2 Timote 1 - La Bible en Otetela (Bible K'Ekila) 1991

Ambutumela Moyo

¹ Paulu, utumami a Kristu Jesu dia lulangu la Unyashungu la dia daka dia lumu leli le Kristu Jesu.

² Le Timote, onʼami la ngandji: Ngandji ka mamba, la ketshi, la ki uma le Unyashungu Shesu la uma le Kristu Jesu Khumesu wayali la ye.

Paulu Ambuhula Timote Dia Nama Dikambu DiʼOlolo Diakawawusha

³ Dimi lambuka Unyashungu lusaka latumutshelaka ulimu la khumʼutema kʼololo uku akatshaka watshemi, lamʼatumukuhoka lu dombelo diami, ndu utshu ndu yanyi.

⁴ Lamʼatumukuhoka lʼasoi aye, dimi latukumbulaka nkena ntu, dia dimi ndudiama lʼongenongeno.

⁵ Dimi latuhoka mbetawo ka mete keli lʼutema aye; kakatatela lʼutema a tsheye Loyi la wa nyo Eyunike. Ndu lambetawo nti: To keko ndu lʼutema aye.

⁶ Dia dikambu ne, mbakuhulami dia we ntshutshiya ushasha a Unyashungu wakandakusha lamʼakamakahe anya lʼote.

⁷ Ne dia Unyashungu kuntusha utema a woma, keli ndi akatusha utema a wulu la wa ngandji ndu wa ndjakimela.

⁸ Okone tukaki sonyi dia mvuta akambu wa Khumesu kuyanga akambu ami, dimi usi lukanu landi, keli usuwi la lukumu lʼololo uku eli wulu a Unyashungu,

⁹ lakatushimbela, lakateti la leta lʼekila, aha dia etsha asu etu, keli uku esangweyu kandi la ngandji ka mamba kandi, kakandatusha le Kristu Jesu nshi yʼedjedja.

¹⁰ Keli to kambenama kakiane lu enelo kʼUshimbedi asu Kristu Jesu, lakalembia nyoi, lakashula lumu la akambu wahalana, dia lukumu lʼololo.

¹¹ Wambumbidja usambisha la utumami, la umbetsha a dikambu dialo.

¹² Dia dikambu ne, mbemi la asui ane. Keli haluki sonyi, ne dia dimi mbeyaka lakametawo. Dimi lambetawo nti: Ndi la wulu a nama kakamakimo le ndi, edja ndu lamʼayukuka lushi lako.

¹³ Ukimeli yediko ya aui wʼololo wakayuki le mi, lu mbetawo la ngandji keli le Kristu Jesu.

¹⁴ Ulami engo keku kʼololo kakawakusha le Nyuma kʼOlolo katuyalaka lʼetema asu.

Antu Akina Wakaseke Paulu, Onesiforo Aki la Kolamelu

¹⁵ We mbeyaka wati: Antu tshe wa lʼAsiya wakanseke. Amotshi awo weli Fingelo la Heremongene.

¹⁶ Khumadiondjo afudiya wa lu luudu lʼOnesiforo ketshi, ne dia ndi akankikitsha tena efula. Ndi kumbuka molola ami sonyi.

¹⁷ Keli lamʼakindi lu Romo, ndi akanyangi edja ndu lamʼakandamenyi —

¹⁸ Khumadiondjo awusha wulu wa ndi ntana ketshi ka Khumadiondjo lushi lako — We mbeyaka uku akandankimanyia lu akambu efula la Efeso.