2 Timote 4 - La Bible en Otetela (Bible K'Ekila) 1991

Elimu wʼUkambi wa Khumadiondjo

¹ Dimi lambukokokomiya lu ashu a Unyashungu ndu wa Kristu Jesu, one layulumbuya wasena ndu wakavu, ndu uma lu enelo kandi la diulelu diandi nti:

² Usambishaki diui; utetemalaki mbatela lu tena diʼololo la tena dia kolo; uwaenyaki akambu awo, uwaewulaki, akokomiyaki la memakana tshe la wetshelu.

³ Etena kayukuka lamʼahulanga antu ntetemala lu dietshelu diʼololo, keli ne dia atui awo weko hwe, ku vo wayuyamotshiya embetsha uku saki yawo.

⁴ Vo wayunya atui uma lu mete wavetola lu ekondo.

⁵ Keli we, uyakimeli lu akambu tshe, enaki pa, utshaki ulimu wʼusambisha, ukutshaki ekambelu kaye.

Ta DiʼOlolo Dia Nama Mbetawo

⁶ Dimi lambuyalongosolaka dia ndjala ulambu, ndu etena ka dimi ntsho ambukuka.

⁷ Dimi lakalo ta diʼololo, lambushidiya esakelu ka luwangu, lakalami mbetawo.

⁸ Okone wambunkitshiya dembo dia kusu diʼakambu wʼololo, diayumbisha Khumadiondjo, umbadi wʼololo, lushi lako. Ndi liumbishadio dime, keli ndu wane tshe wakalangi mena enelo kandi.

Akambu Wakayala le Paulu

⁹ Usamanya uya le mi.

¹⁰ Ne dia Demasi akanseke, akalangi akambu wa la kete nye, akatshu la Tesalonika; Keresena akatshu la Ngalatiya, Tito akatshu la Dalamatiya.

¹¹ Paka Luka utu keli la mi. Osa Mako, keli uyi la ndi, ne dia ndi nkukaka nkimanyiami lʼulimu.

¹² Keli dimi lakatumi Tukiko lʼEfeso.

¹³ Lamʼayuyuya, kela koti diakamatshiki la Toroa laka Karapo, ndu abuku, djekaleka abuku wa dikuhu.

¹⁴ Alesandere, utshudi a wedjulu, akantshela kolo efula. Khumadiondjo ayuwutshela uku etsha andi.

¹⁵ Ndu we, uwewoki, ne dia ndi akatuni aui asu wulu.

¹⁶ Lu angunelu kami ka ntundu, nduki untu akanteketela, keli tshe wakanseke. Dikambu so tadiuyalaki unungu le wo!

¹⁷ Keli Khumadiondjo akemala la mi, akankikitsha, dia dimi mvutelaka antu diui ololo, la dia asi wedja tshe mbuka. Dimi lakahandi uma lʼunyo a tambwe.

¹⁸ Khumadiondjo ayuntshungula uma lu elimu wa wa kolo tshe, ayunshimbela edja ndu lu diulelu diandi dia lʼulungu. Lutumbu layali le ndi pundju pundju! Ayali osoku!

Paulu Ambutumela Antu Amotshi Moyo

¹⁹ Umbishiya Piriska la Akula ndu wa lukhumbu kʼOnesiforo moyo.

²⁰ Erasto akatshikala la Koreto, keli dimi lakatshiki Torofimo la Mileto la hemo.

²¹ Usamanya dia ndja le mi la ntundu kʼeleku ka tshitshi katayi. Eyubulo ndu Pudena, Lino, Kolodiya la auyasu tshe wambukutumela moyo.

Diui DiʼEtshokwelo

²² Khumadiondjo ayali lʼutema aye! Ngandji ka mamba kayali la ye!