Amose 1 - La Bible en Otetela (Bible K'Ekila) 1991

Dumbwelu le Asukanyi wa Isariyele

¹ Onʼeli aui wa Amose, laki lʼatei wʼalami wʼekoko wa la Tekoa, lakenyi waenelo lu dikambu dia Isariyele, lu nshi ya Uziya, khumʼekanga ka Juda, ndu lu nshi ya Jeroboama, onʼa Joashi, khumʼekanga ka Isariyele, deku pendi la ntundu kʼedidimelu ka kete.

² Ndi akati ati: Latuyalaka ambudikita uma la Siona, Ambukia diui diandi uma la Jerusalema. Adiyu wʼalami wʼekoko weko lʼutanda; Ote wʼukungu wa Karamele wambuma.

³ Okone mbata Latuyalaka ati: Ne dia ehedia esatu, ee, enei wa Damaseke, Dimi halukaluya sui uma loko, Ne dia vo wakakutula mbulu ya lukutula Ladiku dia Ngiliyade.

⁴ Keli dimi layutuma dja lu luudu la khumʼekanga Hazaele, Ku yo yayutshumba mvudu ya khumʼekanga Bene-Hadada.

⁵ Dimi layokola kengeti ya Damaseke. Dimi layushila wane wudjashi lʼukidi wa Avena. La one lukimedi danga dia diulelu Diʼuma lu khumbu ka Bete-Edena ushiki. Ku wudja wa Suriya wayutsho utsha lu lohombo la Kire, Mbata Latuyalaka.

⁶ Okone mbata Latuyalaka ati: Ne dia ehedia esatu, ee, enei wa Ngaza, Dimi halukaluya sui uma loko; Ne dia vo wakatole ului wʼantu lu fumbi Dia ntakimo le Edome.

⁷ Dimi layutuma dja lu peli dia Ngaza, Ku yo yayutshumba mvudu ya Khumʼekanga yeli loko.

⁸ Dimi layushiia wane wudjashi la Ashidoda, Ndu one lukimedi danga dia diulelu Dia Ashikelona ushiki. Dimi layukaluya lunya lami dia ndosha Ekerona; Ku atshikadi wʼasi Filistiya wayudiakema.

⁹ Okone mnata Latuyalaka ati: Ne dia eledia esatu, ee, enei wa Tura, Dimi halukaluya sui uma loko; Ne dia vo wakakimo ului wʼantu le Edome, Kumbuho sheki yʼuntu la onangu.

¹⁰ Dimi layutuma dja lu peli dia Tura, Ku yo yayutshumba mvudu ya khumʼekanga ya loko.

¹¹ Okone mbata Latuyalaka ati: Ne dia ehedia esatu, ee, enei wa Edome, Dimi halukaluya sui uma loko, Ne dia vo wakayeli anengewo la tombo, kumbauka ketshi. Ne dia kele kawo kukawatshatshaka nshi tshe, Okone ndi akalami ududu andi pundju.

¹² Dimi layutuma dja lu Temana, Ku yo yayutshumba mvudu ya khumʼekanga Bozera.

¹³ Okone mbata Latuyalaka ati: Ne dia ehedia esatu, ee, enei wʼasi Amona, Dimi halukaluya sui uma loko; Ne dia vo wakati akundju wʼamantu Akanga a waemi wa la Ngiliyade, Dia vo nsekola elelu awo.

¹⁴ Keli dimi layuhetsha dja lu peli dia Raba. Yo yayutshumba mvudu ya khumʼekanga ya loko, Kame la tukuku tʼalelu lu lushi la ta, Ndu kame la luhunga lu lushi la ngimbi.

¹⁵ Ku khumʼekanga kawo ayotolama utsha lu fumbi, Kame la ewandji andi, mbata Latuyalaka.