Efeso 5 - La Bible en Otetela (Bible K'Ekila) 1991

“Nyokendekende lu Ngandji”

¹ Okone nyukuya Unyashungu uku anʼandi wa ngandji.

² Nyokendekende lu ngandji, uku akanyulangi Kristu. Ndi akayakimo dikambu dianyu, ulambu la ulambu wa ndjakema weli la upumu wʼololo le Unyashungu.

“Kristu Ayukohetela”

³ Munanyi, akambu wa mindu tshe, kana okomiya, akambu aso tawuyalaki lʼatei anyu, keli nyuyali uku ekilami.

⁴ Ndu akambu wa sonyi, eyokayoka la sawusawu, akambu aso hawusungana. Keli ndeka ololo nyu mbukaka lusaka.

⁵ Ne dia nyu mbeyaka mete nyati: Nduku kanga munanyi, kuyanga untu a mindu, kana kanga okomiya (leli otemodi wa dikishi), ayuyala la sangu lu diulelu dia Kristu la Unyashungu.

⁶ Untu tanyudimbiyaki lʼaui wʼanyanya, ne dia uma lu akambu ako mbatuyakaka kele ka Unyashungu le akanga wʼuhedia.

⁷ Okone tanyekesanelaki la wo.

⁸ Ne dia ntundu nyu nyaki udjima, keli kakiane nyu nyambuyala yanyi le Khumadiondjo. Nyokendekende uku ana wa yanyi

⁹ (ne dia elua wa yanyi weli tshe ololo la uluwanyi la mete),

¹⁰ nyuhimbi kene kayongenyangenya Khumadiondjo.

¹¹ Tanyuyalaki engenyi wʼakambu wa udjima wahato elua, keli nyahangweli.

¹² Ne dia eko sonyi dia mvuta akambu watuwutshaka lu usheshe.

¹³ Keli akambu tshe watuhangwamelaka, watenamaka lu yanyi, ne dia akambu tshe watenamaka weko yanyi.

¹⁴ Dia dikambu so, mbakandati ati: We luladi djo, emo, ulo uma lu nyoi! Ku Kristu ayukohetela.

“Nyuyatshungweli Etena”

¹⁵ Nyewo ololo uku akakendakendanyu, aha uku dinginya, keli uku akanga a yimba.

¹⁶ Nyuyatshungweli etena, ne dia nshi nye yeko kolo.

¹⁷ Okone tanyuyalaki uku dinginya, keli nyushihudia lulangu la Khumadiondjo.

¹⁸ Tanyudjoki wanu weli la somboki loko, keli nyuludiami la Nyuma.

¹⁹ Nyutaneli kimbu la esambu wʼololo la wa Nyuma. Nyimbeli Khumadiondjo esambu wa mbandula lʼetema anvu.

²⁰ Nyukaki Unyashungu Shesu lusaka tena tshe lu akambu tshe lu lukumbu la Khumesu Jesu Kristu.

Dia Waumi la Wadiewo

²¹ Nyuyakitshakitsha la tshina diʼanyanyu lu woma wa Kristu.

²² Nyu wadi nyuyakitshakitsha la tshina dia waumenyu, uku le Khumadiondjo.

²³ Ne dia umi keli ote a wadi, uku eli Kristu ote wʼekelizia, ndame keli Ushimbedi a dimba.

²⁴ Keli nyu wadi, nyukitanyia aui a waumenyu lu akambu tshe, uku atukitanyiaka ekelizia diui dia Kristu.

²⁵ Nyu waumi, nyulangi wadienyu, uku akalangi Kristu ekelizia, akandayakimo dikambu diato,

²⁶ dia ndi nkikidia lamʼakandakiedia la diotshelo diʼashi la diui diandi;

²⁷ dia ndi ndjakenenadiya ekelizia ka lutumbu kaha la diwadi kana unyanga kuyanga engo ka wuhu ako, keli dia to ndjala ekila ndu aha la ekomo.

²⁸ Okone ntu, dieli la waumi mbuka wadiewo ngandji uku wukawo alimba avo. Untu luka wadendi ngandji, ambuyauka ndame.

²⁹ Nduku untu lahetsha dimba diandi, keli ndi atudileshaka, atudilamaka, uku Kristu la ekelizia,

³⁰ ne dia shu teko beke dia dimba diandi.

³¹ Dia dikambu ne, untu ayutshika shi la nyangu, ayumamana la wadendi, ku vo ahendi wayuyala otoi.

³² Dikambu ne dia usheshe dieko wuki, keli dimi lambuta dia Kristu la ekelizia.

³³ Keli pami tshe ukaki wadendi ngandji uku ayaukandi ndame, ndu wadi alemiaki umendi.