Embadi 16 - La Bible en Otetela (Bible K'Ekila) 1991

Samisona la Ngaza

¹ Samisona akatshu la Ngaza, akatena umuntu kanga luseka leko. Ku ndi akunana la ndi.

² Wakatela asi Ngaza vati: Samisona one ambuya lindu. Vo wakudingi lʼusumba, wakukitshiya lalu utshu tshe la suku dia usumba. Vo wakatshikala utshu tshe, wakati vati: Tukungi unya atukuhuto, mbayutudiaka.

³ Samisona aketama ki edja ndu lʼasa ndeki. Ku ndi aketo lasa ndeki, akakimela kuki ya suku diʼusumba kame la dikoho diayo pendi, akayihatula kame la tukingiti. Ndi akayahe lʼaheka, akayitole lʼote wʼukungu wakelanedi la Heberona.

Samisona la Delila

⁴ Lʼokongo wʼakambu aso, utema andi akalangi umuntu omotshi lʼukidi wa Soreka, lukumbu landi Delila.

⁵ Ku ewandji wʼasi Filistiya wakatshu utsha le umuntu ako, wakatuwutela vati: Olembelembe, dia mbishula uma lendi atuyakaka wulu andi one wa mamba, ndu uku ukukisu mbolembia. Katukeleki, katusuya. Ku shu tshe untu lʼuntu ayukusha tenyi dia fesa kinunu la lukama.

⁶ Delila akasengasenga Samisona ati: Umvuteli uma lendi atuyakaka wulu aye wa mamba. Ndu la na ukukiwo nkukeleka dia nkusuya.

⁷ Samisona akûkaluya diui ati: Naka vo wayunkeleka la ekavu esambeli wʼeyuyu, dimi layuyala wodu uku apami akina.

⁸ Ku ewandji wʼasi Filistiya wakawela ekavu esambeli wʼeyuyu, ku ndi akukelekawo.

⁹ Ndi akakitsha antu lalu lu luudu landi la lʼatei. Ku ndi akemula Samisona ati: Samisona, Samisona! eto, asi Filistiya ane wukukimedi. Ku ndi akahimbula ekavu uku atuhimboka olemo wulungudi dja. Okone vo kumbeya uma lene akayakaka wulu andi.

¹⁰ Delila akatela Samisona ati: Mete, we akantshundja, akamvutela kashi. Lambukosengasenga nti: Umvuteli kakiane wuhu wukukiwo nkukeleka.

¹¹ Ndi akûkaluya diui ati: Naka vo wayunkeleka la eshinga wʼeyuyu, wahawatatshi ulimu, dimi layuyala wodu uku apami akina.

¹² Okone Delila akose eshinga wʼeyuyu, akukelekawo. Ndi akawutela ati: Samisona, Samisona! asi Filistiya ane wukukimedi. Etena kako, antu wakandakitsha lalu, waki lu luudu landi la lʼatei. Ku ndi akahimbula eshinga waki lu anya uku atuhimboka mwanda.

¹³ Delila akatela Samisona ati: Edja ndu kakiane, we eko paka lu nsokami, ndu lu nkesami! Umvuteli kakiane wuhu wukukiye nkelekama. Ku Samisona akawutela ati: Naka we ayela esambala esambeli wa lʼote ami usambala, naka we ayushidika lʼasela, ku dimi layuyala wodu, ndu layuyala uku apami akina.

¹⁴ Ndi akadji utamba lu ekata kʼesambala, akashidika utamba, akushikike. Ku ndi akawutela ati: Samisona, Samisona! asi Filistiya ane wukukimedi. Ku ndi akakashimo uma lu djo, akanya utamba, akahandjula ekata.

¹⁵ Delila akawumbula ati: Ukundi ataye wati: Dimi nkulangaka! Lamʼaha utema aye le mi? Enda, we ambuntshundja tena satu ne. We atamvutela uma lene atuyakaka wulu aye.

¹⁶ Lamʼakandolembelembeka ndu lamʼakandosengasengaka, ndi akalembe utema.

