Embadi 11 - La Bible en Otetela (Bible K'Ekila) 1991

¹ Jefeta, usi Ngiliyade, aki dihuka dia wulu. Ndi akuto le umuntu kanga luseka; Ngiliyade kaki shi.

² Wadi a Ngiliyade akuti la ndi ana apami. Lamʼakuli ana ako, vo wakatshanya Jefeta; wakawutela vati: We heyi nkundja etenyi kʼukito uma lu luudu la shesu, ne dia we akuto le umuntu ukina.

³ Jefeta akalawo anangu etali, akatudjase lu kete ya Toba. Antu wa kolo wakamotaka la le Jefeta, wakatengolaka la ndi.

⁴ Lʼokongo a nshi motshi, asi Amona wakalosha asi Isariyele.

⁵ Lamʼakayangi asi Amona ndo lʼasi Isariyele ta, dihangamendi dia Isariyele dia la Ngiliyade wakatshu lu kete ya Toba, dia ntuyanga Jefeta.

⁶ Vo wakatutela Jefeta vati: Yeti, utuyali uwandji asu, mbayutolo lʼasi Amona.

⁷ Jefeta akakaluya diui ati: Nyu kumpetshami, kumbitshanyami uma lu luudu la papa? Ku kakiane, lamʼambunyuyala la pa, ukundi ambunyuya le mi na?

⁸ Ku dihangamendi dia Ngiliyade wakatela Jefeta vati: Uma lu dikambu diako, mbambutukalula le ye kakiane, dia we ntsho la su la ntolo lʼasi Amona, ndu dia we ndjala uwandji asu, shu asi Ngiliyade tshe.

⁹ Jefeta akambula dihangamendi dia Ngiliyade ati: Naka nyu nyambutsho la mi utsha lakasu dia ntolosha asi Amona, ku Latuyalaka ambutakimo lu anya ami, undi, dimi layuyala uwandji anyu?

¹⁰ Ku vo wakûkaluya diui vati: Latuyalaka oso uka. Mete, shu tayutsha uku wutshiye.

¹¹ Jefeta akatshu la dihangamendi dia Ngiliyade, ku antu wakawudji uwandji. Ku Jefeta akamuta aui tshe wa daka diako la Mizipa la ntundu ka Latuyalaka.

¹² Jefeta akatumi akendji le khumʼekanga kʼasi Amona ati: Kasami la ye, kayangaye ndosha wudja ami?

¹³ Ku khumʼekanga kʼasi Amona akakaluya akendji wa Jefeta diui ati: Ne dia lamʼakayi asi Isariyele uma lʼEdjibitu, vo wakayohotola kete yami umaka Aranona pulu ndu la Jaboka, edja ndu la Jorodana. Kakiane nyuyikaluya lu ki.

¹⁴ Jefeta akatumi akendji ntu utsha le khumʼekanga kʼasi Amona,

¹⁵ dia ntuwutela vati: Jefeta ambuta ati: Isariyele kompotola kete yʼasi Moaba, kuyanga kete yʼasi Amona.

¹⁶ Ne dia lamʼakatumbi Isariyele uma lʼEdjibitu, vo wakayayakaka lʼusui wa shenga edja ndu lʼUduwa a Tilili. Vo wakayukuma la Kadeshe.

¹⁷ Isariyele wakatumi akendji le khumʼekanga ka Edome, wakosengasenga vati: Etawo dia shu mbeta lu kete yaye. Keli khumʼekanga ka Edome kumbetawo. Vo wakatumi akendji ndu le khumʼekanga ka Moaba, keli ndi kumbetawo. Okone Isariyele wakadjase la Kadeshe.

¹⁸ Ku vo waketi lʼusui wa shenga, wakatshimbela kete ya Edome ndu kete ya Moaba. Vo waketi lu leke lʼehutwelu ka Moaba; wakayuhanga la wedi wa Aranona. Keli vo komboto lu kete ya Moaba, ne dia Aranona eko ulelu.

¹⁹ Isariyele wakatumi akendji le Sihona, khumʼekanga kʼAmora, khumʼekanga ka Heshibona. Vo wakosengasenga vati: Etawo dia shu mbeta lu kete yaye utsha lu dihuli diatatatshu.

²⁰ Keli Sihona kumbetawo Isariyele mbeta lu kete yandi. Ndi akasanganya wudja andi tshe, wakahangi la Jahaza, wakalosha Isariyele.

