2 Samuele 23 - La Bible en Otetela (Bible K'Ekila) 1991

Aui wa Davidi wʼEkumelu

¹ Aui wa Davidi wʼekumelu ane: Davidi onʼa Jese, One lakediama ladiku, Ukitami wʼiso a Unyashungu wa Jakoba, Umimbi wʼololo lu Isariyele, kata ati:

² Nyuma ka Latuyalaka atonteketshaka, Diui diandi diatuyalaka lʼunyo ami.

³ Unyashungu wa Isariyele akateketa, Ee, Dive dia Wuki dia Isariyele akamvutela ati: One latulelaka antu la sambu kʼololo, Latulelaka la woma wa Unyashungu,

⁴ Ndi eli uku usasi wa pindju lamʼawanda unya; Uku pindju kaha la wangi Lamʼamonga adiyu la yanyi lʼokongo a mvula.

⁵ Undi, luudu lami laha osoku la ntundu ka Unyashungu? Ndi akadji la mi sheki ya pundju, Ee, ya shikaa, yakalongoswama lu akambu tshe. Undi, ndi haluwanya lulangu lami la panda kami tshe?

⁶ Keli amonyodi tshe, wa Unyashungu weli uku atende watuwukadjaka, Haweyi mbananda lʼanya.

⁷ Dieli la waku wawananda dia ndota eloto wa mbulu, la nkimela ulanga wa dikonga. Ku wayatshumba tshe lu dihuli diako.

Ahuka wa Davidi

⁸ Onʼeli kumbu yʼakanga a wulu waki la Davidi. Josheba-Basishebete, usi Takemona; ndi aki uwandji wʼelombodi. Ndi akuki antu kama enanei dikonga, akadiaki etena otoi.

⁹ Eleazara, onʼa Dodo, onʼa Ahahi, akahonyi la ndi. Lamʼakasangapa asi Filistiya dia mbalosha, asi Isariyele wakalawo lʼekungu.

¹⁰ Ku Eleazara akunela, akadiaki asi Filistiya edja ndu lamʼakole lunya landi. Pita yandi yakakakatala lu wenyi wa yombo. Lushi lako Latuyalaka akahandja asi Isariyele la panda ka wuki. Ku antu wakakalula dia ndjumba diango dia dimbu tu.

¹¹ Shama, onʼa Ange, usi Harara, akahonyi la ndi. Asi Filistiya wakasangana la Lehi, lene aki asusu efula. Ku asi Isariyele wakalawo asi Filistiya.

¹² Shama akemala lu dihuli diako, akadiaki asi Filistiya. Ku Latuyalaka akahandja asi Isariyele la panda ka wuki.

¹³ Lu nshi ya dinela, asatu uma lʼatei wʼewandji akumi asatu wakatshu le Davidi lu wuku wa Adulama. Lʼetena keso, asi Filistiya wakahangi lʼukidi wa Refayima.

¹⁴ Davidi aki lu lungeli la ta, la ului wʼasi Filistiya wakahangi la Betelehema.

¹⁵ Davidi akakumbula ashi, ata ati: Utumukundja ashi wa no uma lʼeteko ka la suku dia Betelehema li!

¹⁶ Akanga a wulu asatu ako waketi kʼatei a pangu kʼasi Filistiya, wakatuduwula ashi uma lʼeteko ka la suku dia Betelehema, ku wakela le Davidi. Keli ndi kumbetawo mbano, akatshula la ntundu ka Latuyalaka.

¹⁷ Ndi akati ati: We Latuyalaka, kanyi ya ntsha dikambu ne yeko etali uma le mi! Ukundi ukukimi no dikila diʼapami ane waketawo nsundja nyumu yawo? Okone ndi kono ashi ako. Osoku mbakatshi akanga a wulu asatu.

¹⁸ Abishai, onangu Joaba, onʼa Zeruya, aki uwandji wʼakumi asatu. Ndi akuki antu kama shatu dikonga, akadiaki. Ku ndi akayala la lukumu kame la antu aku asatu.

¹⁹ Ndi akaleki nkundja nemo lʼatei wʼakumi asatu. Ndi akayala olombodi awo, keli ndi kunkundja nemo diedimi lʼantu aso asatu.

²⁰ Benaya, onʼa Jehoyada, onʼa kanga wulu a la Kabizele, akatshaka akambu wa mamba. Ndi akatudiaka esongo ehendi wa tambwe la Moaba. Ndi akoto ndu lu difuku lu nshi ya lungi, akadiaki tambwe.

²¹ Ndi akadiaki usi Edjibitu, untu la dimena. Usi Edjibitu ako aki la dikonga lu lunya. Benaya akatshu utsha le ndi la ukalimba, akatohotola usi Edjibitu dikonga uma lu lunya landi, akudiaki la dio.

²² Oso eli akambu wakatshi Benaya, onʼa Jehoyada. Ndu ndi akakundja lukumu kame la antu ako asatu a waki.

²³ Ndi akaleki antu akumi asatu nemo, keli ndi kombedima lʼantu aku asatu. Davidi akukitsha olombodi wa elami andi.

²⁴ Asahele, onangu Joaba, aki otoi omotshi lʼatei wʼakumi asatu ako; Elehanana, onʼa Dodo, usi Betelehema.

²⁵ Shama, usi Haroda, Elika, usi Haroda,

²⁶ Heleze, usi Palati, Ira, onʼa Ikeshe, usi Tekoa,

²⁷ Abiyezere, usi Anatota, Mebunai, usi Husha.

²⁸ Zalamona, usi Ahoa. Maharai, usi Netofa,

²⁹ Helebe, onʼa Bana, usi Netofa, Itai, onʼa Ribai, usi Ngibeya kʼasi Bendjamina.

³⁰ Benaya, usi Piratona, Hidai, uma lu ekedi wa Ngasha,

³¹ Abi-Alabona, usi Araba. Azimaveta, usi Bahurima.

³² Eliyamba, usi Shalabona, ana apami wa Jashena, Jonatana,

³³ Shama, usi Harara, Ahiyame, onʼa Sharara, usi Harara,

³⁴ Elifelete, onʼa Ahasbai, onʼa usi Maka, Eliyame, onʼa Ahitofele, usi Ngilo,

³⁵ Heziro, usi Karamele, Parai, usi Araba,

³⁶ Ingala, onʼa Natana, usi Zoba, Bani, usi Ngada.

³⁷ Zeleke, usi Amona, Naharai, usi Berote, omembi wa diango dia ta a Joaba, onʼa Zeruya.

³⁸ Ira, usi Jetere, Ngareba, usi Jetere,

³⁹ Uriya, usi Hiti. Vo tshe waki akumi asatu la esambeli.