2 Tesalonika 3 - La Bible en Otetela (Bible K'Ekila) 1991

Alaku Amotshi

¹ Anyasu, diui diami dia ndjihelu ne nti: Nyutolombelaki, dia diui dia Khumadiondjo diadiangani ndu diatumbwami, uku atumbwamadio lʼatei anyu;

² la dia shu ntshungwama uma lʼanya wa akanga a djawudi la antu wa kolo, ne dia aha antu tshe mbeli la mbetawo.

³ Keli Khumadiondjo eko la kolamelu. Ndi ayunyushikike, ayunyulama uma le kanga kolo.

⁴ Shu teko la elungamelu le Khumadiondjo dikambu dianyu, shati: Nyu nyatutshaka ndu nyayutshaka akambu wanyutelasu.

⁵ Khumadiondjo alombole etema anyu lu ngandji ka Unyashungu, la lu eteti ka Kristu.

Paulu Ambuhangwela Akanga a Nende

⁶ Anyasu, tambunyosengasenga lu lukumbu la Khumesu Jesu Kristu, dia nyu mumo uma le anyanyu tshe, akanga a nende, ndu wahayeli dietshelu diakatawaetsha.

⁷ Ne dia nyame mbeyaka wuhu wahumbanyu ntukuya; ne dia shu kundjala la nende lʼatei anyu.

⁸ Shu konde ma diʼuntu olele, aha nfuta. Shu takakambaka ulimu wulu ndu la utshu ndu la yanyi, dia shu tatuyalelaki nduku untu wutshu lʼatei anyu.

⁹ Aha ati: Shu kundjala la wulu wa ntsha osoku, keli takalangi ndjala djimbitelu le nyu, dia nyu ntukuya.

¹⁰ Ne dia ndu lamʼakisu lakanyu, shu takanyutela shati: Naka untu halangi nkamba ulimu, ndi talekaki.

¹¹ Ne dia shu tambuka lukumu ati: Akanga a nende weko lʼatei anyu, wahakambi nduku djimulimu, keli weko la saku lu akambu wa kana.

¹² Kakiane, shu tambosengasenga antu wa wuhu oso, ndu tambasengasenga le Khumadiondjo Jesu Kristu, dia vo nkamba ulimu la ki, ndu dia ndjayangela ma diawo.

¹³ Keli nyu, anyasu, tanyuhekoki ntsha ololo.

¹⁴ Naka untu hakitanyia diui diasu lu mukanda one, nyendi untu ako, tanyosohanaki la ndi, dia ndi mbutshama sonyi.

¹⁵ Ku tanyalaki untu ako uku utunyi, keli nyulaki uku unyanyu.

¹⁶ Kakiane Khumadiondjo ka ki, ndame anyusha ki tena tshe, lu wehu tshe. Khumadiondjo ayali la nyu tshe!

Ambatumela Moyo; Ambatshokola

¹⁷ Diui ne dia moyo mbufundjimi, dimi Paulu, la lunya lami. Dio dieko djimbitelu lu mikanda tshe wanyufundelami. Wuhu ako mbufundjimi.

¹⁸ Ngandji ka mamba ka Khumesu Jesu Kristu kayali la nyu tshe!