2 Samuele 3 - La Bible en Otetela (Bible K'Ekila) 1991

¹ Ta diakatshikala edja lʼasa khumbu ka Saulu la khumbu ka Davidi. Davidi akatatekoyaka ndjala la wulu. Keli khumbu ka Saulu wakatakitakitaka.

Ana Apami Wakuti Davidi la Heberona

² Ana apami wakuti Davidi la Heberona ane. Onʼandi lʼenundu aki Aminora, lakanduti la Ahinoama, usi Jezerele;

³ ona la hendi, Kileyabe, lakanduti la Abingayili, usi Karamele, wadi aki Na-bala; ona la satu. Abisaloma, lakanduti la Maka, onʼa Talamai, khumʼekanga ka Ngeshure;

⁴ ona la nei, Adonidja, lakanduti la Hangita; ona la tanu, Shefatiya, lakanduti la Abitala;

⁵ la ona la samalu, Itereyame, lakanduti la Engela. Oso eli ana wakuti Davidi la Heberona.

Abinere Ambekama le Davidi

⁶ Lu ta diaki lʼasa khumbu ka Saulu la khumbu ka Davidi, Abinere akashikikala wulu dia nkikitsha khumbu ka Saulu.

⁷ Saulu aki la usika omotshi, lukumbu landi Rizipa, onʼa Aya. Ku Ishi-Boshete akambula Abinere ati: Okoko wana wakayunana la usika a papa?

⁸ Abinere akuki kele ka wulu uma lu aui wa Ishi-Boshete. Ku ndi akûkaluya diui ati: Undi, ote a fo mbemi lu dikambu dia Juda? Elo, dimi leko lu menya wa lu khumbu ka sho Saulu, anangu, la engenyi andi kolamelu. Dimi kunkukimo lʼanya wa Davidi, ku elo kene we ambuyumpangwela lu dikambu dia umuntu one.

⁹ Unyashungu katsheli Abinere la ngala ndu akambu akina ladiku naka dimi hatshedi Davidi uku akutshibela Latuyalaka,

¹⁰ ati: Layosekola diulelu uma lu khumbu ka Saulu utsha lu khumbu kandi. Dimi layushikike kiti ka diulelu ka Davidi lu Isariyele la Juda, uma la Dane edja ndu la Bere-Sheba.

¹¹ Ishi-Boshete kumbeya nkaluya Abinere nduku diui, ne dia ndi akawuki woma.

¹² Abinere akatumi akendji la Heberona le Davidi, dia ntuwotwela ati: Kanga kete nye na? Udji la mi sheki, ku dimi layukukimanyia dia nkadimula Isariyele tshe uya le ye.

¹³ Ku Davidi akûkaluya diui ati: Kawo, dimi layudja la ye sheki. Keli dimi lambukolomba paka engo otoi. We hena elundji kami, tshikima ambuta-mbela Mikale, ona umunta Saulu, ku we ayena elundji kami.

¹⁴ Ku Davidi akatumi akendji le Ishi-Boshete, onʼa Saulu, dia ntuwutela ati: Umbisha wa-demi Mikale, lakamambela la toto lu-kama yʼasi Filistiya.

¹⁵ Ishi-Boshete akatumi antu dia ntuwosa laka umendi Falatiyele, onʼa Laishi.

¹⁶ Ku umendi akayayakaka lʼokongo andi ayaleli edja ndu la Bakurima. Ku Abinere akatela Palatiyele ati: Tshoka, kalula lakaye! Ku ndi akakalula.

¹⁷ Abinere akadji la dihangamendi dia Isariyele sheki, akawatela ati: Nshi kina, nyu nyakalangaka Davidi ndjala khumʼekanga kanyu.

¹⁸ Kakiane nyawudji, ne dia Latuyalaka akati lu dikambu diandi ati: Uma le ukambi ami Davidi, mbayumutshungula wudja ami Isariyele uma lʼanya wʼasi Filistiya, ndu uma lʼanya wʼatunyi awo tshe.

¹⁹ Abinere akasawula ndu la asi Bendjamina. Ku ndi akatshu la Heberona dia ntutela Davidi uku akasanguya Isariyele la khumbu tshe ka Bendjamina.

²⁰ Okone ndi akakumi le Davidi la Heberona, ndi la apami akumi ahendi. Ku Davidi akakatela Abinere la wane wakatshu la ndi dambu.

