Danyele 9 - La Bible en Otetela (Bible K'Ekila) 1991

Danyele Ambolombela Wudja Andi Awashwela Kolo Yawo

¹ Lʼeleku ka ntundu ka diulelu dia Dariyo, onʼa Ahasuero, usi Mediya, lakayala khumʼekanga lu diulelu dia asi Kaladiya —

² lu eleku ka ntundu ka diulelu diandi dimi, Danyele, lakalimbitela uma lu afundelu nti: Deku akumi esambeli diayeta ne dia alanyelu wa Jerusalema, uku deku diakatela Latuyalaka umvutshi Jeremiya.

³ Dimi lakediya elundji kami utsha le Khumadiondjo Unyashungu, dia mbuyanga lu dombelo lʼosengosengo, lʼekilelu ka ma, lu elotelo kʼakutu ndu lu etelu kʼutuku.

⁴ Dimi lakalombe Latuyalaka Unyashungu ami, lakashula kolo nti: Latuyalaka Unyashungu li, we eko wuki ndu woma! We katulamaka sheki yaye, ndu katukaka wane watukukaka ngandji ndu watulamaka elembe aye ngandji ka shikaa.

⁵ Shu takatshi kolo, takayala la uhedia, takayala atshi wa kolo ndu akanga wʼuhedia, taketola uma lʼelembe aye la adjangu aye.

⁶ Shu kumbukela ekambi aye amvutshi wakateketaka la khumi ya dikanga yasu, ewandji asu, washesu, ndu la antu tshe wa lu wudja lu lukumbu laye.

⁷ Khumadiondjo li, le ye keli ololo. Keli le su, paka ufutanu utu la dundji uku lushi lone, le asi Juda, le asi Jerusalema la le asi Isariyele tshe weli lasuki ndu weli etali, lu kete tshe yakawatshanyama, ne dia kolo la ehedia wakawakuhediaka.

⁸ Khumadiondjo li, shu tambuyala la ufutanu lu dundji, shu la khumi ya dikanga yasu, ewandji asu, ndu washesu, ne dia shu takakutshela kolo.

⁹ Ketshi la edimanyelu keko le ye, we Khumadiondjo Unyashungu asu, ne dia shu takakotombokwela.

¹⁰ Shu kunanga diui diaye we Latuyalaka, Unyashungu asu, dia ndjela elembe aye uma le ekambi aye amvutshi.

¹¹ Mete, shu Isariyele tshe takahedia elembe aye, taketola diaha shu nkitanyia elembe aye. Okone mananu la dokoloko wakafundama lu elembe wa Mose, ukambi aye, we Unyashungu, wakayala le su, ne dia shu takakutshela kolo.

¹² We ambushidiya aui wakayati lu dikambu diasu, ndu lu dikambu diʼembuledi asu wakatolombolaka lamʼambuyututumela elanyelu kene ka wuki, ne dia dikambu ne diakayala la Jerusalema, diatayala nduku lʼesi ulungu wʼutundu.

¹³ Uku akafundama akambu ane lu elembe wa Mose, mbambuya elanyelu kene tshe le su, keli shu kunkosengasenga we Latuyalaka, Unyashungu asu. Shu kunkadimo uma lu ehedia asu kuyanga mbidja tukanyi tasu lu akambu aye wa mete.

¹⁴ Okone Latuyalaka akatulamela elanyelu kene. Ku we akatutumelato, ne dia we Latuyalaka, Unyashungu asu, eko ololo lu elimu tshe watuyutshaka, keli shu kunkitanyia diui diaye.

¹⁵ Kakiane we Khumadiondjo, Unyashungu asu, we lakatundja wudja aye uma lu kete ya Edjibitu la lunya laye la wulu, ndu lakayatungela lukumu la wuki uku welo elo, shu takatshi kolo, takatshi kolo efula.

¹⁶ Khumadiondjo li, dimi lambukosengasenga nti: Uma lu wuki wʼololo aye, unya kele kaye la ududu aye uma lʼusumba aye, Jerusalema, ukungu aye wʼekila. Ne dia uma lu kolo yasu ndu uma lu kolo ya washesu, Jerusalema la wudja aye wambuyala engo ka dionyo le waku tshe weli lʼutshimba asu.

¹⁷ Kakiane we Unyashungu asu, uki dombelo diami la esengosengo ami, dimi ukambi aye. Ndu ne dia lutumbu laye, we Khumadiondjo, ohetsha elundji kaye ngaingai ladiku diʼetemwelo kaye kakalanyema.

¹⁸ Unyashungu ami, uhuki tui, ulungi, udihuli ashu aye, endi alanyelu asu ndu usumba wakawetaka lukumbu laye. Shu hatutukosengasengaka uma lʼololo asu, keli uma lu ketshi kaye ka mamba.

¹⁹ Latuyalaka li, ulungi; Latuyalaka li, udimanyia; Latuyalaka li, uhuke tui! Ne dia dikambu diaye, we Unyashungu ami, ndu ne dia watetaka usumba aye la wudja aye lukumbu laye, utshi, tutshimbatshimbaki.

Etelu kʼAkambu Wahatayi Dia Bingu Akumi Esambeli

²⁰ Dimi lakateketa ntu, lakalombe, lakashula kolo ka wudja ami Isariyele, ndu lakasengasenga Latuyalaka, Unyashungu ami, lu dikambu dia ukungu andi wʼekila.

²¹ Kamʼakamalombaka, Ngabiriyele, untu lakamenyi lu enelo lʼetatelu, akayi luwangu uya le mi lʼetena ka nambula ulambu wa dikolo.

²² Ndi akayumvutela ati: Danyele li, dimi lambuya kakiane dia ndjuketsha akambu wa yimba ndu wa ewu!

²³ Kamʼakayatatela nomba, diui diakayi, ku dimi lambuya dia ndjukuteladio, ne dia we eko ulangimi. Okone ukani yimba lu dikambu ne, ulimbiteli enelo kene.

²⁴ Bingu akumi esambeli ya deku yakasonwama lu dikambu dia wudja aye, ndu lu dikambu dia usumba aye wʼekila dia nshidiya uhedia, dia nkumiya kolo, dia ntunga ekesanelu dikambu diʼuhedia, la dia nshikike sambu kʼololo pundju; dia nshikike enelo la aui wʼakambu wahatayi, ndu dia nkidia dihuli diʼuleki ekila.

²⁵ Eyi, ndu ulimbiteli wati: Umaka edjelu kʼolembe wa nongosola la mpika Jerusalema ntu, edja ndu eyelu kʼolo-mbodi, ukitami wʼiso, ayuyala bingu esambeli. Ku lʼatei a bingu akumi asamalu la hyendi, Jerusalema ayuhikama ntu, esese awo la lungeli lawo wayolongoswama, nshi sho yayuyala nshi ya pa.

²⁶ Lʼokongo wa bingu akumi asamalu la hyendi, ukitami wʼiso ayunyema, la ndi huyala la ukito, ku wudja wʼuwandji omotshi ayuyulanya usumba la etemwelo. Ekumelu kawo kayuyala uku atuyakaka elula, la ata wayuyalaka edja ndu lʼekumelu; alanyelu wambushikikema.

²⁷ Ndi ayudja la antu efula sheki ya wulu yediko ya lubingu otoi. Ku lʼatei wʼetenyi otoi ka hendi ka lubingu, ndi ayukumiya ulambu la ulambu wa lutshumba. Unanyishi ako ayutsha akambu wuleki wononyi edja ndu akambu wakasanguyama ntshama lu ekumelu wayuyala la diku diandi.