Embadi 10 - La Bible en Otetela (Bible K'Ekila) 1991

Tola la Jayira Wambuyala Embadi wa Isariyele

¹ Lʼokongo wa Abimeleke, Tola onʼa Pua, onʼa Dodo, usi Isakara, akunela dia nshimbela Isariyele. Ndi akadjashi la Shamira, lu ekungu wa Efarayima.

² Ndi akayala umbadi wa Isariyele deku akumi ahendi la satu; ku ndi akavu. Wakukhunde la Shamira.

³ Lʼokongo andi, Jayira, usi Ngiliyade, akunela. Ndi akayala umbadi wa Isariyele deku akumi ahendi la pendi.

⁴ Ndi aki la ana wʼapami akumi asatu wakahemaka ladiku dia punda akumi asatu. Vo waki la esumba akumi asatu lu kete ya Ngiliyade, watuwetaka edja ndu elo vati: Havota-Jayira (kitshimudi ati: Esumba wa Jayira).

⁵ Jayira akavu, ku wakukhunde la Kamona.

Jefeta Ambushimbela Isariyele Uma le Asi Amona

⁶ Asi Isariyele wakatshi kolo lu ashu wa Latuyalaka ntu. Vo wakatemola WaBala, WaAshetarota, ndu ditemolatemola diʼasi Suriya, diʼasi Sidona, diʼasi Moaba, diʼasi Amona, ndu diʼasi Filistiya. Vo wakaseke Latuyalaka, kumbotemola ntu.

⁷ Kele ka Latuyalaka akafulanela le asi Isariyele. Ku ndi akakimo lu anya wʼasi Filistiya ndu lu anya wʼasi Amona.

⁸ Vo wakasuyaka ndu wakahotshahotshaka asi Isariyele etena kako. Vo wakasuyaka asi Isariyele wakadjashi la wedi wa Jorodana, lu kete yʼasi Amora ya la Ngiliyade, deku dikumi la enanei.

⁹ Asi Amona wakateho Jorodana dia ntolosha ndu lʼasi Juda, asi Bendjamina ndu asi Efarayima. Okone asi Isariyele wakadienaka.

¹⁰ Ku asi Isariyele wakaleli le Latuyalaka vati: Shu takakutshela kolo, ne dia takakoseke, we Unyashungu asu. Takatemola WaBala.

¹¹ Ku Latuyalaka akambula asi Isariyele ati: Aha dimi kakanyushimbela uma le asi Edjibitu, asi Amora, asi Amona ndu le asi Filistiya uka?

¹² Ndu lamʼakanyusuyaka asi Sidona, asi Amaleka, ndu asi Maona, nyu nyakaleli le mi. Undi, dimi kunyutshungula uma lu anya awo uka?

¹³ Keli nyu nyakanseke, nyakatemola ditemolatemola. Okone dimi halunyushimbela ntu.

¹⁴ Nyutshu, nyutuleli le ditemolatemola diakanyasonola, dia dio nyushimbela lu pa kanyu!

¹⁵ Ku asi Isariyele wakasengasenga Latuyalaka vati: Shu takatshi kolo, ututsheli uku alangaye. Keli dikambu otoi, etawo ntushimbela elo.

¹⁶ Ku vo wakanya ditemolatemola diʼasi wedja uma lʼatei awo. Vo wakatemolaka Latuyalaka. Ku ndi akalembe utema, ne dia asui wa Isariyele.

¹⁷ Lʼetena kako asi Amona wakamote kame, wakahangi la Ngiliyade. Ku asi Isariyele wakamote kame, wakatuhanga la Mizipa.

¹⁸ Wudja wa Isariyele, ewandji wa Ngiliyade, wakambwana vati: Untu akona ayutatela ndo lʼasi Amona? Ndi kayuyala umbuledi wʼasi Ngiliyade.