2 Tesalonika 2 - La Bible en Otetela (Bible K'Ekila) 1991

Onʼa Eshishwelu Ayushwama Ntundu kʼEyelu ka Khumadiondjo

¹ Anyasu, shu tambunyosengasenga dia eyelu ka Khumesu Jesu Kristu, la dia esanganelu kasu la ndi;

² shati: Tanyohenyahenyamaki esadi lu tukanyi, tanyutshamaki kele lu nyuma, lu diui, kuyanga lu mukanda wambufana uku uma le su, ati: Lushi la Khumadiondjo lambuyakaka.

³ Untu tanyudimbiyaki nduku yema, ne dia dikambu nc hadiuyala, tshikima antu efula wambutatunyi dikambu dia Unyashungu ntundu, la kanga ufutanu, onʼa eshishwelu ambushwama,

⁴ one latuna, ndu layambiya la ntundu ka diango tshe dietawo vati: Ditemolatemola, kana diango tshe diatemolawo. Okone ndi atudjaseka lu etemwelo ka Unyashungu, ayata ati: Dimi Unyashungu.

⁵ Nyu hanyuho nyati: Lamʼakimi la nyu, dimi lakanyutelaka akambu aso?

⁶ Kakiane nyu mbeyaka one latushimbanaka, ne dia ndi ayenama lʼetena kandi.

⁷ Dikambu ne diʼuhedia diakashami, diatutshaka ulimu adio kakiane. Keli ushimbi eko kakiane, ayushimba, edja ndu lamʼayuwuwunya.

⁸ Ku kanga uhedia ayenyama, ayudiakemi le Khumadiondjo Jesu la luwi lʼuma lʼunyo anai. Ndi ayuwete uku anyanya lʼeyelu kandi.

⁹ Eyelu kandi kambedima lʼelimu wa Satana la wulu tshe, ndu la tulimbitelu, ndu la akambu wa mamba wa kashi,

¹⁰ la kesu tshe ya kolo ya wane wambushisho, ne dia vo kumbetawo ngandji kʼakambu wa mete, dia vo nshimbamela.

¹¹ Dia dikambu ne, mbatatumelaka Unyashungu ulimu wa munga, dia vo mbetawo akambu wa kashi,

¹² dia vo tshe waki kumbetawo akambu wa mete, keli wakangenangena lu akambu wa kolo, walumbuyami.

Unyashungu Akanyosonola Dia Nyusha Panda: “Nyukimeli Akambu Wakanyetshama”

¹³ Anyasu, elangimi wa Khumadiondjodieli la su dia mbuka Unyashungu lusaka nshi tshe dia dikambu dianyu, ne dia Unyashungu akanyosonola umaka etatelu dia nyusha panda, lu ekidiamelu ka Nyuma la ka mbetawo kʼakambu wa mete.

¹⁴ Lu akambu ane, mbakandanyeti lu lukumu lʼololo lasu, dia nyu nungula lutumbu la Khumesu Jesu Kristu.

¹⁵ Okone nyu anyasu, nyushikimali; nyukimeli akambu wakanyetshama, kuyanga lu diui, kuyanga lu mukanda wakatanyufundela.

Ambalombela Unyashungu

¹⁶ Khumesu Jesu Kristu ndame, la Unyashungu Shesu, lakatulangi ndu lakatusha ekikitshelu ka pundju la elungamelu kʼololo uma lu ngandji ka mamba,

¹⁷ akikitsha etema anyu, ndu anyushikike lu elimu wʼololo tshe la lu aui!