Danyele 1 - La Bible en Otetela (Bible K'Ekila) 1991

Wetshelu le Danyele la Engenyi Andi

¹ Lʼeleku ka satu ka diulelu dia Jehoyakima, khumʼekanga ka Juda, kakayi Nebukadineza, khumʼekanga ka Babilona, dia ndjolosha Jerusalema, akayidingi.

² Khumadiondjo akakimo Jehoyakima, khumʼekanga ka Juda lu anya andi, kame la diango dimotshi diʼulimu diʼuma lu luudu la Unyashungu. Nebukadineza akaditole utsha lu kete ya Shinare, lu luudu la etemolatemola kandi. Ndi akatudiotshiya lu luudu la eumbelu lʼetemolatemola kandi.

³ Khumʼekanga akatela Ashepenaza, olombodi wʼelenga andi, dia ndi mbela asi khumbu ka khumʼekanga ndu kʼantu a waki amotshi wʼasi Isariyele;

⁴ elongo wʼapami wʼamena waha la ekomo, akanga wa ewu tshe, wuludi la yimba, weya akambu wʼandja, wukuki nkamba ulimu lu luudu la khumʼekanga, la dia ndi mbaetsha akambu wa yimba la oteketa wʼasi Kaladiya.

⁵ Khumʼekanga akawashaka mbu ya nde yʼololo yakandalekaka ndame la lushi la lushi, ndu wanu wakandanokaka. Ndi akati dia vo mbetshama deku satu. Ku lʼekumelu ka deku satu, vo kawemali la ntundu kandi.

⁶ Lʼatei wʼasi Juda ako kaki antu ane: Danyele, Hananiya, Mishaele la Azariya.

⁷ Olombodi wʼelenga akawaole khumbu kina. Ndi akole Danyele: Beleteshaza; Hananiya, Shadaraka; Mishaele, Meshake; la Azariya, Abede-Nengo.

⁸ Danyele akasanguya lʼutema andi diaha ndi ndjalanya la ma diakalekaka khumʼekanga, kuyanga la wanu wakandanokaka. Diako mbakandalombe olombodi wʼelenga diaha ndi ndjalanya.

⁹ Unyashungu akahumuya Danyele lukulu lʼolo lu ashu wʼolombodi wʼelenga.

¹⁰ Olombodi wʼelenga akatela Danyele ati: Dimi mbukaka khumemi khumʼekanga latukushaka mbu ya nde la ya no woma. Ukundi ukukindi nyena weondju uleki elongo wʼapami ekina wa lolonga lanyu? Lu dikambu ne, we ambuyanga ote ami le khumʼekanga.

¹¹ Ku Danyele akatela ulami wakakitsha olombodi wʼelenga ladiku dia Danyele, Hananiya, Mishaele la Azariya ati:

¹² Dimi lambukosengasenga nti: Utukutuhimba, shu ekambi aye, nshi dikumi. Watushaki djese tshu ya nde la ashi wa no.

¹³ Lʼokongo diku, kendi alimba asu kame la alimba wʼelongo wʼapami watolekaka mbu ya nde yatolekaka khumʼekanga, keli kututsheli, shu ekambi aye, uku ayuyutena.

¹⁴ Ndi akawaukela lu dikambu so, akahimbi nshi dikumi.

¹⁵ Lamʼaketi nshi dikumi, dundji diawo diakayala amena, la alimba awo wakayala ashi atu uleki elongo wʼapami wakalekaka mbu ya nde yakalekaka khumʼekanga.

¹⁶ Okone ulami akanya mbu ya nde ya khumʼekanga la wanu wakawawashaka, ku akawashaka djese tshu.

¹⁷ Unyashungu akasha elongo wʼapami ene enei yimba lu akambu tshe wʼandja la ewu. Danyele akeyaka nsakula alo la waenelo tshe.

¹⁸ Lamʼakakuki nshi yakasonola khumʼekanga Nebukadineza, olombodi wʼelenga akatshu, akatemala la wo la ntundu kandi.

¹⁹ Khumʼekanga akasawula la elongo wʼapami ako, ku lʼatei awo tshe ndi kuntana nduku untu lakedimi la Danyele, Hananiya, Mishaele la Azariya. Okone ndi akawaotshiya lʼulimu andi.

²⁰ Lu akambu tshe wa ewu la yimba wakawambula khumʼekanga, ndi akatani la yimba tena dikumi uleki akanga wʼaloho la asaki wʼawulu wa lu diulelu diandi tshe.

²¹ Danyele akatshikala leko edja ndu lʼeleku ka ntundu ka diulelu dia khumʼekanga Kuro.