Amose 4 - La Bible en Otetela (Bible K'Ekila) 1991

Isariyele Kunduwana Uma lu Asui wa Unyashungu

¹ Nyu ngombe ya wadi ya la Bashana yeli lʼukungu wa Samariya, Nyulungi diui ne; Nyu wane watusuyaka asi wula, watohotshahotshaka ehumbi, Watutelaka waumewo nyati: Nyela, tuyono!

² Khumadiondjo Latuyalaka akatshibi lu ekila kandi ati: Nyulungi, nshi yayuya dikambu dianyu, Yayuwunyuhatula la tokoho, la tukanula tanyu la todi.

³ Nyu nyayutumba lu ahuli wayunyuko lukumbu, Untu lʼuntu lu mbuka kandi. Ku nyayuyakadja lʼukungu wa Haramona, Mbata Latuyalaka.

⁴ Nyutshu la Betele, nyututshi kolo. Nyutshu la Ngilingala, nyututshi kolo utamanya. Nyulambulaki elambu pindju tshe, La tenyi dianyu dia dikumi lamʼayetaka nshi shatu.

⁵ Nyukimoki elambu wʼeukelu ka lusaka weli la edya. Nyuti diui dia elambu wa lulangu, Nyudianganya lukumu dikambu diawo, Ne dia dikambu diako mbatunyulangaka, nyu asi Isariyele, Mbata Khumadiondjo Latuyalaka.

⁶ Dimi lakanyutumela ndjala ka kasha Lu esumba anyu tshe, Ndu uhumba wa ma lu ahuli anyu tshe. Keli nyu kunkalula le mi, mbata Latuyalaka.

⁷ Dimi lakanyudimi mvula ngondo shatu La ntundu ka dinela. Dimi lakalosha mvula lʼusumba omotshi, La aha nkilosha lʼusumba ukina. Mvula akalo lu ekambo kemotshi. Keli lu ekambo kekina kakito kondo, diango diakumi.

⁸ Wa lu esumba ehendi kana esatu, Wakatshu utsha lu esumba ekina Dia ntuyanga ashi wa no. Keli vo kumunduya pusa. Kuyanga osoku, nyu kunkadimo le mi, mbata Latuyalaka.

⁹ Dimi lakanyutumela elanyelu ka mbu ya nde. Endjo wakali efula ka diango dia lu dikambo dianyu, Ekodi anyu wa vinyo, etamba anyu wa fingu, La etamba anyu wa mbeli. Keli nyu kunkalula le mi, mbata Latuyalaka.

¹⁰ Dimi lakatumi asui lʼatei anyu Wuhu waki lʼEdjibitu. Dimi lakadiaki elongo anyu wʼapami la yombo, Lakandamia punda yanyu. Dimi lakanyukia sulu ka lu pangu kanyu lu ehembe anyu, Keli nyu kunkadimo le mi, Mbata Latuyalaka.

¹¹ Dimi, Unyashungu, lakalanya esumba anyu, Uku akamalanya Sodoma la Ngomora. Nyu nyakayala uku efuki ka dja Kakawatundja uma lu etshumbelu, Keli nyu kunkalula le mi, Mbata Latuyalaka.

¹² Diako mbayumunyusuya wuhu ako, nyu Isariyele. Ne dia dimi layunyusuya wuhu ako, Nyuyalongosole dia mpumana la Unyashungu anyu, nyu Isariyele.

¹³ Nyulungi, one lakatshi ekungu ndu lakatungi lopepe, Latulimbitshiyaka antu tukanyi tandi, Latukadimulaka pindju udjima, Ndu latokendakendaka ladiku diʼahuli wa ladiku dia kete, Latuyalaka, Unyashungu Kanga lulimbilimbi, Keli lukumbu landi.