¹⁷ Ku Samisona akawushwela utema tshe; akawutela ati: Umaka mbuto kami, dimi hatunyaka divu diami, ne dia dimi lakakidiama le Unyashungu leki lʼutema a nyomi. Naka ayuminya divu, ku layuyala wodu uku apami akina.

¹⁸ Lamʼakenyi Delila ati: Ndi ambumbishwela utema andi tshe, ndi akatumi akendji dia nteta ewandji wʼasi Filistiya ati: Nyukaluli etena kene ketu, ne dia ndi ambumbishwela utema andi tshe. Ku ewandji wʼasi Filistiya wakayi le ndi la falanga lu anya awo.

¹⁹ Delila akuladia lu dihelo diandi. Ndi aketi pami kemotshi, ku pami kako, akahimbula esambala esambeli waki lʼote a Samisona. Ku Delila akatatela mbusuya wulu; wulu a Samisona akamo uma le ndi.

²⁰ Ku ndi akaweti ati: Samisona, Samisona! asi Filistiya ane wukukimedi. Ndi aketo uma lu djo, akati lʼutema andi ati: Dimi layutumba dia ntuyashimbela, uku akamatshaka nshi kina. Ndi kumbeya ati: Latuyalaka ambumo le ndi.

²¹ Ku asi Filistiya wakawundi, wakukhundula ashu. Vo wakatshu la ndi utsha la Ngaza, wakukeleka molola wʼohotela. Ku ndi akahelaka ahoho lu luudu la lukanu.

²² Divu diandi diakatatela ntumba uma lamʼakawawunya.

Nyoi ka Samisona

²³ Ewandji wʼasi Filistiya wakamote kame dia nambula etemolatemola kawo Dangona ulambu, la dia ngenangena. Vo wakati vati: Etemolatemola kasu kambukimo utunyi asu Samisona lu anya asu.

²⁴ Lamʼakenyi antu Samisona, vo wakatumbula etemolatemola kawo, wakati vati: Etemolatemola kasu kambukimo utunyi asu lu anya asu: ee, one lakahenyahenyaka kete yasu, ndu lakatudiaki efula.

²⁵ Ku lamʼakiwo la ongenongeno lʼetema, vo wakati vati: Nyuteti Samisona, ayutonwele wenye! Ku wakatutundja Samisona uma lu luudu la lukanu. Ku ndi akano wenye la ntundu kawo. Vo wakaweme lʼasa dikoho pendi.

²⁶ Ku Samisona akatela olongo a pami wakukimedi lu lunya ati: Etawo dimi munanda dikoho diukimedi luudu, diekami.

²⁷ Luudu laki too lʼapami la amantu. Ndu ewandji tshe wʼasi Filistiya waki loko. Antu lasuki la nunu satu, apami la amantu waki lʼote a luudu, wakendaka Samisona lamʼakandanokaka wenye.

²⁸ Samisona akalombe Latuyalaka ati: Khumemi Latuyalaka li! lambukosengasenga nti: Umbuho, we Unyashungu, umbisha wulu etena kene ketu, dia dimi ntasombosha asi Filistiya lu dikambu dia ashu ami.

²⁹ Samisona akakimela dikoho pendi diakakimedi luudu, akadikimela wulu; kemotshi lu lunya la pami kekina lu lunya la lomoso.

³⁰ Samisona akalombe ati: Etawo dimi mvo la asi Filistiya ane! Ndi akanyama, akatshindi wulu, ku luudu lakanyukutanela ewandji la antu tshe waki loko. Okone, wane wakandadiaki lushi la nyoi kandi, wakaleki wane wakandadiaki lu nshi ya lumu landi.

³¹ Anangu la wa lu luudu la shi, wakatshu dia ntosa udu andi; wakayukhunde lʼasa Zora la Eshitaole, lu dihuli diakawakhunde Manoa, shi. Ndi akayala umbadi wa Isariyele deku akumi ahendi.