Embadi 12 - La Bible en Otetela (Bible K'Ekila) 1991

¹ Asi Efarayima wakamote, wakatshu utsha la ngelʼa kushi. Vo wakatumbula Jefeta vati: Okoko wana wakiye kuntatutedi lamʼakayateho dia ntolosha asi Amona? Shu tayukutshumba kame la luudu laye.

² Jefeta akakaluya diui ati: Dimi la wudja ami takami lʼasi Amona wulu. Dimi lakanyeti, keli nyu kunshimbelami uma lu anya awo.

³ Lamʼakamenyi nti: Nyu kundja dia ndjunkimanyia, dimi lakasundja lumu lami, lakateho dia ntolo lʼasi Amona. Latuyalaka akakimo lu anya ami. Okoko wana wambunyuya dia ndjondosha elo?

⁴ Jefeta akasanganya apami tshe wa la Ngiliyade, wakalo la Efarayima. Vo wakalo la asi Efarayima, ne dia vo wakataka vati: Nyu asi Ngiliyade, nyeko antu wakalawo uma lʼatei wʼasi Efarayima ndu uma lʼatei wʼasi Manase.

⁵ Ku asi Ngiliyade wakatemala lu atehu wa lu leke lʼasi Efarayima. Ku lamʼakawatela undawi omotshi wʼusi Efarayima ati: Nyumbetsha mbeti!

⁶ Ku vo mbumbula vati: Kawo, uti wati: Shiboleta. Ku ndi mvuta ati: Siboleta, ne dia ndi kumbeya dita ololo. Okone vo wakawandaka, wakadiakaka lu atehu wa Jorodana. Wakadiaki asi Efarayima, nunu akumi anei la pendi lʼetena kako.

⁷ Jefeta, usi Ngiliyada, akayala umbadi wa Isariyele deku samalu. Ndi akavu, ku wakukhunde lʼusumba omotshi wa la Ngiliyada.

Ibizana, Elona, Abidona, Wambuyala Embadi wa Isariyele

⁸ Ku lʼokongo andi, Ibizana, usi Betelehema, akayala umbadi wa Isariyele.

⁹ Ndi akuti ana apami akumi asatu la ana amantu akumi asatu. Ndi akatshukamia ana amantu akumi asatu le asi wedja, ndu ndi akatshukela anʼandi wʼapami ana amantu akumi asatu wʼasi wedja. Ndi akayala umbadi lu Isariyele deku esambeli.

¹⁰ Ibizana akavu, ku wakukhunde la Betelehema.

¹¹ Lʼokongo andi, Elona, usi Zebuluna, akayala umbadi wa Isariyele. Ndi akayala umbadi deku dikumi.

¹² Elona, usi Zebuluna, akavu, ku wakukhunde la Aidjalona, lu kete ya Zebuluna.

¹³ Lʼokongo andi, Abidona, onʼa Hilele, usi Piratona, akayala umbadi lu Isariyele.

¹⁴ Ndi aki la ana apami akumi anei la ekana akumi asatu, wakahemaka lu esongo wa punda akumi esambeli. Ndi akayala umbadi lu Isariyele deku enanei.

¹⁵ Abidona, onʼa Hilele, usi Piratona, akavu, ku wakukhunde la Piratona, lu kete yʼasi Efarayima, lʼukungu wʼasi Amaleka.