Efeso 4 - La Bible en Otetela (Bible K'Ekila) 1991

“Yediko ya Elulelu Tshe ka Kristu”

¹ Okone dimi, usi lukanu le Khumadiondjo, lambunyosengasenga nti: Nyokendakendaki ololo uku leta lakanyetama,

² la ndjakitshakitsha tshe ndu memakana, ndu la ndjakimela, ndu nyimanyanyiana kolo la ngandji.

³ Nyutetemali dia nama utundu wa Nyuma lu dimama dia ki.

⁴ Eko dimba otoi, la Nyuma otoi, uku akanyetama lu elungamelu otoi ka leta lanyu.

⁵ Khumadiondjo otoi, mbetawo otoi, batiza otoi,

⁶ Unyashungu otoi la Shesu shu tshe, leli ladiku dia tshe, uma lu tshe ndu lu tshe.

⁷ Keli wakatusha ngandji ka mamba untu lʼuntu uku yediko ya ushasha wa Kristu.

⁸ Diako mbakandati ati: Lamʼakandambela utsha lʼulungu, ndi akatole ului fumbi, Akasha antu eshasha.

⁹ (Diui ne ati: Ndi akambela, dio hadiutenya ati: Ndi akahulo ndu utsha lu ahuli wa la tshina dia kete uka?

¹⁰ One lakahulo, ndʼako kakambela ladiku dia ulungu tshe, dia ndi ndudia diango tshe).

¹¹ Ndi akasha amotshi dia ndjala atumami; amotshi amvutshi; amotshi amembi wa lukumu lʼololo; amotshi esambisha la embetsha.

¹² Ne dia nduwanya ekilami, dia vo ntsha ulimu wa nkimanyia aikna, dia mpika dimba dia Kristu,

¹³ edja ndu shu tshe tambumamana lʼutundu wa mbetawo, wa yimba yʼOnʼa Unyashungu, edja ndu tambuyala dikumanyi diʼapami, lu yediko ya diema yʼelulelu ka Kristu.

¹⁴ Diaha shu ntshikala uku akenda, diaha nsutshasutshama la pepe tshe ya dietshelu, uma lu yewu yʼantu, lu lukesu la munganyiya antu.

¹⁵ Keli tutaki mete lu ngandji dia shu mbula lu akambu tshe le Kristu ndame, one leli ote.

¹⁶ Dimba tshe diambusanganyema uma le ndi, ndu diambumamanyema kame la asonga tshe, uku atsha beke tshe leke la leke, dia mbudia dimba, dia dio mpikama lu ngandji.

Alaku Amotshi: “Nyolote Untu Uyuyu”

¹⁷ Dimi lambuta diui ne okone, ndu lambunyenya le Khumadiondjo nti: lanyutshaki ntu uku atutshaka asi wedja, lu tunginyanginya ta tumba tawo.

¹⁸ Tu kanyi tawo tambuyala udjima lu ewu kawo. Vo wakangana uma lu lumu la Unyashungu, ne dia tunginyanginya tawo, ne dia ekikitshelu kʼetema awo.

¹⁹ Vo wambuyala akanga a lunyu, wambuyakimo lu akambu wa sonyi, dia ntsha akambu tshe wa mindu la saki ka wulu.

²⁰ Keli nyu kumbeka Kristu osoku —

²¹ naka nyu nyakukela Kristu, nyaketshama le ndi, lu akambu wa mete weli le Jesu.

²² Nyunya ditshelu dia wuhu anyu wa ntundu, untu edjedja, latulanaka dia ndjela saki ya lukesu.

²³ Nyuyali la tumba tʼeyuyu,

²⁴ nyolote untu uyuyu, lakatungama lu ololo la ekila ka mete le Unyashungu.

²⁵ Nyunya kashi, nyutanelaki akambu wa mete, untu la unyandi, ne dia beke dia dimba otoi mbesu, shu tshe untu lʼuntu.

²⁶ Nyuki kele, ku tanyutshaki kolo. Unya tadjelaki kele kanyu.

²⁷ Tanyushaki uhimbanyi dihuli.

²⁸ One latuvaka, tavaki. Keli ndi akambi ulimu, atshi akambu wʼololo lʼanya andi, dia ndi ndjala la diango dia mbisha one lahumba.

²⁹ Diui dia kolo tadiutumbaki uma lʼenyo anyu, keli paka aui wʼololo, weya mbudia antu uku ahumbawo, ne dia nfudiya wane wuka ngandji ka mamba.

³⁰ Tanyunyangiaki Nyuma kʼOlolo ka Unyashungu, nyu nyakadjama djimbitelu uma le ndi edja ndu lushi letshungwelu.

³¹ Yenyi tshe, la lutunu, la kele, la utshanu, la etenganelu, la wehu tshe wa somboki, wamo uma le nyu.

³² Nyukani ketshi, nyuyali la memakana, nyudimanyanyiani uku akanyudimanyiya Unyashungu dikambu dia Kristu.