Embadi 13 - La Bible en Otetela (Bible K'Ekila) 1991

Eutwelu ka Samisona

¹ Asi Isariyele wakatshi kolo lu ashu wa Latuyalaka ntu. Ku ndi akakimo lu anya wʼasi Filistiya deku akumi anei.

² Untu omotshi akiko la Zara, uma lu wudja wa Dane, lakawetaka vati: Manoa. Wadendi aki ekumba, kumbuta ona.

³ Ondjelo a Latuyalaka akene le umuntu ako. Ndi akawutela ati: Enda, we one eli ekumba, atuti ona. Keli we ayutsho diemi, ayuta ona pami.

⁴ Kakiane lambukutela nti: Ewo, tolekaki engo ka mindu, tonokaki wanu kana dinono dia wulu.

⁵ Enda, we ayutsho diemi, ayuta ona pami. Ndi tanyaki divu dia lʼote andi pundju; ne dia ona ako ayukidiama le Unyashungu umaka utema a nyangu. Ndi keli one layutatela ntshungula Isariyele uma lu anya wʼasi Filistiya.

⁶ Ku umuntu ako akatutela umendi ati: Umvutshi a Unyashungu akayi le mi. Ndi akafanyi la ondjelo a Unyashungu, aki enelo ka mamba! Dimi hambumbudi lukumbu landi kuyanga uma lene akindi.

⁷ Keli ndi akamvutedi ati: We ayutsho diemi, ayuta ona pami. Tolekaki engo ka mindu, tonokaki wanu kana dinono dia wulu; ne dia onʼa ako ayukidiama le Unyashungu umaka utema a nyangu edja ndu lushi la nyoi kandi.

⁸ Ku Manoa akasengasenga Latuyalaka ati: Khumemi li, etawo umvutshi aye ako lakayatumi nkalula le su, dia ntetsha akambu wayutuhumba ntshela ona layututa.

⁹ Unyashungu akuki dombelo dia Manoa. Ondjelo andi akayi ntu le umuntu lamʼakandadjashi lu ekambo. Umendi Manoa taki kame la ndi.

¹⁰ Ku umuntu akalawo esadi dia ntutela umendi ati: Untu lakayi le mi lushi lukina, ambuyene le mi ntu.

¹¹ Manoa akunela; akatshu la wadendi utsha le untu ako. Ndi akatuwumbula ati: We keli untu lakateketshi la umuntu one? Ndi akûkaluya diui ati: Elu, dimi.

¹² Manoa akawumbula ati: Naka diui diaye diambushidiyama, akambu akona wayutulama dikambu diʼona, la ukundi ayututshela?

¹³ Ondjelo a Latuyalaka akakaluya Manoa diui ati: Umuntu kalami aui tshe wakamawutela.

¹⁴ Talekaki engo ka mindu, tunganelaki engo tshe katumba uma lʼekodi wa vinyo, tanokaki wanu kuyanga enono ka wulu. Ndi akalami akambu tshe wakamawutela.

¹⁵ Manoa akasengasenga ondjelo a Latuyalaka ati: Utukungi, dimi nkaluli dia ntukudiakela ona mbudi.

¹⁶ Ondjelo a Latuyalaka akûkaluya diui ati: Kuyanga mbakungiaye, dimi halole mbu ya nde yaye. Keli naka we nangaka nambula ulambu wa lutshumba, kulambuli Latuyalaka. Manoa kumbeya ati: Ondjelo wa Latuyalaka mbendi.

¹⁷ Manoa akawumbula ati: Na lukumbu laye, keli katukolemia lamʼayushidiyama diui diaye?

¹⁸ Ondjelo akûkaluya diui ati: Okoko wana wamumbulaye lukumbu? Lo leli mamba.

¹⁹ Okone Manoa akatosa ona mbudi kame la ulambu wa shima, akalambula Latuyalaka ladiku dia dive. Ondjelo akatshi akambu wa mamba lamʼakawendaka Manoa la wadendi.

²⁰ Lamʼakambela lumbi la lʼediakelu utsha lʼulungu, ondjelo wa Latuyalaka akambela lu lumbi la dja. Lamʼakenyi Manoa la wadendi dikambu diako, vo wakako ekhukhumadi la kete.

²¹ Ondjelo a Latuyalaka komene ntu le Manoa la wadendi. Ku lʼetena kako Manoa akalimbitela ati: Ondjelo a Latuyalaka mbendi.

²² Manoa akatela wadendi ati: Mete, shu tutsha mvo, ne dia shu takenyi Unyashungu.

²³ Keli wadendi akawutela ati: Utunduyala Latuyalaka akalangi ntudiaka, tshiki ndi halungudi ulambu asu wa lutshumba ndu wa shima; tshiki ndi hatenyisha akambu ane tshe kuyanga ntutela akambu wa wuhu one kakiane.

²⁴ Umuntu ako akuti ona pami, akawole lukumbu ati: Samisona. Ona akuli, Latuyalaka akotshokola.

²⁵ Nyuma ka Latuyalaka akatatela mbusutshasutsha la Mahane-Dane, kaki lasa Zora la Eshitoale.