²¹ Latuyalaka, Unyashungu wa Isariyele, akakimo Sihona la wudja andi tshe lu anya wa Isariyele, ku wakalembia. Okone Isariyele wakahotola kete tshe yʼasi Amora, wakadjase loko.

²² Vo wakayala akanga a kete tshe yʼasi Amora, umaka Aranona pulu ndu la Jaboka, ndu uma lʼusui wa shenga edja ndu la Jorodana

²³ Latuyalaka, Unyashungu a Isariyele, akatshanya asi Amora uma la ntundu ka wudja andi, Isariyele, ku kakiane we nangaka ndjala kanga kete yako.

²⁴ Kene kambukusha etemolatemola kaye Kemoshe, ku we hakekiti uka? Okone shu takakiti kete tshe yʼantu wakatutshanyia Latuyalaka, Unyashungu asu.

²⁵ Undi, we kuleki Balaka, onʼa Zipora, khumʼekanga ka Moaba? Ndi akami la Isariyele, kuyanga ndo la wo ta uka?

²⁶ Uhenda, deku kama shatu diambudjase Isariyele la Heshibona ndu lu esumba wa lʼokongo awo, la Aroera la lu esumba wa lʼokongo awo, la lu esumba tshe weli lʼumamu wa Aranona: okoko wana wakinyu kundjihotola lu nshi sho?

²⁷ Dimi kunkutshela kolo, keli we ambuntshela kolo dia ndjolo la mi. Latuyalaka, Umbadi, asambuli asi Isariyele lʼasi Amona elo!

²⁸ Keli khumʼekanga kʼasi Amona kununga aui wakutumela Jefeta.

²⁹ Nyuma ka Latuyalaka kakayahema Jefeta. Ndi akatenanya Ngiliyade la Manase, aketi la Mizipa ka la Ngiliyade. Uma la Mizipa ka la Ngiliyade, ndi akakendela asi Amona.

³⁰ Jefeta akatshikela Latuyalaka dokoloko ati: Naka we ayukimo asi Amona lu anya ami,

³¹ ku kene tshe kayutumba uma lu luudu lami dia ndjunungula lamʼayumukalula la ongenongeno uma le asi Amona, kayuyala ka Latuyalaka. Ku dimi layukilambula ulambu wa lutshumba.

³² Okone Jefeta akakendela asi Amona, ku Latuyalaka akakimo lu anya andi.

³³ Ndi akalembia esumba akumi ahendi uma la Aroere edja ndu la Minita ndu Abele-Keramima. Ku asi Amona wakalembiama le asi Isariyele.

³⁴ Jefeta akakalula lakandi la Mizipa. Ku onʼandi a umuntu akatumbi la ndjuhumana la ndi la ngomo, wayano wenye. Ndi aki etoi kandi kʼona; shi taki la ona pami kana ona umuntu ukina.

³⁵ Lamʼakandawenyi, ndi akatshatsha ahondo andi, akati ati: Yee! onʼami! We ambunsungutula, ambunkitsha balakata! ne dia dimi lakatshiki dokoloko le Latuyalaka, dimi haleyi dilanya!

³⁶ Ku onʼandi akawutela ati: Papa, naka we akatshiki dokoloko le Latuyalaka, ontsheli uku akayati, ne dia Latuyalaka ambukosombweya atunyi aye, asi Amona.

³⁷ Ku onʼandi akawutela ati: Keli umbukeli lu dikambu otoi ne: utukunkimo ngondo hyendi nye, dia dimi tatshwi, dimi la asikami, lu ekungu dia ntulela nshi yami yʼusekaseka ami wʼemuma.

³⁸ Ku ndi akawutela ati: Tshoka! Ndi akukimo hwe ngondo hyendi. Ku ndi akatshu ndi la asikandi lu ekungu dia ntulela nshi yandi yʼusekaseka.

³⁹ Lamʼaketi ngondo hyendi, ndi akakalula le shi, ku shi akutshela uku akandatshiki dokoloko. Ndi kumbeyana la pami. Okone dikambu diako diakayala etshelu lu Isariyele,

⁴⁰ dia ana amantu wa Isariyele ntshokaka nshi nyei lʼeleku lʼeleku, dia ntulelaka ona umantu a Jefeta, usi Ngiliyade.