Amose 9 - La Bible en Otetela (Bible K'Ekila) 1991

Dumbwelu Dia Latuyalaka Diaha Dia Mpanda

¹ Dimi lakenyi Latuyalaka emadi Lasuki lʼediakelu; ndi akati ati: Okomole ete wa dikoho, edja ndu ekongo wambusukasuka, Udiatshatsha ladiku diʼete wʼantu tshe. Dimi layudiaka wane wayutshikala la yombo, Nduku otoi awo ayulawo, Ndu nduku otoi awo ayuhanda.

² Kuyanga vo wayutsho lʼUdimu a Pengandu, Lunya lami layutuwanda leko. Kuyanga vo wayumbela lʼulungu, Dimi layahuluya uma leko.

³ Kuyanga vo wayushama lʼote wa Karamele, Dimi layayangiayangia, layutuwanda leko. Kuyanga vo wayushama uma lu ashu ami Lu ohongo wʼashi a waki, Dimi layutela ului, Ku vo wayalumata leko.

⁴ Kuyanga vo wayutsho lu fumbi la ntundu kʼatunyi awo, Dimi layutela yombo, ku yo yayadiaka leko. Dimi layedia ashu ami le wo, Dia mbatshela kolo, aha ololo.

⁵ Khumadiondjo Latuyalaka Kanga lulimbilimbi, Katunandaka kete, ku yo ndelo. Ku wane wudjashi loko watuyalaka lʼutanda. Yo yayumbela yo tshe uku Nile ka lʼEdjibitu, Ku yo yayukitakitaka uku atukitakitaka Nile.

⁶ One latuhikaka mvudu yandi ya ladiku lʼulungu, Latu ikaka atshina wa sendele yandi ladiku dia kete; One latetaka ashi uma lʼashi a wuki, Ndu latatshululaka ladiku dia kete: Latuyalaka, keli lukumbu landi.

⁷ Latuyalaka kambula ati: Nyu asi Isariyele, nyu kema uku asi Etiyopiya le mi uka? Dimi kumbeli Isariyele uma lu kete ya Edjibitu, Ndu asi Filistiya uma ia Kafetore, La asi Suriya uma la Kire?

⁸ Nyulungi, ashu ami, dimi Khumadiondjo Latuyalaka, Weko le diulelu dia kolo. Dimi layudilanya ladiku dia kete, Tshikima khumbu ka Jakoba ketu kahamulanya tshe, Mbata Latuyalaka.

⁹ Enda, dimi layuta diui, Layuyunga khumbu ka Isariyele lʼatei a wedja tshe, Uku atuwuyungaka ahoho lu djungo, Ku aha nduku lotongo nko la kete.

¹⁰ Atshi wʼakambu wa kolo tshe wa lu wudja ami, Watutaka vati: Elanyelu hutunda, kuyanga mpumana la su; Vo wayuvo la yombo.

Eulwelu ka Isariyele

¹¹ Lushi lako, dimi layunyia etumbu ka Davidi kakanyuko. Dimi layolongosola ahuli wakatatundo, Layolongosola ahuli wakatalana. Dimi layukihika uku akito lu nshi ya ntundu,

¹² Dia vo nkita atshikadi wa Edome, La wedja tshe wetama lukumbu lami, Mbata Latuyalaka, lambutsha dikambu ne.

¹³ Enda, nshi yayuyala, Yayuyela ukambi ekambo umunyi, La uhinyi wʼelua one latuneka wehu. Ekungu wayolosha wanu wa mpe, La akuna wayolelo.

¹⁴ Dimi layukaluya ongonyi Wa wudja ami Isariyele. Vo wayuyuhika esumba wakalana, wayudjase loko. Vo wayune ekodi wa vinyo, Wayono ashi wʼelua awo. Vo wayukamba dikambo ntu, Wayole ema wʼuma loko.

¹⁵ Dimi layashikibe lu kete yawo, Vo hawunyemaki ntu panaju Uma lu kete yakamawasha, Mbata Latuyalaka, Unyashungu anyu.