2 Timote 3 - La Bible en Otetela (Bible K'Ekila) 1991

Akambu a Wulu Wayuyala

¹ Eyi wati: Lu nshi yʼekumelu, tena dia wulu diayuyala.

² Antu wayuyalanga, wayulanga ukundji, wayosema, wayutakula, wayotengana, wayutuna aui wʼambutshi, hawukana lusaka, waha ololo.

³ Vo wayuyala waha la ngandji ka mete, akanga wʼududu, amamanyishi, wahayakimela, akanga wʼusihi, atunyi wʼakambu wʼololo.

⁴ Vo wayuyala afungi, akanga a puki, akanga a ndjambiya, anangi wa engenongeno, wuleki wa Unyashungu.

⁵ Vo wayuyala lʼefanelu ka ololo a Unyashungu, keli wayutuna wulu andi. Umo lʼatei wʼantu aso.

⁶ Amotshi watotoka lu mvudu ne dia munda amantu wa dinginya, wuludi la akambi wa kolo, wane wambunganyiama lu kolo yawo.

⁷ Vo watekaka yimba, keli hawukuki nkuma lu ewu kʼakambu wa mete.

⁸ Uku aki Jane la Jambere, lamʼakawakadimula aui wa Mose, osoku mbakadimulawo akambu wa mete. Antu ako wambulanya yimba yawo, wambetola uma lu mbetawo kawo.

⁹ Keli vo hawulekana, ne dia dinginya diawo diayenama le antu tshe uku akenama dinginya diʼantu aso.

Efundelu Tshe kʼUma le Unyashungu keko Ololo

¹⁰ Keli we akâyeli wetshelu ami, la lokewo lami, ndu esangweyu kami, mbetawo kami, memakana kami, ngandji kami, la ekikelu kami,

¹¹ ndu ehenyohenyo ami, asui ami, la akambu wakamundi lʼAtiyoka, lʼlkoniya ndu la Lustera; dimi lakayala la wolamu lʼasui efula. Khumadiondjo akantshungula uma lu akambu aso tshe.

¹² Ndu wane tshe walanga ndjala la lumu lʼololo le Kristu Jesu, wayusuwa.

¹³ Keli antu wa kolo la akanga a lukesu wayuhama lu akambu awo wa kolo; vo wayukesana, ku wayukesama.

¹⁴ Keli we, ushikikali lu akambu wakayeki ndu wakayetawo wati: Mete; ndu eyi akona akaketsha akambu ako.

¹⁵ Uho wati: Umaka dikenda, we akeyi afundelu wʼekila weya nkewuya dia panda uma lu mbetawo le Kristu Jesu.

¹⁶ Efundelu tshe kʼuma le Unyashungu keko ololo mbetsha antu, la mbalaka, la mbaewula, la mbaekiya lu akambu wʼololo,

¹⁷ dia untu a Unyashungu aluwani, ndu akuki dia ntsha elimu wʼololo tshe.