²¹ Abinere akatela Davidi ati: Dimi layunela, layutsho dia ntusanganya Isariyele tshe uya le ye, we khumemi, khumʼekanga. Vo kawuyudji la ye sheki. Ku we ayulela antu tshe uku alangaye. Davidi akakendja Abinere. Ku ndi akatshu la ki.

Joaba Ambudiaka Abinere

²² Lʼokongo diku, Joaba la ekambi wa Davidi wakakalula uma lene akawatumba diango. Vo wakayi la diango dia dimbu efula. Laso ku Atinere akamwi la Heberona lasuki la Davidi, ne dia Davidi ako Kindjisha, ku ndi akatshwi la ki.

²³ Lamʼakakumi Joaba la ului andi tshe wʼalimbi, wakayuwutela lukumu vati: Abinere, onʼa Nere, akayi le khumʼekanga, ku khumʼekanga akokendjishi, ndi akatshwi la ki.

²⁴ Joaba akatshu le khumʼekanga, akatuwumbula ati: Kakayatshi na? Enda Abinere akayi le ye, dikambu kuna diakayokendjisha, diakayukimwi dia ndi ntsho?

²⁵ We mbeyaka Abinere, onʼa Nere! Ndi akayi paka dia ndjukukesa, dia ndjeya okone atshoye la okone akalulaye, ndu dia ndjulimbitela kene tshe katshaye.

²⁶ Ku lamʼakamo Joaba uma la le Davidi, ndi akatumi akendji dia ndjela Abinere, ku vo wakatukaluya uma lʼushima wa Sira. Keli Davidi kumbeya dikambu diako.

²⁷ Lamʼakatakalulaka Abinere utsha la Heberona, Joaba akaweti lʼedia lukuki lʼusumba, uku layanga mbutela dikambu lu sheki. Ndi akuhiki lukuwa lu dikundju, ku ndi akavu, dia nsomboya dikila diʼonangu Asahele.

²⁸ Davidi akayuka lukumu lʼokongo diku, ku ndi akati ati: Dimi la diulelu diami kema la unungu pundju la ntundu ka Latuyalaka wa dikila dia Abinere, onʼa Nere.

²⁹ Dikila ne diayali lʼote wa Joaba la khumbu ka shi tshe! Kayalaki untu omotshi lu khumbu ka Joaba pundju leli la ekelelo ka dikila kana kandji ka sudi, lakendakenda la okomba kana lambuvo la yombo, kana lahumba mbu ya nde!

³⁰ Osoku mbakadiaki Joaba la onangu Abishai, Abinere, ne dia ndi akadiaki onengewo Asahele iu ta, la Ngibeyona.

³¹ Davidi akatela Joaba la antu tshe waki kame la ndi ati: Nyatshatsha ahondo anyu, nyolote akutu, nyutalelaka la ntundu ka udu wa Abinere. Ku khumʼekanga Davidi akatatshokaka lʼokongo a wambu wʼudu.

³² Wakatukhunde Abinere la Heberona. Khum ekanga akatundo la delu, akaleli la diumbu dia Abinere, ndu wudja tshe wakaleli.

³³ Khumʼekanga akalongosola usambu wa ngengu lu dikambu dia Abinere, akimbi ati: Abinere akahumbi mvo uku enginya?

³⁴ We kunkelekama ekodi lu anya kuyanga molola lu ekulu! Uku atokokaka untu la ntundu kʼantu wa kolo, mbakayako!

³⁵ Ku wudja tshe wakaleli Abinere ntu. Antu tshe wakayi le Davidi, wakawutela dia ndi nde ma lʼetena ka yanyi. Keli Davidi akatshibi ati: Unyashungu antsheli la ngala, naka layunganela ma kana engo tshe la ntundu ka unya atadji!

³⁶ Ku antu tshe wakenyi dikambu dia o, wakangenangena, ee, wudja tshe wakangenangena lu akambu tshe wakatshi khumʼekanga.

³⁷ Okone antu tshe, ndu Isariyele tshe, wakalimbitela lushi lako vati: Khumʼekanga taki la dikambu dia ndjaka Abinere, onʼa Nere.

³⁸ Khumʼekanga akambula akambi andi ati: Nyu hanyeyi nyati: Uwandji, untu a wuki, kakavwi elo lu Isariyele?

³⁹ Dimi leko wodu elo, kuyanga mbakamakitama iso dia ndjala khumʼekanga. Ku antu ane, ana apami wa Zeruya, wambotekoya mpangakalemi. Latuyalaka atsheli utshi wa kolo uku kolo kandi.