Efeso 2 - La Bible en Otetela (Bible K'Ekila) 1991

Panda Uma lu Ngandji ka Mamba

¹ Ndi akanyete la lumu lamʼakinyu edu uma lu ehedia anyu la kolo yanyu.

² Nyu nyakakendakenda lu akambu aso, uku atokendakendaka wa la kete nye, uku uwandji a wulu wa lopepe, wa nyuma katukambiaka ana a pami wʼuhedia.

³ Ndu shu tshe takakendakendaka lʼatei awo ntundu la saki yʼalimba asu, takayelaka saki yʼalimba asu la tukanyi tasu, takuto ana wa kele, uku aki akina.

⁴ Keli Unyashungu eko ongonyi lu akambu wa ketshi, ne dia ngandji kandi ka wuki kakandatuki.

⁵ Ndu lamʼakisu edu, ndi akatulula kame la Kristu (uma lu ngandji ka mamba, kakanyashimbamela).

⁶ Ndi akatulula kame la ndi, akatudjasha la ndi lu ahuli wa lʼulungu le Kristu Jesu,

⁷ dia ntenya ongonyi wʼutamanya wa ngandji kandi ka mamba, lu memakana kandi uya le su, le Kristu Jesu lu tena diayayi.

⁸ Ne dia nyu nyakashimbamela uma lu ngandji ka mamba dia mbetawo, aha uma le nyu nyame, keli ushasha uma le Unyashungu —

⁹ aha uma lu etsha, dia untu tayatumbulaki.

¹⁰ Ne dia shu teko ulimu andi, takatungama le Kristu Jesu dia ntsha elimu wʼololo, wakatolongoswela Unyashungu ntundu dia shu nkendakenda loko.

Lumu lʼUyuyu le Kristu

¹¹ Okone nyuho nyati: Ntundu nyu nyaki asi wedja lu diutwelu, la wane waketama vati: Ambahemi wʼehekeli, watahemaka ehekeli lʼalimba awo, wakanyeti vati: Nyaha ambahemi wʼehekeli —

¹² Nyuho nyati: Lʼetena keso, nyu nyakakakitwama uma le Kristu, nyakangana uma lu diulelu dia Isariyele, nyaki angendangenda lu tuseki ta daka. Nyu tanyaki la elungamelu, tanyaki la Unyashungu lu kete nye.

¹³ Keli kakiane, nyu wane waki etali le Kristu Jesu, nyambusukana lu dikila dia Kristu.

¹⁴ Ne dia ndi keli ki kasu, akatete otoi, ndu akahandjula eheli kʼatanyelu kaki lʼatei.

¹⁵ Ndi akalanya lutunu la dimba diandi, olembe wa elembe waki la adjangu, dia ndi ntunga untu uyuyu otoi uma le ndi ndame lu dihuli dia ahendi, dia ntunga ki.

¹⁶ La dia mbaekesanyiya lu dimba otoi le Unyashungu uma lʼutamba a mpeketanya, wakandadiaki lutunu.

¹⁷ Ndi akayi, akanyusambisha ki nyu wane waki etali, ndu ki le wane waki suki.

¹⁸ Ne dia uma le ndi mbeyasu ndja le Shesu lu Nyuma otoi.

¹⁹ Okone nyu kema angendangenda kana efaki ntu, keli nyu nyeko asi wudja kame la ekilami ndu asi khumbu ka Unyashungu.

²⁰ Nyu nyambuhikama ladiku dia tshina dia atumami la amvutshi. Kristu Jesu ndame keli dive dia wuki dia tshuku.

²¹ Ehikahika tshe kambumamanyema kame la ndi, kambudiama dia ndjala etemwelo kʼekila le Khumadiondjo.

²² Ndu nyu nyambuhikama kame le ndi, dia ndjala edjaselu ka Unyashungu lu Nyuma.