2 Samuele 24 - La Bible en Otetela (Bible K'Ekila) 1991

Davidi Ambala Efula kʼAsi Isariyele la kʼAsi Juda

¹ Latuyalaka akuki asi Isariyele kele ka wulu ntu. Ndi akatshatshiya Davidi dia mbalosha, akawutela ati: Tshoka, utali efula kʼasi Isariyele ndu kʼasi Juda.

² Ku khumʼekanga akatela Joaba olombodi andi wʼalimbi, laki la ndi ati: Utshu, utukinduli lʼatei a wedja tshe wa Isariyele, uma la Dane pulu ndu la Bere-Sheba. Kutali antu dia dimi mbeya efula kawo.

³ Joaba akakaluya khumʼekanga diui ati: Latuyalaka, Unyashungu aye, afudia antu lukama lukama ladiku dia yediko yewo kamʼakayasene ololo. Keli dikambu kuna diangenangenaye we khumemi khumʼekanga, dia ntsha dikambu ne?

⁴ Keli aui wa khumʼekanga wakalembia utema wa Joaba la wa elombodi wʼalimbi. Joaba la elombodi wʼalimbi andi wakamo uma la ntundu ka khumʼekanga, wakatshu dia ntala asi Isariyele.

⁵ Vo wakateho Jorodana, wakatuhanga lu lunya la pami la Aroera, lʼukidi wa Ngada, lu mbuka kʼutsha la Jazera.

⁶ Vo wakakumi la Ngiliyade, wakatshu utsha la Kadeshe lu kete ya asi Hiti. Vo wakatshu la Dane, ku vo waketi uma la Dane utsha lu leke la Sidona.

⁷ Vo wakatukuma la lungeli la ta la Tura, wakakindula lu esumba tshe wʼasi Hiti, la wʼasi Kanana. Ku vo waketiutsha la Nengebe ka la Juda, wakatukuma la Bere-Sheba,

⁸ Lʼokongo a ngondo divwa la nshi akumi ahendi, vo wakashili nkindula lu kete tshe, ku vo wakakalula la Jerusalema.

⁹ Joaba akatela khumʼekanga efula kʼantu wakandali: akanga a wulu weya ndo ta la yombo lu Isariyele waki antu nunu katna enanei, la wa asi Juda waki antu nunu kama tshanu.

¹⁰ Keli utema a Davidi wakate lamʼakandashidiya mbala antu. Ndi akatela Latuyalaka ati: Dimi lambutsha kolo ka wuki lu dikambu ne diutshami! Latuyalaka li! lambukosengasenga nti: Unyimanyia kolo kene, dimi ukambi aye, ne dia lakatshi utshatsha uku kanga enginya.

¹¹ Lamʼaketo Davidi la pindju, diui dia Latuyalaka diakayi le umvutshi Ngada, omenyi wa Davidi wʼakambu wahatayi, ati:

¹² Tshoka, ututeli Davidi wati: Latuyalaka kata ati: Dimi lambukitsha akambu asatu la ntundu kaye, osonole dimotshi uma lʼatei awo dia dimi nkutsheladio.

¹³ Ku Ngada akakumi le Davidi, akawumbula ati: We nangaka ndjala la ndjala ka kasha lu kete yaye deku esambeli? kana we nangaka ntalawolawo la ntundu kʼatunyi aye watakutshanya? kana we nangaka sui dia wulu lu kete yaye nshi shatu? Kakiane ukani yimba, umvuteli diui diahumbami nkaluya le one lakantumi.

¹⁴ Davidi akakaluya Ngada diui ati: Dimi laya lʼasa kanda la kanda! Ndjakosha lu anya wa Latuyalaka, ne dia ndi eli kanga ketshi efula. Keli dimi tako-shamaki lu anya wʼantu.

¹⁵ Okone Latuyalaka akatumela Isariyele sui dia wulu umaka pindju edja ndu etena kakandasonola. Ku antu nunu akumi esambeli wakavu uma la Dane pulu ndu la Bere-Sheba.

¹⁶ Lamʼakasimbula ondjelo lunya utsha la Jerusalema dia yilanya, Latuyalaka akalembe utema dikambu dia kolo kako. Ku ndi akatela ondjelo wakadiakaka antu ati: Ambukuka! ukitsha lunya. Ondjelo wa Latuyalaka aki lasuki la dihuli diʼesuswelu ka Arauna, usi Jebuse.

¹⁷ Lamʼakenyi Davidi ondjelo wakadiakaka antu, ndi akatela Latuyalaka ati: Mete, lakatshi kolo, lakatshi utshatsha, keli ekoko ene, kakawatshi na? Lunya laye landosha dimi la wa luudu la papa atu.

¹⁸ Ngada akayi le Davidi lushi lako, akawutela ati: Uneli, ututsheli Latuyalaka ediakelu lu dihuli diʼesuswelu ka Arauna, usi Jebuse.

¹⁹ Davidi akatshu uku akatela latuyalaka Ngada.

²⁰ Arauna akedia ashu, enyi ku khumʼekanga la ekambi andi ane wayayi uya le ndi. Arauna akatshu, akatukhusama la ntundu ka khum ekanga, akakolama.

²¹ Arauna akawumbula ati: Ukundi ambuyuya we khumemi, khumʼekanga, le mi dimi ukambi aye? Davidi akûkaluya diui ati: Dia ndjusumba dihuli diaye diʼesuswelu, dia dimi ntshela Latuyalaka ediakelu mbuyemi, dia sui ne dia wuki mumo uma lu wudja.

²² Arauna akakaluya Davidi diui ati: We khumemi, khumʼekanga, ose dihuli ne wososa. Olambuli kene keli ololo lu ashu aye. Enda, ndu ngombe yeko dia ndjala ulambu wa lutshumba, ndu tutambatamba tatuwususulaka epunga ndu koho ya ngombe nye dia ndjala kunyi.

²³ We khumʼekanga lambukusha diango ne tshe anyanya. Ku Arauna a!, atela khumʼekanga ntu ati: Latuyalaka, Unyashungu aye, aketawo.

²⁴ Keli khumʼekanga akatela Arauna ati: Aha ngaso. Keli layudisumba lusumba uma le ye. Dimi haletawo nambula ulambu wa lutshumba le Latuyalaka, Unyashungu ami, wakamalungula ulungulalungula. Okone Davidi akasumbi dihuli diʼesuswelu la ngombe lu ushinga wa toshekele akumi atanu ta fesa.

²⁵ Davidi akatshela Latuyalaka ediakelu laawo, akalambula elambu wa lutshumba la elambu wa ki. Osoku mbakawasengasenga Latuyalaka dikambu dia kete. Ku sui diakamo uma le Isariyele.