2 Samuele 4 - La Bible en Otetela (Bible K'Ekila) 1991

Wambudiaka Ishi-Boshete

¹ Lamʼakuki Ishi-Boshete lukumu ati: Wakadiaki Abinere la Heberona, dimba diandi diakakomo, ndu asi Isariyele tshe wakuki woma.

² Ishi-Boshete, onʼa Saulu, aki la elombodi andi ehendi wʼalimbi. Lukumbu la omotshi laki Bana, la ukina laki Rekabe. Vo waki ana wa Rimona, usi Berote, lʼatei wʼasi Bendjamina. (Ne dia Berote aki etenyi ka wudja wa Bendjamina;

³ ku asi Berote wakalawo la Ngitayima, wakatudjase leko ndu elo).

⁴ Jonatana, onʼa Saulu, aki la ona pami omotshi lakayala ekhusi lamʼakindi la deku tanu. Ne dia lamʼakakumi lukumu la nyoi ka Saulu la Jonatana uma la Jezerele, ondedi andi akawose, akalawo la ndi. Ku lamʼakant khunguso la luwangu, ona ako akako, akayala ekhusi. Lukumbu landi laki Mefiboshete.

⁵ Rekabe la Bana, ana wa Rimona, usi Berote, wakatshu, wakatukuma la luudu la Ishi-Boshete. Vo wakutani etami unya lʼatei ote, etena kakandumuyaka.

⁶ Lamʼakoto antu lʼatei a luudu dia ntosa epunga, ku Rekabe la Bana, onangu, wakoto okoke dia ntuhika tukuwa.

⁷ Lamʼakawoto lu luudu, wakutani etami lu tangi lu luudu landi la mbetama. Vo wakawuki tukuwa, wakudiaki, wakuhimbula ote. Vo wakose ote andi, wakatshu utshu utu lu mbuka ka Araba.

⁸ Vo wakela ote wa Ishi-Boshete ya le Davidi la Heberona. Vo wakatela khumʼekanga vati: Enda, onʼeli ote wa Ishi-Boshete, onʼa Saulu, utunyi aye, lakayangaka nkudiaka. Latuyalaka ambukosombweya, we khumemi khumʼekanga, le Saulu la diuhu diandi.

⁹ Ku Davidi akakadimula Rekabe la Bana, onangu, ana wa Rimona, usi Berote, ati: Uku eli Latuyalaka la lumu! lakashimbela lumu lami uma lʼelanyelu tshe,

¹⁰ dimi lakandi untu lakela lukumu ati: Saulu ambuvo. Ndi akakani ati: Lambuwela lukumu lʼololo. Keli dimi lakudiaki la Zikilange, dia mbufuta difutu dia lukumu lakandambela.

¹¹ Okone nyu antu wa kolo nyakatudiaka untu ololo etami lu tangi lu luudu landi, dimi haluleka nyolomba dikila diandi la nyudiaka tshe?

¹² Ku Davidi akatela elongo andi wʼapami dia vo mbadiaka. Vo wakahimbula anya lʼekulu, wakahane lasuki la eduwa ka la Heberona. Keli vo wakose ote wa Ishi-Boshete, wakukhunde la Heberona lu diumbu dia Abinere.