafulanela le asi Isariyele. Ku ndi akakimo lu anya wa Kushana-Rishatayima, khumʼekanga ka Mesopotamiya. Ku vo wakayala deku enanei lʼokongo vra. Kushana-Rishatayima.

⁹ Lamʼakaleli asi Isariyele le Latuyalaka, ndi akatundjiya utshungudi Otenyele, onʼa Kenaze, kushe Kaleba.

¹⁰ Nyuma ka Latuyalaka akawahema. Ndi akasambula dikambu diʼasi Isariyele, akatshu utsha lu ta. Latuyalaka akakimo Kushana-Rishatayima, khumʼekanga ka Mesopotamiya, lu anya andi, ku ndi akolembia.

¹¹ Kete yakatshikala ki deku akumi anei, ku Otenyele, onʼa Kenaze, akavu.

Ehude Ambushimbela Isariyele Uma le Asi Moaba

¹² Asi Isariyele wakatshi kolo ntu lu ashu wa Latuyalaka. Ku Latuyalaka akasha Engelona, khumʼekanga ka Moaba, wulu wa ndo lʼasi Isariyele, ne dia vo wakatshi kolo lu ashu wa Latuyalaka.

¹³ Engelona akamotsha asi Amona la asi Amaleka. Ku ndi akatshu, akatolembia asi Isariyele, akahotola usumba wʼatuku.

¹⁴ Ku asi Isariyele wakayala deku dikumi la enanei lʼokongo wa Engelona, khumʼekanga ka Moaba.

¹⁵ Lamʼakaleli asi Isariyele le Latuyalaka, ndi akatundjiya utshungudi Ehude, kanga lomoso, onʼa Ngera, usi Bendjamina. Asi Isariyele kutumi la ulambu le Engelona, khumʼekanga ka Moaba.

¹⁶ Ehude akayatshulela yombo ya diesa wedi ehendi. Utali ayo aki uku dionge dia lunya. Ku ndi akayisome lu lukendi lu wedi wa lunya la pami, la tshina diʼahondo.

¹⁷ Ndi akalambula Engelona, khumʼekanga ka Moaba, ulambu. Engelona aki pami ka wuki efula.

¹⁸ Lamʼakandashili mbulambula, ndi akatundja wane wakayembaka ulambu ako.

¹⁹ Keli ndi ndame akatukalula uma lʼave waki lasuki la Ngilingala; akayuta ati: Khumʼekanga li! dimi la diui dia nkutela lu usheshe. Khumʼekanga akati ati: Utukukunga! Ku wane tshe waki lasuki la ndi, wakatumbi.

²⁰ Ehude akasukana lasuki la ndi lamʼakandadjashi ndame lu luudu la yoo la la diku. Ku Ehude akawutela ati: Dimi la diui le ye uma le Unyashungu. Engelona akunela uma lʼedie kandi.

²¹ Ku Ehude akahuluya lunya landi la lomoso, akasomola yombo uma lu wedi wa lunya la pami, akuhikeyo lu dikundju.

²² Ndu wenyi wakoto kame la yombo, ku wata wakayikumbi. Ndi kundjikula; yo yakatumbi pulu ndu lʼokongo.

²³ Ku Ehude akatumbi lu mbalasa, akatudihi lu luudu lako la la diku, akatadji kuki tukengeti.

²⁴ Lamʼakandatumbi, ekambi wa khumʼekanga wakayi; watani ku kuki ya luudu la la diku nye yudihami la tukengeti. Vo wakati vati: Mete, ndi ambetama lu luudu landi la la diku.

²⁵ Vo wakakungi edja, wakayala la ukandukandu efula. Lamʼakindi kundjihula kuki ya luudu la la diku, vo wakanya tukengeti, wakadihula. Watani ku khumewo one akavwi, ukalemi lʼudihi.

²⁶ Ehude akalawo lamʼakiwo lu nkunga. Ndi akalekana ave, akatushama la Seire.

²⁷ Lamʼakandakumi lʼukungu wa Efarayima, ndi akadi dimama. Ku asi Isariyele wakahulo kame la ndi uma lʼukungu. Ndi aketi la ntundu kawo.

²⁸ Ndi akawatela ati: Nyundjeli, ne dia Latuyalaka ambukimo atunyi anyu, asi Moaba, lu anya anyu. Vo wakahulo la ndi, wakahotola atehu wa Jorodana welanedi la Moaba. Vo kumbetawo nduku untu mbeta.

²⁹ Etena kako, vo wakadiaki lasuki la apami nunu dikumi wʼasi Moaba. Apami aso tshe waki akanga a wulu ndu wa dihunga. Nduku otoi akahandi.

³⁰ Asi Isariyele wakalembia asi Moaba lushi lako. Ku kete yakayala ki deku akumi enanei.

Shamengare Ambushimbela Isariyele Uma le Asi Filistiya

³¹ Lʼokongo wa Ehude, Shamengare, onʼa Anata, akadiaki apami wʼasi Filistiya kama shamalu la dikonga. Ndu ndi akashimbela Isariyele.