Embadi 19 - La Bible en Otetela (Bible K'Ekila) 1991

Usi Lewi la Usika Andi

¹ Lu nshi sho, tawaki la khumʼekanga lu Isariyele. Usi Lewi omotshi lakadjashi lu dieta, lu leke lʼakuna wa Efarayima, akose umuntu omotshi umandji uma la Betelehema ka la Juda.

² Umuntu ako akulawo, akatudjase ngondo nyei lakawo la Betelehema ka la Juda.

³ Ku umendi akunela; akatusawula la ndi ololo dia mbukaluya ntu. Ndi akatshu la ukambi la punda hyendi. Umuntu ako akayi la ndi laka shi. Lamʼakawenyi ukilu andi, ndi akulungula lʼongenongeno.

⁴ Ukilu andi, shi wadendi, akushimbi, ku ndi akatshikaia nshi shatu. Okone vo wakalekaka, wakanokaka, wakashamaka leko.

⁵ Lushi la nei, vo waketo kʼolomo la pindju. Ku ndi akalaki dia ntsho. Keli shi umuntu akawutela ati: Utukutali yema ya ma, mbayuyukeketala dimba, lʼokongo diku kanyutshu.

⁶ Okone vo ahendi wakadjase, wakali, wakano. Ku shi umuntu akosengasenga ati: Utukutshikala la su elo, utukongenangena.

⁷ Ndi akayangi munela, keli ukilu andi akosengasenga, ku ndi akalali ntu.

⁸ Ku lushi ia ianu, ndi aketo kʼolomo la pindju dia munela. Shi umuntu akosengasenga ati: Utukukunga, utali yango, kunela la dikolo. Okone vo ahendi wakali.

⁹ Lamʼakandayangi munela la umuntu la ukambi andi, ukilu andi, shi umuntu, akosengasenga ati: Kakiane unya ambeta, ulali elo, ongenengene. Keto kʼolomo la pindju, kutshu lakaye.

¹⁰ Keli usi Lewi kumbetawo ndala leko ntu. Ndi akunela; akatshu la Jebuse, yetawu vati: Jerusalema. Ndi akatshu kame la punda hyendi yukelekami die, ndu kame la useka andi.

¹¹ Lamʼakawasukana le Jebuse laso ku unya ambeta. Ku ukambi andi akosengasenga ati: Yete, tutshu lʼusumbj one wʼasi Jebuse, tutetami leko.

¹² Ku khumendi akûkaluya diui ati: Kema, shu hatetama lʼusumba wʼasi wedja waha asi Isariyele. Shu tayutsho pulu ndu la Ngiba.

¹³ Ku ndi akatela ukambi andi ntu ati: Yete, tutshu utsha lu ngelu kemotshi kudjashi asikasu, tutetami la Ngiba kana la Rama.

¹⁴ Okone vo wakakolamela la lokendo, ku unya akawadjela lamʼakawasukana la Ngiba ka lu wudja wa Bendjamina.

¹⁵ Vo waketola dia ntetama la Ngiba. Usi Lewi akoto lʼusumba, akadjase lu seke, ne dia nduku untu akalungula dia vo ntetama lu luudu landi.

¹⁶ Ku usumbi a pami omotshi akayayakaka uma lʼekambo la dikolo. Pami kako aki usi ukungu wa Efarayima, keli ndi akadjashi la Ngiba. Keli asi Ngiba waki asi Bendjamina.

¹⁷ Usumbi ako akedia ashu, enyi ku ongendangenda one wudjashi lʼosese wʼusumba. Ku ndi akawumbula ati: Utsha lendi atayatshu? Uma lendi ayayi?

¹⁸ Ku usi Lewi akûkaluya diui ati: Uma la Betelehema ka la Juda kayatayi, mbatatatshu utsha lu dieta, lu leke lʼakuna wa Efarayima, ne dia leko keli lakasu. Dimi lakatshu la Betelehema ka la Juda, ku kakiane dimi lutatshu utsha la luudu lami. Keli nduku untu lanungula lu luudu landi.

¹⁹ Shu la diango dia ndesha punda yasu, ndu dimi la ukambi aye a umuntu la olongo a pami one wakayi la ekambi aye teko la ma diasu la wanu asu. Shu kema la uhumba wʼengo.

²⁰ Ku usumbi ako akawutela ati: Ki kayali la ye! Ehumba aye tshe wayali lʼote ami. Dikambu otoi tetamaki lʼosese.

²¹ Okone ndi akatshu la wo lakandi, akasha punda mbu ya nde. Ku vo wakotsha ekulu, wakali, wakano.

²² Lamʼakiwo lu ngenangena, apamiwa kolo, asi usumba, wakadingi luudu, wakakokola lu lukuki. Vo wakatela usumbi ako, kanga luudu, vati: Utundja pami keku kakotwe lu luudu laye, teyani la ndi.

²³ Ku kanga luudu akatumbi le wo, akasengasenga ati: Kema, analingu, tanyutshaki kolo wuhu oso, Tanyutshaki dikambu dia djeli ne, ne dia pami kene akayi lu luudu lami.

²⁴ Nyendi, onʼami la umuntu one lʼemuma la usika wʼusi Lewi uku. Dimi layunyutundjiyawo. Nyasuwuli, nyatsheli uku alanganyu. Keli tanyutshelaki pami kene dikambu dia kolo dia wuhu one.

²⁵ Keli apami ako kumbetawo mbulunga. Ku usi Lewi akose usika andi, akatundjiyandi lʼandja, ku vo wakeyana la ndi, wakutshela kolo utshu tshe, edja ndu pindju. Ku lamʼakayangi unya mputo, vo wakukimo.

²⁶ Ku umuntu akayi la kesekese, akayoko la suku dia luudu laki khumendi. Ndi akatshikala laawo, edja ndu lamʼakahuto unya.

²⁷ Khumendi aketo la pindju, akadihula kuki ya luudu. Ndi akatumbi dia munela lu lokendo landi, enyi ku umuntu one, usika andi, akasembemadi la suku dia luudu la anya andi ladiku diʼukingo.

²⁸ Ndi akawutela ati: Uneli, tutshu. Keli ndi kumbukaluya nduku diui. Ku khumendi akawembe, akawahe ladiku dia punda. Ku ndi akatshu utsha lakandi.

²⁹ Lamʼakandakumi lakandi, ndi akose lukuwa, akakimela udu wʼusika andi, akosese lu betshi dikumi la pendi. Ku ndi akaditumi lu kete ya Isariyele tshe.

³⁰ Ku antu tshe wakenyi dikambu diako, wakati vati: Umaka etumbelu kʼasi Isariyele uma lʼEdjibitu edja ndu elo, nduku dikambu dia kolo dia wuhu one diambenama. Nyukani yimba, nyusawuli kame, nyotekete!