Efeso 1 - La Bible en Otetela (Bible K'Ekila) 1991

Ambatumela Moyo

¹ Paulu, utumami wa Kristu Jesu uma lu lulangu la Unyashungu. Le ekilami weli lʼEfeso, la le akanga wa kolamelu le Kristu Jesu:

² Ngandji ka mamba kayali le nyu, ndu ki kʼuma le Unyashungu Shesu, la Khumesu Jesu Kristu!

Etshoko wa Unyashungu Uma le Jesu Kristu

³ Unyashungu Shi Khumesu Jesu Kristu, lakatotshokola la etshoko tshe wa Nyuma lu ahuli wa lʼulungu le Kristu, atumbwami!

⁴ Uku akandatosonola la ntundu kʼetungelu kʼandja, dia shu ndjala wʼekila, waha la unungu la ntundu kandi lu ngandji,

⁵ mbakandatosonola dia shu ndjala ekito uku anʼandi uma le Jesu Kristu, uku lulangu landi.

⁶ Lu diandu dia lutumbu la ngandji kandi ka mamba kakandatusha ushasha lu dikambu dia ulangimi andi,

⁷ etshungwelu keso keko le ndi uma lu dikila, lu edimanyelu ka kolo yasu, uku weli ongonyi wa ngandji kandi ka mamba,

⁸ kakandatongonya lu yimba tshe la ewu.

⁹ Ndi akatewuya dia akambu wa usheshe, dia lulangu landi lakandasonola,

¹⁰ dia ntukutshiya dikukelu diʼenonyi, ne dia nsanganya diango tshe le Kristu, ndu dia lʼulungu, ndu diango dia la kete.

¹¹ Uma le ndi mbakatayala ekito; wakatosonola uku aki esangweyu ka one latutshaka akambu tshe uku awetsha lulangu landi,

¹² ne dia shu ndjala la diandu dia lutumbu landi, shu wane wakalungamela Kristu ntundu.

¹³ Nyu nyakuki diui dia mete le ndi, lukumu lʼololo la panda kanyu. Nyu nyakawetawo, nyakadjama tulimbitelu ta Nyuma kʼololo ka daka,

¹⁴ keli uku okole wʼukito asu, lu etshungwelu ka kene tshe keli ka Unyashungu, ne dia lutumbu landi.

¹⁵ Dia dikambu ne, ndu dimi lakuki lukumu la mbetawo le Khumadiondjo Jesu, keli lʼatei anyu, ndu ngandji kenyanyu ekilami tshe.

¹⁶ Dimi halaheko mbuka lusaka dikambu dianyu. Dimi latunyudimulaka lu alombelo ami,

¹⁷ dia Unyashungu a Khumesu Jesu Kristu, Shesu ka lutumbu, nyusha etema wa yimba la wʼenyelo lu ewu kandi;

¹⁸ dia ashu wʼetema anyu mpeta; dia nyu mbeya kakona keli elungamelu ka leta landi, kakona keli ongonyi wa lutumbu wa ukito andi le ekilami.

¹⁹ Ndu dia mbeya wuki akona wahangone wa wulu andi le su, shu wane wetawo, uku eli ulimu wa wulu andi wa mamba,

²⁰ wakandatshi le Kristu, lamʼakandawulula uma lu nyoi, ndu lamʼakandawudjasha lu lunya landi la pami lu ahuli wa lʼulungu,

²¹ ladiku dia diulelu tshe, luwandji, wulu la diahamelu, ndu dia lukumbu tshe lambolame aha lu andja ane atu, keli ndu lu andja wayayi.

²² Ndi akakitsha diango tshe latshina dia ekulu andi, ndu akukitsha ote wʼakambu tshe wʼekelizia,

²³ kako keli dimba diandi, eludielu ka one latuludiaka tshe lu tshe.