Embadi 15 - La Bible en Otetela (Bible K'Ekila) 1991

¹ Lʼokongo a nshi motshi, Samisona akatshu laka akilu andi, dia ntenda wadendi. Ndi akatole yana ya mbudi. Ndi akati ati: Dimi nangaka mboto lu luudu letami wademi, keli shi wadendi kunanga ndi mboto.

² Ndi akawutela ati: Mete, dimi lakakani nti: We ambutuna, mbakamawusha unyaye wadi. Kushendi leli laku, huleki dimena? Uwose lu dihuli diandi.

³ Samisona akawatela ati: Etena kene, dimi haluyala la unungu le asi Filistiya kuyanga layatshela kolo.

⁴ Ku ndi akunela; akatunda mbulu kama shatu, akose ndu fuki dia dja, akakeleka mbulu hyendi hyendi lu wela, akakeleka ndu fuki dia dja lʼasa wela ehendi.

⁵ Lamʼakandashili mpetsha fuki dia dja, ndi akakimo mbulu lʼatei wʼepunga wʼasi Filistiya. Ku dja yakatshumbi elui wʼepunga waki lu dikambo, ndu ene tshe wahawatani. Yo yakatshumbi ndu dikambo diawo diʼeweli.

⁶ Ku asi Filistiya wakambwana vati: Utshi dikambu ne na? Ku wakati vati: Samisona, ukilu wʼusi Timina, ne dia ndi akohotola onʼandi, akawusha unyandi wadi. Asi Filistiya wakatshu, wakatutshumba umuntu ako la shi.

⁷ Ku Samisona akawatela ati: Ngaku mbambunyutsha? Paka dimi lambutanyosombosha utu mbayumutshika dikambu.

⁸ Ndi akakomolaka wulu lʼokongo ndu lʼutema, akadiaki antu efula. Ku ndi akahulo dia ntushama lu wuku wa dive dia lʼEtame.

Samisona Ambolembia Asi Filistiya la Leki

⁹ Asi Filistiya wakunela utsha lu kete ya Juda, wakatuhanga lʼutshimba wa Leki.

¹⁰ Asi Juda wakawambula vati: Dikambu kuna diakanyayi dia ndjutolosha? Vo wakakaluya diui vati: Dia ndjunda Samisona, la dia mbutshela uku akandatutshela mbuyesu.

¹¹ Asi Juda nunu satu wakahulo utsha lu wuku wa dive dia lʼEtame, wakatumbula Samisona vati: Undi, we heyi wati: Asi Filistiya mbutuledi? Na dikambu ne diambuyututshela? Ndi akakaluya diui ati: Uku akawatshela, mbakamatshela.

¹² Vo wakawutela vati: Shu tambuya dia ndjukunda, dia ntukukimo lu anya wʼasi Filistiya. Samisona akawatela ati: Nyuntshibeli nyati: Shu hatukudiaka.

¹³ Vo wakûkaluya diui vati: Kawo, shu nangaka paka nkukeleka la nkukimo lu anya awo, keli shu shame hatukudiaka. Vo wakukeleka eshinga ehendi wʼeyuyu, wakutundja uma lu wuku.

¹⁴ Lamʼakawakumi la ndi la Leki, asi Filistiya wakatulungula, watadi ekuku wʼongenongeno. Nyuma ka Latuyalaka kakawahema wulu. Eshinga wakawukeleka lu aheka wakayala uku eshinga wa linene wakawatshumbi lu dja. La ekodi vvakawukeleka lu anya wakahimbohimbo.

¹⁵ Ndi akashula luwanga la punda, akalotongona, akadiaki antu kinunu la lo.

¹⁶ Ku Samisona akati ati: La luwanga la punda, mbambumakitsha kalakala; La luwanga la punda mbamumudiaka antu kinunu.

¹⁷ Lamʼakandashidiya mvuta aui aso, ndi akakadja luwanga lako. Ku vo wakole dihuli diako vati: Ramata-Leki (kitshimudi ati: Dikuna dia Luwanga).

¹⁸ Ndi akuki pusa ashi, akalombe Latuyalaka ati: We kakatungi etshungwelu kene ka wuki la lunya lʼukambi aye; ku kakiane dimi mvo la pusa kʼashi, la mboto lu anya a wane wahatahemaka uhekeli?

¹⁹ Ku Unyashungu akatshimbi difuku lu dive dia la Leki, ku ashi wakatumbi. Lamʼakandano, ndi akayala la wulu ntu. Okone vo wakole dihuli diako vati: Ene-Hakora (kitshimudi ati: Eteko ka one lakalombe). To keko la Leki edja ndu elo.

²⁰ Samisona akayala umbadi wa Isariyele deku akumi ahendi lu nshi yʼasi Filistiya.