Efeso 6 - La Bible en Otetela (Bible K'Ekila) 1991

Dia Ana la Ambutshi Awo

¹ Ana, nyukitanyia ambutshi anyu le Khumadiondjo, osoku mbeli ololo.

² Olemia sho la nyo (oso keli olembe a ntundu weli la daka loko),

³ dia we mpumo lukulu lʼolo, la dia we ndjala la lulumbi la kete?

⁴ Ndu nyu washi, tanyutshaki ananyu kele, keli nyuwaudia lu elembe la lu wetshelu wa Khumadiondjo.

Dia Ehombo la Akhumewo

⁵ Ehombo, nyukitanyia aui wʼakhumenyu wa la kete la woma la lukumba, lʼutema otoi uku le Kristu,

⁶ aha olembe wa dienyanyu uku wane wangenyangenya antu, keli uku ekambi wa Kristu watutshaka lulangu la Unyashungu lu etema.

⁷ Nyakambelaki ulimu la lulangu lʼololo uku wane wakambela Khumadiondjo, aha antu.

⁸ Nyeyi nyati: Untu tshe, kana fumbi kendi kana luyadjasedi, lamʼayundutsha dikambu diʼololo wayutshela ololo pupu le Khumadiondjo.

⁹ Nyu akhumi, nyatsheli pupu, tanyuwanelaki. Nyuho nyati: Uwandji awo ndu anyu eko lʼulungu. Ndi kema la shonodi.

“Nyolote Diango Dia Ta Dia Unyashungu”

¹⁰ Diui diʼekumelu ne nti: Nyukikitali le Khumadiondjo, ndu lu wulu wa wulu andi tshe.

¹¹ Nyolote eloto tshe wa ta wa Unyashungu, dia nyu mbeya nshikikala la ntundu ka kesu tshe ya uhimbanyi.

¹² Ne dia shu hatolo ta la emunyi la dikila, keli tambolo la waulelu la akambu wa wulu, la embuledi wa la kete wa udjima one, la elui wʼedienge wa lu ahuli wa lʼulungu.

¹³ Uma lu dikambu so, nyose eloto tshe wa ta wa Unyashungu, dia nyu mbeya nshikikala lu lushi la kolo, la memala lamʼayunyushidiya akambu aku tshe.

¹⁴ Okone nyemali, nyolote mete lu kindi yanyu, nyolote engawo kʼakambu wʼololo lu tulu.

¹⁵ Nyudji elongoswelo ka lukumu lʼololo la ki lʼekulu anyu.

¹⁶ Lu akambu tshe, nyukimeli engawo ka mbetawo, okone nyayeya nyima akuwa tshe wa dja wa kanga kolo.

¹⁷ Nyose lufule la panda, la yombo ya Nyuma, yako yeli diui dia Unyashungu.

¹⁸ Lu alombelo tshe la esengosengo, nyolombaki tena tshe le Nyuma. Nyotetemali nsena, nyolombelaki ekilami tshe.

¹⁹ Nyonombelaki ndu dimi, dia dimi mbeya nfula unyo ami la dihunga, dia nshihudia dikambu diushami dia lukumu lʼololo.

²⁰ Dia dikambu so mbemi dikendji; mbukelekamimi molola, dia dimi mvuta la dihunga uku ahumbami mvuta.

Paulu Ambatumela Tukiko

²¹ Keli dia nyu mbeya akambu ami, ndu okone atshami, Tukiko, unyasu la ngandji, ukambi a kolamelu le Khumadiondjo, ayunyewuya akambu tshe.

²² Ndi kakamanyutumela dia dikambu ne, dia nyu mbeya uku wesu, ndu dia ndi nkikitsha etema anyu.

Diui DiʼEtshokwelo

²³ Ki kayali le anyasu, ndu ngandji ka mbetawo uma le Unyashungu Shesu la uma le Khumadiondjo Jesu Kristu!

²⁴ Ngandji ka mamba kayali le wane tshe walanga Khumesu Kristu la ngandji kahashili!