2 Samuele 9 - La Bible en Otetela (Bible K'Ekila) 1991

Ololo wa Davidi le Mefiboshete

¹ Davidi akambula ati: Untu omotshi ekiko lu khumbu ka Saulu, dia dimi mbutshela ololo lu dikambu dia Jonatana?

² Ukambi omotshi akiko lu luudu la Saulu, lukumbu landi Ziba. Vo wakaweti dia ntsho le Davidi. Khumʼekanga akawumbula ati: We keli Ziba? Ku ndi akûkaluya diui ati: Dimi keli ukambi aye.

³ Khumʼekanga akambula ntu ati Nduku untu ukina ntu lu khumbu ka Saulu, dia dimi mbenya ngandji ka mamba ka Unyashungu? Ku Ziba akûkaluya diui ati: Ona pami omotshi a Jonatana eko, ndi eko ekhusi.

⁴ Khumʼekanga akawumbula ati: Lendʼendi? Ziba akûkaluya diui ati: La Lo-Debare kendi, laka Makira, onʼa Amiyele.

⁵ Khumʼekanga Davidi akatumi akendji la Lo-Debare dia ntuwosa laka Makira, onʼa Amiyele.

⁶ Ku Mefiboshete, onʼa Jonatana, onʼa Saulu, akayi le Davidi, akayakosha la kete, akukhusamela. Davidi akaweti ati: Mefiboshete! Ku ndi aketawo ati: Enda, ukambi aye one.

⁷ Davidi akawutela ati: Tukaki woma, dimi layukutshela ololo lu dikambu dia sho Jonatana. Dimi layukukaluya kete tshe yaki tsheye Saulu. We ayolekaka ma lu mesa ami nshi tshe.

⁸ Ku Mefiboshete akukhusamela; akûkaluya diui ati: Enda, ukambi aye eli na, dia menda udu a fo uku dimi?

⁹ Khumʼekanga aketi Ziba, ukambi wa Saulu, akawutela ati: Dimi lambusha ona aki khumeye diango tshe diaki Saulu ndu diaki wa lu luudu landi tshe.

¹⁰ Kukambelaki dikambo lu kete ku, we la ana aye wʼapami la ekambi aye. Kuwelaki diango diayunyunaka uma loko, dia ona khumeye ndjala la mbu ya nde. Keli Mefiboshete, on a khumeye, ayolekaka ma lu mesa ami nshi tshe. Ziba aki la ana apami dikumi la atanu la ekambi akumi ahendi.

¹¹ Ku Ziba akatela khumʼekanga ati: Ukambi aye ayutsha akambu tshe wambuyuwutela, we khumemi khumʼekanga. Okone Mefiboshete akalekaka ma lu mesa wa Davidi, uku ona apami a khumʼekanga omotshi.

¹² Mefiboshete aki la ona pami a tshitshe, lukumbu landi Mika. Antu tshe wakadjashi lu luudu la Ziba, wakayala ekambi wa Mefiboshete.

¹³ Mefiboshete akadjase la Jerusalema. Ndi akalekaka ma lu mesa wa khumʼekanga nshi tshe. Ndi aki ekhusi.