2 Samuele 5 - La Bible en Otetela (Bible K'Ekila) 1991

Wambudja Davidi Khumʼekanga ka Isariyele

¹ Wedja tshe wa Isariyele wakayi le Davidi la Heberona, wakayuwutela vati: Shu antu wuto mbesu.

² Nshi kina lamʼaki Saulu khumʼekanga kasu, we kakalombolaka Isariyele. Ku Latuyalaka akakutela ati: We kayuyala ulami a wudja ami Isariyele. We kayuyala uwandji awo.

³ Okone dihangamendi tshe dia Isariyele wakayi le khumʼekanga Davidi la Heberona. Ndi akadji la wo sheki la ntundu ka Latuyalaka la Heberona. Ku vo wakukiti iso, dia ndi ndjala khumʼekanga ka Isariyele.

⁴ Davidi aki la deku akumi asatu lamʼakandayala khumʼekanga. Ndi akulela deku akumi anei.

⁵ Ndi akulela asi Juda deku esambeli la ngondo shamalu la Heberona. Ku ndi akulela Isariyele tshe ndu Juda deku akumi asatu la satu la Jerusalema.

Davidi Ambolembia Siona

⁶ Khumʼekanga akatshu ndi la antu andi utsha la Jerusalema dia ntolo la asi Jebuse akanga a kete. Vo wakatela Davidi vati: We hoto lane, ne dia akanga a tutshungu la tshumbi atu mbayukutshanya. Vo wakakani vati: Davidi hoto lane.

⁷ Keli Davidi akose usumba a wulu wa Siona. Vo mbeli usumba wa Davidi.

⁸ Lushi loso Davidi akati ati: Untu tshe layulanga ndo la asi Jebuse, akumi lu watu wʼashi, adiaki tshumbi diku la akanga a tutshungu aku, atunyi wa Davidi — Diako mbatuwutaka vati: Kanga tshungu la etshumbi tawotoki lu luudu.

⁹ Davidi akadjase lu dihuli dia wulu, diakawetaka vati: Usumba wa Davidi. Ndi akahikia mvudu lʼandja ndu lʼetei a Milo.

¹⁰ Davidi akatatekoyaka ndjala wuki. Ndu Latuyalaka, Unyashungu, Kanga Elui wʼAlimbi aki la ndi.

Hirame Ambongenyangenya Davidi

¹¹ Hirame, khumʼekanga ka Tura, akatumi akendji le Davidi ndu etamba wʼesasi, asedi wʼetamba, la ambatshi wʼave dia ntuhikela Davidi luudu.

¹² Davidi akalimbitela ati: Latuyalaka ambunshikike khumʼekanga ka Isariyele, ndu ndi ambedia diulelu diandi, ne dia wudja andi Isariyele.

Ana Wakatuta Davidi la Jerusalema

¹³ Davidi akatosa esika la wadi ntu la Jerusalema uma lamʼakandayi la Heberona, ku vo wakuti la ndi ana apami la ana amantu.

¹⁴ Kumbu yʼana wakandayuta la Jerusalema nye: Shamua, Shobaba, Natana, Solomona,

¹⁵ Ibare, Elishua, Nefenge, Jafiya,

¹⁶ Elishama, Eliyada, la Elifelete.

Davidi Ambolembia asi Filistiya

¹⁷ Keli lamʼakuki asi Filistiya lukumu vati: Wakakiti Davidi iso, dia ndi ndjala khumʼekanga ka Isariyele, vo tshe wakayi dia ndjuyanga. Davidi akuki dikambu diako, ku ndi akatshu utsha lʼusumba waki la lukumbu la wulu.

¹⁸ Lamʼakakumi asi Filistiya, wakakukanela lʼukidi wa Refayima.

¹⁹ Davidi akambula Latuyalaka ati: Ntshu dia ntolo lʼasi Filistiya? We ayâkimo lu anya ami? Ku Latuyalaka akûkaluya diui ati: Tshoka, dimi layukimo asi Filistiya lu anya aye.

²⁰ Davidi akatshu la Bala-Perazima, akatâlembia leko. Ku ndi akati ati: Latuyalaka ahandjuli atunyi ami la ntundu kami, uku ashi mbakela. Diako mbakawole dihuli diako lukumbu vati: Bala-Perazima (kitshimudi ati: Unyashungu Uhandjudi).

²¹ Asi Filistiya wakatatshiki dikishi diawo leko. Ku Davidi la antu andi wakaditole.

²² Asi Filistiya wakakalula ntu, wakakukanela lʼukidi wa Refayima.

²³ Davidi akambula Latuyalaka. Ku Latuyalaka akawntela ati: Tutshoki, utshimbi uma lʼokongo awo, ku we ayukuma la le wo lasuki la etamba wʼelombi.

²⁴ Lamʼayuyutuka lohokoso ladiku diʼetamba wʼelombi, kuyalongosole, ne dia laso ku Latuyalaka ambeta la ntundu kaye, dia ntolembia asi Filistiya.

²⁵ Davidi akatshi uku akawutela Latuyalaka, ku ndi akale mbia asi Filistiya, uma lu Ngeba edja ndu la Ngezere.