Embadi 17 - La Bible en Otetela (Bible K'Ekila) 1991

Dikishi dia Mika, la Olombedi Andi

¹ Untu omotshi akadjashi lu leke lʼakuna wa Efarayima, lukumbu landi Mika.

² Ndi akatela nyangu ati: Tenyi dia fesa diaye kinunu la lukama diakayashisha, diakayadji dokoloko, ndu diakanyamvutela, dieko le mi. Dimi kakadiose. Nyangu akawutela ati: Kawo, onʼami, Latuyalaka akotshokole!

³ Mika akakaluya tenyi dia fesa kinunu la lukama le nyangu. Ku nyangu akati ntu ati: Dimi lakalaki Latuyalaka fesa nye dikambu dia onʼami, dia vo mbutshela ekishi ka lutshula; ka lolelola. Okone lambuyikaluya le ndi kakiane.

⁴ Mika akakaluya fesa le nyangu. Ku nyangu akose tenyi dia fesa kama hyendi, akadisha utshudi. Utshudi akatshi ekishi ka lutshula, ndu ekishi ka lolelola. Ku wakadikitsha lu luudu la Mika.

⁵ Mika aki la luudu lakandakitshaka dikishi, ndi akatshi etemolatemola ndu tukishikishi. Ku ndi akakitsha onʼandi a pami omotshi oteketshi.

⁶ Lu nshi sho asi Isariyele kundjala la khumʼekanga. Untu tshe akatshaka uku akandalangaka.

⁷ Olongo a pami omotshi, usi Lewi, uma lu diuhu dia Juda, akadjase la Betelehema ka la Juda.

⁸ Ku olongo ako akunela uma lʼusumba wa Betelehema ka la Juda, dia ntayangi dihuli dia mbidjase. Lamʼakandatatshokaka, ndi akatukuma lu leke lʼakuna wa Efarayima, pulu ndu lu luudu la Mika.

⁹ Mika akawumbula ati: Uma lendi ayayi? Ndi akûkaluya diui ati: Dimi leko usi Lewi, uma la Betelehema ka la Juda, mbatamayangi dihuli dia mbidjase.

¹⁰ Mika akawutela ati: Udjase la mi, uyali papa la olombedi ami. Ku layukufutaka tenyi dia fesa dikumi lʼeleku lʼeleku, ndu ahondo wa ndota la mbu ya nde. Ku usi Lewi aketawo mbidjase la ndi.

¹¹ Usi Lewi akangenangena dia mbidjase la Mika. Ku Mika akayala uku onʼandi omotshi.

¹² Mika akakidia usi Lewi, ku olongo a pami ako akayala olombedi andi, akadjase lu luudu landi.

¹³ Mika akati ati: Dimi lambeya nti: Latuyalaka ayumpumuya lukulu lʼolo, ne dia dimi lambukundja usi Lewi one olombedi.